Skanda Purana · Chapter 7.47

// pulastya uvāca // //
tato gacchennṛpaśreṣṭha supūrṇaṃ gautamāśramam //
yatra pūrvaṃ tapastaptaṃ gautamena mahātmanā

purā''sīdgautamo nāma muniḥ paramadhārmikaḥ //
sa bhaktyā''rādhayāmāsa devadevaṃ maheśvaram

bhaktyā''rādhayamānasya nirbhidya dharaṇītalam //
samuttasthau mahalliṃgaṃ paraṃ māheśvaraṃ nṛpa

etasminneva kāle tu vāguvācāśarīriṇī //
pūjayaitanmahalliṃgaṃ tvadbhaktyā samupasthitam//
varaṃ varaya bhadraṃ te yatte manasi vartate

// gautama uvāca// //
atrāśramapade deva tvayā śambho jagatpate //
sadā kāryaṃ hi sānnidhyaṃ yadi tuṣṭo mama prabho

yastvāṃ paśyati sadbhaktyā brahmalokaṃ sa gacchatu

// ākāśavāṇyuvāca // //
māghamāse caturddaśyāṃ yo'tra māṃ vīkṣayiṣyati //
kṛṣṇāyāṃ brāhmaṇaśreṣṭha sa yāsyati parāṃ gatim

evamuktvā tato vāṇī virarāma mahīpate //
tatrāsti kuṇḍamaparaṃ pavitraṃ jalapūritam//
tatra snāto naraḥ sadyaḥ kulaṃ tārayate'khilam

yastatra kurute śrāddhaṃ viśeṣādindusaṃkṣaye //
gayāśrāddhaphalaṃ tasya sakalaṃ jāyate dhruvam

tatra dānaṃ praśaṃsaṃti tilānāṃ munipuṃgavāḥ //
tilasaṃkhyāni varṣāṇi dānātsvarge vasennṛpa

arbude gautamī yātrā siṃhasthe ca bṛhaspatau //
amāyāṃ somavāreṇa dviṣaḍgodāvarīphalam

ṣaṣṭivarṣasahasrāṇi bhāgīrathyavagāhane //
sakṛdgodāvarīsnānātsiṃhasthe ca bṛhaspatau

iti śrīskānde mahāpurāṇa ekāśātisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe gautamāśramatīrthamāhātmyavarṇanaṃnāma saptacatvāriṃśo'dhyāyaḥ