સ્કંદ પુરાણ · અધ્યાય 7.47

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ સુપૂર્ણં ગૌતમાશ્રમમ્ ॥
યત્ર પૂર્વં તપસ્તપ્તં ગૌતમેન મહાત્મના

પુરાઽઽસીદ્ગૌતમો નામ મુનિઃ પરમધાર્મિકઃ ॥
સ ભક્ત્યાઽઽરાધયામાસ દેવદેવં મહેશ્વરમ્

ભક્ત્યાઽઽરાધયમાનસ્ય નિર્ભિદ્ય ધરણીતલમ્ ॥
સમુત્તસ્થૌ મહલ્લિંગં પરં માહેશ્વરં નૃપ

એતસ્મિન્નેવ કાલે તુ વાગુવાચાશરીરિણી ॥
પૂજયૈતન્મહલ્લિંગં ત્વદ્ભક્ત્યા સમુપસ્થિતમ્॥
વરં વરય ભદ્રં તે યત્તે મનસિ વર્તતે

॥ ગૌતમ ઉવાચ॥ ॥
અત્રાશ્રમપદે દેવ ત્વયા શમ્ભો જગત્પતે ॥
સદા કાર્યં હિ સાન્નિધ્યં યદિ તુષ્ટો મમ પ્રભો

યસ્ત્વાં પશ્યતિ સદ્ભક્ત્યા બ્રહ્મલોકં સ ગચ્છતુ

॥ આકાશવાણ્યુવાચ ॥ ॥
માઘમાસે ચતુર્દ્દશ્યાં યોઽત્ર માં વીક્ષયિષ્યતિ ॥
કૃષ્ણાયાં બ્રાહ્મણશ્રેષ્ઠ સ યાસ્યતિ પરાં ગતિમ્

એવમુક્ત્વા તતો વાણી વિરરામ મહીપતે ॥
તત્રાસ્તિ કુણ્ડમપરં પવિત્રં જલપૂરિતમ્॥
તત્ર સ્નાતો નરઃ સદ્યઃ કુલં તારયતેઽખિલમ્

યસ્તત્ર કુરુતે શ્રાદ્ધં વિશેષાદિન્દુસંક્ષયે ॥
ગયાશ્રાદ્ધફલં તસ્ય સકલં જાયતે ધ્રુવમ્

તત્ર દાનં પ્રશંસંતિ તિલાનાં મુનિપુંગવાઃ ॥
તિલસંખ્યાનિ વર્ષાણિ દાનાત્સ્વર્ગે વસેન્નૃપ

અર્બુદે ગૌતમી યાત્રા સિંહસ્થે ચ બૃહસ્પતૌ ॥
અમાયાં સોમવારેણ દ્વિષડ્ગોદાવરીફલમ્

ષષ્ટિવર્ષસહસ્રાણિ ભાગીરથ્યવગાહને ॥
સકૃદ્ગોદાવરીસ્નાનાત્સિંહસ્થે ચ બૃહસ્પતૌ

ઇતિ શ્રીસ્કાન્દે મહાપુરાણ એકાશાતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખણ્ડે ગૌતમાશ્રમતીર્થમાહાત્મ્યવર્ણનંનામ સપ્તચત્વારિંશોઽધ્યાયઃ