Skanda Purana · Verses 7.41-2

// śrīprahlāda uvāca // //
dhanyāstu naralokāste gomatyāṃ tu kṛtodakāḥ //
pūjayiṣyaṃti ye kṛṣṇaṃ ketakītulasīdalaiḥ

na teṣāṃ saṃbhavo'stīha ghorasaṃsā ragahvare //
teṣāṃ mṛtyuḥ punarnāsti hyamaratvaṃ hi te gatāḥ

anyatra vai yatīnāṃ tu koṭīnāṃ yatphalaṃ bhavet //
dvārakāyāṃ tu caikena bhojitena tato'dhikam

atītaṃ varttamānaṃ ca bhaviṣyadyacca pātakam //
nirddahennāsti saṃdeho dvārakā manasā smṛtā

jñātvā kaliyuge ghore hāhābhūtamacetanam//
dvārakāṃ ye na muñcanti kṛtārthāste narottamāḥ

mṛtānāṃ yatra jaṃtūnāṃ śvetadvīpe sthitiḥ sadā

agniṣvāttā barhiṣada ājyapāḥ somapāśca ye //
ekaviṃśatiḥ pitṛgaṇā dvārakāyāṃ vasaṃti te

puṣkarādīni tīrthāni gaṃgādyāḥ saritastathā //
kurukṣetrādi kṣetrāṇi kāśyādīnyūṣarāṇi ca

gayādipitṛtīrthāni prabhāsādyāni yāni ca //
sthānāni yāni puṇyāni grāmāśca nivasaṃti vai

kāśyādipuryo yā nityaṃ nivasaṃti kalau yuge //
nityaṃ kṛṣṇasya sadane pāpināṃ muktide sadā

vaiśākhaśukladvādaśyāṃ prabodhinyāṃ śeṣataḥ //
vaiśākhyāṃ daityaśārdūla kalpādiṣu yugādiṣu

caṃdrasūryoparāgeṣu manvādiṣu na saṃśayaḥ //
vyatīpāteṣu saṃkrāṃtau vaidhṛtau daityanāyaka

tilodakaṃ ca yaddatta tatsthale pitṛbhaktitaḥ //
tatsarvamakṣayaṃ proktaṃ gomatyāṃ snānapūrvakam

ye'tra śrāddhaṃ prakurvaṃti piṃḍadānapuraḥsaram //
teṣāmatrākṣayā tṛptiḥ pitṝṇāmupajāyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturtha dvārakāmāhātmye gomatīsnāna kṛṣṇapūjana yatibhojana dāna śrāddhādisatphalavarṇanaṃnāmaikacatvāriṃśo'dhyāyaḥ