Skanda Purana · Verses 7.41-3

// īśvara uvāca // //
tasyaiva pūrvadigbhāge sarasvatyā pratiṣṭhitam //
liṃgaṃ mahāprabhāvaṃ tu someśādagnigocare

bhairaveśvararūpastu vāḍavaḥ kumbhasaṃsthitaḥ //
yatra devyā samānītaḥ sāgarasya samīpataḥ

viśrāmārthaṃ kṣaṇaṃ muktvā devyā liṃgaṃ pratiṣṭhitam //
samabhyarcya vidhānena gṛhītvā vaḍavānalam//
samudramadhye cikṣepa devānāṃ hitakāmyayā

tato hṛṣṭatarā devāḥ śaṃkhadundubhiniḥsvanaiḥ //
pūrayantoṃ'baraṃ devīmīḍire puṣpavṛṣṭibhiḥ

devamāteti te nāma kṛtvocustāṃ tadā surāḥ //
kṛtvā tu bhairavaṃ kāryamasādhyaṃ devadānavaiḥ

pratiṣṭhitavatī cātra yasmālliṃgaṃ mahodayam //
tvaṃ sarvasaritāṃ śreṣṭhā sarvapātakanāśinī //
tasmādbhairavanāmeti liṃgaṃ khyātiṃ gamiṣyati

ityuktā tu tadā devī bhairaveśvaranairṛte //
sāgarasya sthitā ramye tatra mūrttimatī satī

pūjayettāṃ vidhānena taṃ tathā bhairaveśvaram //
mahānavamyāṃ yatnena kṛtvā snānaṃ vidhānataḥ //
sarasvatīṃ pūjayitvā vāgdoṣānmucyate'khilāt

tasyā liṃgaṃ tu saṃpūjya saṃsnāpya payasā pṛthak //
aghoreṇaiva vidhivatsamyagyātrāphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye bhairaveśvaramāhātmyavarṇanaṃnāmaikacatvāriṃśo'dhyāyaḥ