Skanda Purana · Chapter 7.41

// pulastya uvāca // //
tato gacchennṛpaśreṣṭha mārkaṃḍeyasya cāśramam//
yatra pūrvaṃ tapastaptaṃ mārkaṃḍena mahātmanā

mṛkaṇḍo brāhmaṇonāma purā''sīcchaṃsitavrataḥ //
ante vayasi saṃjātastasya putro'tisundaraḥ

sarvalakṣaṇasaṃpūrṇaḥ śāṃtaḥ sūryasamaprabhaḥ //
kasyacittvatha kālasya tasyāśramapade nṛpa

āgato brāhmaṇo jñānī kaścitsāmudravicchubhaḥ //
tato'sau krīḍamānastu bālakaḥ paṃcavārṣikaḥ

ānāsāgraśikhāgrābhyāṃ ciraṃ caivāvalokitaḥ //
tato'hasatsa sahasā taṃ mṛkaṇḍo hyalakṣayat

athā'bravīcciraṃ dṛṣṭastvayā putro mama dvija//
tato hasitavānbhūyaḥ kimidaṃ kāraṇaṃ vada

asakṛtsa mṛkaṇḍena yāvatpṛṣṭo dvijottamaḥ //
uparodhavaśāttasmai yathārthaṃ saṃnyavedayat

asya bālasya cihnāni yāni kāye dvijottama //
ajaraścāmaraścaiva tairbhavetpuruṣaḥ kila

ṣaṇmāsenāsya bālasya nūnaṃ mṛtyurbhaviṣyati //
etasmātkāraṇāddhāsyaṃ mayā'kāri dvijottama //
anṛtaṃ noktapūrvaṃ me vairiṣvapi kadācana

// pulastya uvāca // //
evamuktvā tu sa jñānī uṣitvā tatra śarvarīm //
mṛkaṃḍenābhyanujñāta iṣṭaṃ deśaṃ jagāma ha

mṛkaṃḍopi sutaṃ jñātvā tataḥ kṣīṇāyuṣaṃ nṛpa //
paṃcavārṣikamapyārttaścakāropanayānvitam

śrutādhyayanasaṃpannaṃ yaṃyaṃ paśyasi cāgrataḥ //
tasyābhivādanaṃ kāryaṃ tvayā putraka nityaśaḥ

tataścakre brahmacārī piturvākyaṃ viśeṣataḥ

bālaṃ vṛddhaṃ yuvānaṃ ca yaṃyaṃ paśyati cakṣuṣā //
namaskaroti taṃ sarvaṃ brāhmaṇaṃ vinayānvitaḥ

kasyacittvatha kālasya tasyāśramasamīpataḥ //
saptarṣayaḥ samāyātāstīrthayātrāparāyaṇāḥ

atha tānsatvaraṃ gatvā vaṃdayāmāsa pārthiva //
bālaḥ savinayopetaḥ sarvāṃścaiva yathākramam

dīrghāyurbhava tairuktaḥ sa bālastuṣṭitatparaiḥ //
āsthitāśca yathābhīṣṭaṃ deśaṃ bālaṃ visarjya tam

teṣāṃ madhyeṃ'girānāma divyajñānasamanvitaḥ //
tenāvalokito bālaḥ sūkṣmadṛṣṭyā paraṃtapa

atha tānabravītsarvānmunīnkiṃcitsavismayaḥ //
dīrghāyurna ca bālo'yaṃ yuṣmābhiḥ saṃprakīrtitaḥ

gamiṣyati kumāro'yaṃ nidhanaṃ paṃcame dine //
tanna yuktaṃ hi no vākyamasatyaṃ dvijasattamāḥ

yathā'yaṃ cirajīvī syāttathā nītirvidhīyatām //
atha te munayo bhītā mithyā vākyasya pārthiva

bālakaṃ taṃ samādāya brahmalokaṃ gatāstadā //
tatra dṛṣṭvā caturvaktraṃ namaścakrurmunīśvarāḥ

teṣāmanaṃtaraṃ tena bālake nābhivāditaḥ //
dīrghāyurbhava tenā'pi brahmaṇoktaḥ sa bālakaḥ

tataḥ saptarṣayo hṛṣṭāḥ svacitte nṛpasattama //
sukhāsīnānsaviśrāṃtānabravīnmunipuṃgavān

// brahmovāca // //
paripṛcchata kiṃ kāryaṃ kuto yūyamihāgatāḥ

// ṛṣaya ūcuḥ // //
tīrthayātrāprasaṃgena bhramamāṇā mahītalam //
arbudaṃ parvataṃ nāma tasya tīrtheṣu vai gatāḥ

athāgatya drutaṃ dūrādbālenānena vaṃditāḥ //
dīrghāyurbhava saṃdiṣṭastataścāyamanekadhā //
paṃcame divase'syāpi mṛtyurdeva bhaviṣyati

yathā vayaṃ tvayā sārddhamasatyā na caturmukha //
bhavāmo'sya kṛte deva tathā kiṃcidvidhīyatām

atha brahmā prahṛṣṭātmā dṛṣṭvā taṃ munidārakam //
matprasādādayaṃ bālo bhāvī kalpāyurabravīt

tataste munayo hṛṣṭāstamādāya gṛhaṃ prati //
prasthitā brahmalokāttu namaskṛtvā caturmukham

atha tasya pitā tatra mṛkaṃḍo munisattamaḥ //
tato bhāryāsamāyukto vilalāpa suduḥkhitaḥ

hā putraputra karuṇaṃ ruditvā dharmavatsalaḥ //
anāmaṃtrya ca māṃ kasmāddīrghaṃ paṃthānamāśritaḥ

akṛtvāpi kriyāḥ kāryāḥ kathaṃ mṛtyuvaśaṃ gataḥ //
so'haṃ tvayā vinā putra na jīvāmi kathaṃcana

evaṃ vilapatastasya bahudhā nṛpasattama //
bālaścābhyāgatastatra yatra deśe purā sthitaḥ

athāsau prayayau bālaḥ prahṛṣṭenāṃtarātmanā //
taṃ dṛṣṭvā pathi tātaśca saṃprahṛṣṭo babhūva ha

papracchāṃkaṃ samāropya cirāgamana kāraṇam//
tataḥ sa kathayāmāsa sarvaṃ muniviceṣṭitam //
darśanaṃ brahmalokasya padmayonervaraṃ tathā

// bālaka uvāca // //
ajaraścāmaraścāhaṃ kṛtastāta svayaṃbhuvā //
tasmātsatyaṃ madarthe te vyetvasau mānaso jvaraḥ

so'hamārādhayiṣyāmi tathaiva caturānanam //
kṛtvā''śramapadaṃ ramyamarbude parvatottame

amṛtasrāvi tadvākyaṃ śrutvā putrasya sa dvijaḥ //
mṛkaṃḍo harṣasaṃyukto vācamityabravīcca tam

mārkkaṃḍo'pi drutaṃ gatvā ramya marbudaparvatam //
tapastepe suvistīrṇaṃ dhyāyandevaṃ pitāmaham

tasyāśramapade puṇye śrāvaṇe māsi pārthiva //
paurṇamāsyāṃ viśeṣeṇa yaḥ kuryātpitṛtarpaṇam //
pitṛmedhaphalaṃ tasya sakalaṃ syādasaṃśayam

ṛṣiyogena yastatra tarpayedbrāhmaṇottamān //
brahmaloke ciraṃ vāsastasya saṃjāyate nṛpa //

yaḥ snānaṃ kurute tatra samyakchraddhāsamanvitaḥ //
nālpamṛtyubhayaṃ tasya kule kvāpi prajāyate

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍa tṛtīye'rbudakhaṇḍe mārkaṃḍeyāśramapadotpattivarṇanaṃnāmaikacatvāriṃśo'dhyāyaḥ