Skanda Purana · Verses 7.40-3

īśvara uvāca//
tato gacchenmahādevi śvetaketupratiṣṭhitam//
liṃgaṃ mahāprabhāvaṃ tu bhīmenārādhitaṃ purā

kedāreśvarasāṃnidhye nātidūre vyavasthitam//
pūjayate ttadvidhānena kṣīrasnānādibhiḥ kramāt //
yātrāphalamabhiprepsuḥ pretya svargaphalāya vai

// devyuvāca // //
śvetaketostu yaddeva liṃgaṃ proktaṃ tvayā mama //
tasya jātaṃ kathaṃ deva nāma bhīmeśvareti ca

kathaṃ vinirmitaṃ pūrvaṃ tasmindṛṣṭe tu kiṃ phalam

// īśvara uvāca // //
āsīttretāyuge pūrvaṃ rājā svāyaṃbhuveṃtare //
śvetaketuriti khyāto rājarṣiḥ sumahātapāḥ

sa prabhāsaṃ samāgatya pratiṣṭhāpya mahe śvaram //
tapastepe suvipulaṃ sāgarasya taṭe śubhe

paṃcāgnisādhako grīṣme varṣāsvākāśagastathā //
hemaṃte jalamadhyastho nava varṣāṇi paṃca ca

tataścaturddaśe devi tapasā niyamena ca //
tuṣṭenokto mayā devi varaṃ varaya suvrata

śvetaketurathovāca bhaktiṃ dehi suniścalām //
sthāne'sminsthīyatāṃ deva yadi tuṣṭo'si me prabho

evamastvityathoktvā'haṃ tasyāṃtarddhānamāgataḥ //
tataḥ kālāṃtare'tīte śvetaketurmahāprabhaḥ

samārādhya tvidaṃ liṃgaṃ prāptaḥ sthānaṃ mahodayam //
tato jātaṃ nāma tasya śvetaketvīśvaraṃ śrutam

agnitīrthe mahāpuṇye sarvapātakanāśane //
tataḥ kaliyuge prāpte bhrātṛbhiśca samanvitaḥ

tīrthayātrāprasaṃgena yadā prabhāsamāgataḥ //
bhīmaseno mahābāhurvāyuputro mamāṃśajaḥ

talliṃgaṃ pūjayāmāsa kṛtvā jāgeśvaraṃ nijam //
matvā tīrthaṃ mahāpuṇyaṃ sāgarasya samīpataḥ

tadā prabhṛti bhīmeśaṃ punarnāmā'bhavacchubham //
dṛṣṭamātreṇa tenaiva sakṛlliṃgena bhāmini

anyajanmakṛtānyeva pāpāni subahūnyapi //
nāśamāyāṃti sarvāṇi tathaivāmuṣmikāṇi tu

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye bhīmeśvaramāhātmyavarṇanaṃnāma catvāriṃśo'dhyāyaḥ