સ્કંદ પુરાણ · શ્લોક 7.40-3

ઈશ્વર ઉવાચ॥
તતો ગચ્છેન્મહાદેવિ શ્વેતકેતુપ્રતિષ્ઠિતમ્॥
લિંગં મહાપ્રભાવં તુ ભીમેનારાધિતં પુરા

કેદારેશ્વરસાંનિધ્યે નાતિદૂરે વ્યવસ્થિતમ્॥
પૂજયતે ત્તદ્વિધાનેન ક્ષીરસ્નાનાદિભિઃ ક્રમાત્ ॥
યાત્રાફલમભિપ્રેપ્સુઃ પ્રેત્ય સ્વર્ગફલાય વૈ

॥ દેવ્યુવાચ ॥ ॥
શ્વેતકેતોસ્તુ યદ્દેવ લિંગં પ્રોક્તં ત્વયા મમ ॥
તસ્ય જાતં કથં દેવ નામ ભીમેશ્વરેતિ ચ

કથં વિનિર્મિતં પૂર્વં તસ્મિન્દૃષ્ટે તુ કિં ફલમ્

॥ ઈશ્વર ઉવાચ ॥ ॥
આસીત્ત્રેતાયુગે પૂર્વં રાજા સ્વાયંભુવેંતરે ॥
શ્વેતકેતુરિતિ ખ્યાતો રાજર્ષિઃ સુમહાતપાઃ

સ પ્રભાસં સમાગત્ય પ્રતિષ્ઠાપ્ય મહે શ્વરમ્ ॥
તપસ્તેપે સુવિપુલં સાગરસ્ય તટે શુભે

પંચાગ્નિસાધકો ગ્રીષ્મે વર્ષાસ્વાકાશગસ્તથા ॥
હેમંતે જલમધ્યસ્થો નવ વર્ષાણિ પંચ ચ

તતશ્ચતુર્દ્દશે દેવિ તપસા નિયમેન ચ ॥
તુષ્ટેનોક્તો મયા દેવિ વરં વરય સુવ્રત

શ્વેતકેતુરથોવાચ ભક્તિં દેહિ સુનિશ્ચલામ્ ॥
સ્થાનેઽસ્મિન્સ્થીયતાં દેવ યદિ તુષ્ટોઽસિ મે પ્રભો

એવમસ્ત્વિત્યથોક્ત્વાઽહં તસ્યાંતર્દ્ધાનમાગતઃ ॥
તતઃ કાલાંતરેઽતીતે શ્વેતકેતુર્મહાપ્રભઃ

સમારાધ્ય ત્વિદં લિંગં પ્રાપ્તઃ સ્થાનં મહોદયમ્ ॥
તતો જાતં નામ તસ્ય શ્વેતકેત્વીશ્વરં શ્રુતમ્

અગ્નિતીર્થે મહાપુણ્યે સર્વપાતકનાશને ॥
તતઃ કલિયુગે પ્રાપ્તે ભ્રાતૃભિશ્ચ સમન્વિતઃ

તીર્થયાત્રાપ્રસંગેન યદા પ્રભાસમાગતઃ ॥
ભીમસેનો મહાબાહુર્વાયુપુત્રો મમાંશજઃ

તલ્લિંગં પૂજયામાસ કૃત્વા જાગેશ્વરં નિજમ્ ॥
મત્વા તીર્થં મહાપુણ્યં સાગરસ્ય સમીપતઃ

તદા પ્રભૃતિ ભીમેશં પુનર્નામાઽભવચ્છુભમ્ ॥
દૃષ્ટમાત્રેણ તેનૈવ સકૃલ્લિંગેન ભામિનિ

અન્યજન્મકૃતાન્યેવ પાપાનિ સુબહૂન્યપિ ॥
નાશમાયાંતિ સર્વાણિ તથૈવામુષ્મિકાણિ તુ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે ભીમેશ્વરમાહાત્મ્યવર્ણનંનામ ચત્વારિંશોઽધ્યાયઃ