Skanda Purana · Chapter 7.40

// pulastya uvāca // //
tataḥ kāmeśvaraṃ gacchettatra kāmapratiṣṭhitam //
yasmindṛṣṭe sadā martyaḥ surūpaḥ suprabho bhavet

// yayātiruvāca // //
tvayā proktaṃ purā śaṃbhuḥ kāmabāṇa bhayātkila //
vālakhilyāśramaṃ prāpto yatra liṃgaṃ papāta ha

sa kathaṃ pūjitastena śaṃbhurme kautukaṃ mahat //
vada sarvaṃ dvijaśreṣṭha kāmeśvaraniveśanam

// pulastya uvāca // //
muktaliṃge'pi deveśe na smarastaṃ mumoca ha //
darśayannātmano bāṇaṃ tasyāsau pṛṣṭhataḥ sthitaḥ

tato vārāṇasīṃ prāptastadbhayāttripurāṃtakaḥ //
tatrā'pi ca tathā dṛṣṭvā dhṛtacāpaṃ manobhavam

tataḥ prayāgamāpannaḥ kedāraṃ ca tataḥ param//
naimiṣaṃ bhadrakarṇaṃ ca jaṃbūmārge tripuṣkaram

gokarṇaṃ ca prabhāsaṃ ca puṇyaṃ ca kṛmijāṃgalam//
gagādvāraṃ gayāśīrṣaṃ kālābhīṣṭaṃ vaṭeśvaram

kiṃ vā tena bahūktena tīrthānyāyatanāni ca //
asaṃkhyāni gato devaḥ kāmaṃ ca dadṛśe tathā

yatrayatra mahādevastadbhayānnṛpa gacchati //
tatratatra punaḥ kāmaṃ prapaśyati dhṛtāyudham

kasyacittvathakālasya punaḥ prāpto'rbudaṃ prati //
tatrāpaśyattathā kāmamākarṇākarṣitāyudham//
ākuṃcitaikapādaṃ ca sthiradṛṣṭiṃ nṛpo ttama

athā'sau bhagavāñchāṃtaḥ priyāduḥkhasamanvitaḥ //
krodhaṃ cakre viśeṣeṇa dṛṣṭvā taṃ purataḥ sthitam

tasya kopābhibhūtasya tṛtīyānnayanānnṛpa //
niścakrāma mahājvālā yayā'sau bhasmasātkṛtaḥ

sacāpaḥ saśaro rājaṃstasminparvatarodhasi //
śaṃkaro roṣaparyaṃtaṃ gatvā saukhyamavāptavān

kailāsaṃ parvataśreṣṭhaṃ jagāma surapūjitaḥ //
dagdhe manobhave bhāryā ratirasya pativratā //
vyalapatkaruṇaṃ dīnā patiśokapari plutā

tato dārūṇi cāhṛtya citiṃ kṛtvā narādhipa //
ārurohāgnisaṃdīptāṃ citiṃ sā patiduḥkhitā//
tāvadākāśagāṃ vāṇīṃ śuśrāva ca yaśasvinī

vāguvāca//
mā putri sāhasaṃ kārṣīstapasā tiṣṭha sundari//
bhūyaḥ prāpsyasi bharttāraṃ kāmeṃ tuṣṭena śaṃbhunā

sā śrutvā tāṃ tadā vāṇīṃ samuttasthau samumadhyamā//
devamārādhayāmāsa divānaktamataṃdritā//
vratairdānairjapairhomairupavāsaistathā paraiḥ

tato varṣa sahasrāṃte tuṣṭastasyā maheśvaraḥ //
abravīdvada kalyāṇi varaṃ yanmanasi sthitam

// ratiruvāca // //
yadi tuṣṭo'si me deva bhagavam̐lloka bhāvanaḥ //
akṣatāṃgaḥ punaḥ kāmaḥ kāṃto me jāyatāṃ patiḥ

evamukte tayā vākye tatkṣaṇātsamupasthitaḥ //
yathā supto mahārāja tadvadrūpaḥ sa harṣita

ikṣuyaṣṭimayaṃ cāpaṃ puṣpabāṇasamanvitam //
bhṛṃgaśreṇimayyā maurvyā śobhitaṃ sumanoharam

tato ratisamāyuktaḥ praṇipatya maheśvaram//
anujñātastu tenaiva svavyāpāre'bhyavarttata

sa dṛṣṭvā śivamāhātmyaṃ śraddhāṃ kṛtvā nṛpottama //
śivaṃ saṃsthāpayāmāsa parvate'rbudasaṃjñite

yasmindṛṣṭe mahārāja nārī vā yadi vā naraḥ //
saptajanmāṃtarāṇyeva na daurbhāgyamavāpnuyāt

evametanmayā khyātaṃ yanmāṃ tvaṃ paripṛcchasi //
kāmeśvarasya māhātmyaṃ kāmadāha savistaram

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe kāmeśvaramāhātmyavarṇanaṃnāma catvāriṃśo'dhyāyaḥ