સ્કંદ પુરાણ · અધ્યાય 7.40

॥ પુલસ્ત્ય ઉવાચ ॥ ॥
તતઃ કામેશ્વરં ગચ્છેત્તત્ર કામપ્રતિષ્ઠિતમ્ ॥
યસ્મિન્દૃષ્ટે સદા મર્ત્યઃ સુરૂપઃ સુપ્રભો ભવેત્

॥ યયાતિરુવાચ ॥ ॥
ત્વયા પ્રોક્તં પુરા શંભુઃ કામબાણ ભયાત્કિલ ॥
વાલખિલ્યાશ્રમં પ્રાપ્તો યત્ર લિંગં પપાત હ

સ કથં પૂજિતસ્તેન શંભુર્મે કૌતુકં મહત્ ॥
વદ સર્વં દ્વિજશ્રેષ્ઠ કામેશ્વરનિવેશનમ્

॥ પુલસ્ત્ય ઉવાચ ॥ ॥
મુક્તલિંગેઽપિ દેવેશે ન સ્મરસ્તં મુમોચ હ ॥
દર્શયન્નાત્મનો બાણં તસ્યાસૌ પૃષ્ઠતઃ સ્થિતઃ

તતો વારાણસીં પ્રાપ્તસ્તદ્ભયાત્ત્રિપુરાંતકઃ ॥
તત્રાઽપિ ચ તથા દૃષ્ટ્વા ધૃતચાપં મનોભવમ્

તતઃ પ્રયાગમાપન્નઃ કેદારં ચ તતઃ પરમ્॥
નૈમિષં ભદ્રકર્ણં ચ જંબૂમાર્ગે ત્રિપુષ્કરમ્

ગોકર્ણં ચ પ્રભાસં ચ પુણ્યં ચ કૃમિજાંગલમ્॥
ગગાદ્વારં ગયાશીર્ષં કાલાભીષ્ટં વટેશ્વરમ્

કિં વા તેન બહૂક્તેન તીર્થાન્યાયતનાનિ ચ ॥
અસંખ્યાનિ ગતો દેવઃ કામં ચ દદૃશે તથા

યત્રયત્ર મહાદેવસ્તદ્ભયાન્નૃપ ગચ્છતિ ॥
તત્રતત્ર પુનઃ કામં પ્રપશ્યતિ ધૃતાયુધમ્

કસ્યચિત્ત્વથકાલસ્ય પુનઃ પ્રાપ્તોઽર્બુદં પ્રતિ ॥
તત્રાપશ્યત્તથા કામમાકર્ણાકર્ષિતાયુધમ્॥
આકુંચિતૈકપાદં ચ સ્થિરદૃષ્ટિં નૃપો ત્તમ

અથાઽસૌ ભગવાઞ્છાંતઃ પ્રિયાદુઃખસમન્વિતઃ ॥
ક્રોધં ચક્રે વિશેષેણ દૃષ્ટ્વા તં પુરતઃ સ્થિતમ્

તસ્ય કોપાભિભૂતસ્ય તૃતીયાન્નયનાન્નૃપ ॥
નિશ્ચક્રામ મહાજ્વાલા યયાઽસૌ ભસ્મસાત્કૃતઃ

સચાપઃ સશરો રાજંસ્તસ્મિન્પર્વતરોધસિ ॥
શંકરો રોષપર્યંતં ગત્વા સૌખ્યમવાપ્તવાન્

કૈલાસં પર્વતશ્રેષ્ઠં જગામ સુરપૂજિતઃ ॥
દગ્ધે મનોભવે ભાર્યા રતિરસ્ય પતિવ્રતા ॥
વ્યલપત્કરુણં દીના પતિશોકપરિ પ્લુતા

તતો દારૂણિ ચાહૃત્ય ચિતિં કૃત્વા નરાધિપ ॥
આરુરોહાગ્નિસંદીપ્તાં ચિતિં સા પતિદુઃખિતા॥
તાવદાકાશગાં વાણીં શુશ્રાવ ચ યશસ્વિની

વાગુવાચ॥
મા પુત્રિ સાહસં કાર્ષીસ્તપસા તિષ્ઠ સુન્દરિ॥
ભૂયઃ પ્રાપ્સ્યસિ ભર્ત્તારં કામેં તુષ્ટેન શંભુના

સા શ્રુત્વા તાં તદા વાણીં સમુત્તસ્થૌ સમુમધ્યમા॥
દેવમારાધયામાસ દિવાનક્તમતંદ્રિતા॥
વ્રતૈર્દાનૈર્જપૈર્હોમૈરુપવાસૈસ્તથા પરૈઃ

તતો વર્ષ સહસ્રાંતે તુષ્ટસ્તસ્યા મહેશ્વરઃ ॥
અબ્રવીદ્વદ કલ્યાણિ વરં યન્મનસિ સ્થિતમ્

॥ રતિરુવાચ ॥ ॥
યદિ તુષ્ટોઽસિ મે દેવ ભગવઁલ્લોક ભાવનઃ ॥
અક્ષતાંગઃ પુનઃ કામઃ કાંતો મે જાયતાં પતિઃ

એવમુક્તે તયા વાક્યે તત્ક્ષણાત્સમુપસ્થિતઃ ॥
યથા સુપ્તો મહારાજ તદ્વદ્રૂપઃ સ હર્ષિત

ઇક્ષુયષ્ટિમયં ચાપં પુષ્પબાણસમન્વિતમ્ ॥
ભૃંગશ્રેણિમય્યા મૌર્વ્યા શોભિતં સુમનોહરમ્

તતો રતિસમાયુક્તઃ પ્રણિપત્ય મહેશ્વરમ્॥
અનુજ્ઞાતસ્તુ તેનૈવ સ્વવ્યાપારેઽભ્યવર્ત્તત

સ દૃષ્ટ્વા શિવમાહાત્મ્યં શ્રદ્ધાં કૃત્વા નૃપોત્તમ ॥
શિવં સંસ્થાપયામાસ પર્વતેઽર્બુદસંજ્ઞિતે

યસ્મિન્દૃષ્ટે મહારાજ નારી વા યદિ વા નરઃ ॥
સપ્તજન્માંતરાણ્યેવ ન દૌર્ભાગ્યમવાપ્નુયાત્

એવમેતન્મયા ખ્યાતં યન્માં ત્વં પરિપૃચ્છસિ ॥
કામેશ્વરસ્ય માહાત્મ્યં કામદાહ સવિસ્તરમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખંડે કામેશ્વરમાહાત્મ્યવર્ણનંનામ ચત્વારિંશોઽધ્યાયઃ