Skanda Purana · Verses 7.39-3

// īśvara uvāca // //
atha saṃpūjya vidhinā devadevaṃ kaparddinam //
tato gacchenmahādevi ligaṃ kedārasaṃsthitam

tasyaivāgneyabhāgasthaṃ bhīmeśvarasamīpagam//
svayaṃbhūtaṃ mahādevi kalpaliṃgaṃ mama priyam

mayā saṃpūjitaṃ devi vṛddhiliṃga mahāprabham//
nirāhārastu yastatra karotyekaṃ prajāgaram

caturdaśyāṃ viśeṣeṇa tasya lokāḥ sanātanāḥ //
rudreśvareti devasya tvāsīnnāma purā yuge

tiṣyesmiṃstu punaḥ prāpte mlecchasparśabhayāturaḥ //
asmim̐lliṃge layaṃ yātaḥ kedāraścābdhisaṃnidhau

tena kedāranāmeti tasya khyātaṃ dharātale //
māghe māsi yatāhāraḥ snātvā tu lavaṇodadhau

padmake tu mahākuṃḍe madhyesya lavaṇāṃbhasaḥ //
rudreśāddakṣiṇe bhāge dhanuṣāṃ daśake sthite

snātvā vidhānato devi rudreśaṃ cārcayiṣyati //
samyakkedārayā trāyāḥ phalaṃ tasya bhaviṣyati

brahmahatyādipāpānāṃ pūjanānnāśanaṃ mahat //
atha tasyaiva devasya itihāsaṃ purātanam

sarvakāmapradaṃ nṛṇāṃ kathyate te surapriye //
āsīdrājā purā devi śaśabiṃduriti śrutaḥ

sārvabhaumo mahīpālo vipakṣagaṇasūdanaḥ //
kalidvāparayoḥ saṃdhau sabhūtaḥ pṛthivīpatiḥ

tasya bhāryā'bhavatsādhvī prāṇebhyo'pi garīyasī //
na devī na ca gandharvī nāsurī na ca pannagī

tādṛgrūpā varārohe yathā'sya śubhalocanā//
tasya hemamayaṃ padmaṃ śatapatraṃ manoramam

khecaraṃ vegi nityaṃ ca tasya rājño mahātmanaḥ//
sa tena paryaṭam̐llokānsarvāndevi svakāmataḥ

ekadā phālgune māsi śuklapakṣe varānane //
caturddaśyāṃ tu saṃprāptaḥ prabhāsakṣetramuttamam

athāpaśyadṛṣīnsarvāñchrīsomeśapuraḥsthitān //
rātrau jāgaraṇārthāya japahomaparāyaṇān

sa dṛṣṭvā somanāthaṃ tu praṇipatya vidhānataḥ //
pūjayāmāsa sarvāṃ stānyathārhaṃ bhaktisaṃyutaḥ

tataḥ kedāramāsādya saṃsnāpya vidhivatpriye //
pūjayitvā vicitrābhiḥ puṣpamālābhirīśvaram

naivedyairvividhairvastrairbhūṣaṇaiśca manoharaiḥ //
tato'tra kārayāmāsa jāgaraṃ susamāhitaḥ

tataste munayaḥ sarve kutūhalasamanvitāḥ //
cyavano yājñavalkyaśca śāṃḍilyaḥ śākaṭāyanaḥ

raibhyo'tha jaiminiḥ krauṃco nāradaḥ parvataḥ śilaḥ //
mārkaṃḍaṃ purataḥ kṛtvā jagmustasya samīpataḥ

cakruḥ kathāḥ suvicitrā itihāsāni bhūriśaḥ //
kīrttayaṃtaḥ sthitāstatra papracchū rājasattamam

// ṛṣaya ūcuḥ // //
kasmātsomeśvaraṃ devaṃ parityajya narādhipa //
kedārasya puro'kārṣīrjāgaraṃ tadbravīhi naḥ //
nūnaṃ vetsi phalaṃ cāsya liṃgasya tvaṃ mahodayam

//
// rājovāca // //
śṛṇvaṃtu brāhmaṇāḥ sarve anyadehodbhavaṃ mama //
purā'haṃ śūdrajātīya āsaṃ brāhmaṇapūjakaḥ

saurāṣṭraviṣaye śubhre dhanadhānyasamākule //
atha kālāṃtare tatra anāvṛṣṭirabhūddvijāḥ

tato'haṃ kṣudhayāviṣṭaḥ prabhāsaṃ kṣetramāsthitaḥ //
athāpaśyaṃ saraḥ śubhraṃ hariṇīmūlasaṃsthitam

tacca rāmasaronāma padminīṣaṇḍamaṃḍitam //
kṣīrodāṃbudhisaṃkāśaṃ dṛṣṭvā snātaḥ klamānvitaḥ

saṃtarpya ca pitṝndevānpītvā svacchamathodakam //
tato'haṃ bhāryayā prokto gṛhāṇemānsaroruhān

etatsamīpato ramyaṃ dṛśyate sthānamuttamam //
vikrīṇīmo'tra gatvā tu yena syādbhojanaṃ vibho

athāvatīrya salilaṃ gṛhītāni mayā dvijāḥ //
kamalāni subhū rīṇi prasthitaśca puraṃ prati

tatra gatvā ca rathyāsu catvareṣu trikeṣu ca //
praphullakamalānyeva kretuṃ vai munisattamāḥ

na kaścitprati gṛhṇāti astaṃ prāpto divākaraḥ //
prāsādaṃ kaṃcidāsādya suptohaṃ saha bhāryayā

tatra suptasya me buddhiḥ śrutvā gītadhvaniṃ tadā //
samutpannā sabhā ryasya kṣudhārtasya viśeṣataḥ //
nūnaṃ jāgaraṇaṃ hyetatkasmiṃścidvibudhālaye

saroruhāṇi cādāya vrajāmyatra surālaye //
yadi kaścitpragṛhṇāti prāṇayātrā tato bhavet

athotthāya samāyāto hyatrāhaṃ munipuṃgavāḥ //
apaśyaṃ liṃgametattu pūjitaṃ kusumaiḥ śubhaiḥ

rudreśvarābhidhamidaṃ vṛddhaliṃgaṃ svayaṃbhuvam //
veśyānaṃgavatīnāmnī śivarātriparāyaṇā

jāgartti puratastasya gītanṛtyotsavādinā //
tataḥ kaścinmayā dṛṣṭaḥ kimetadrātrijāgaram

keyaṃ strī dṛśyate'tyarthaṃ gītanṛtyotsave ratā //
so'bravīcchivadharmoktā śivarātriḥ sudharmadā

tāṃ cānaṃgavatīnāmnī veśyeyaṃ dharmasaṃyutā //
jāgartti paramaṃ śreyaḥ śivarātrivrataṃ śubham

śivarātrivrataṃ hyetadyaḥ samyakkurute naraḥ //
na sa duḥkhamavāpnoti na dāri dryaṃ na baṃdhanam

duṣṭaṃ cāriṣṭayogaṃ vā na rogaṃ na bhayaṃ kvacit //
sukhasaubhāgyasaṃpanno jāyate satkule naraḥ

tejasvī ca yaśasvī ca sarvakalyāṇabhājanam //
bhavedasya prasādena evamāhurmanīṣiṇaḥ

// rājovāca // //
atha me buddhirutpannā tadvrataṃ prati niścalā //
ciṃtitaṃ manasā hyetanmayābrāhmaṇasattamāḥ

annābhāvānmamotpanna upavāso balādyataḥ //
tadahaṃ padmake tīrthesnātvā ca lavaṇāṃbhasi

etaiḥ saroruhairdevaṃ pūjayāmi maheśvaram//
tato mayā sabhāryeṇa rudreśaḥ saṃprapūjitaḥ

padmaiśca bhaktiyuktena sabhāryeṇa viśeṣataḥ //
jāgratsthitastu devāgre tāṃ rātriṃ saha bhāryayā

tataḥ prabhātasamaya udite sūryamaṇḍale //
sā veśyā māmuvācedaṃ kaladhautapalatrayam

gṛhāṇamūlyaṃ padmānāṃ na gṛhītaṃ mayā hi tat //
sāttvikaṃ bhāvamāsthāya sabhāryeṇa dvijottamāḥ

tato bhikṣāṃ samāhṛtya prāṇayātrā mayā kṛtā //
kālena mahatā prāptaḥ kāladharmaṃ munīśvarāḥ

iyaṃ me dayitā sādhvī prāṇebhyo'pi garīyasī //
mama dehaṃ samādāya praviṣṭā havyavāhanam//

tatprabhāvādahaṃ jātaḥ sarvabhaumo mahīpatiḥ //
jātismaraḥ sabhāryastu satyametaddvijottamāḥ

etasmātkāraṇādasya bhaktirliṃgasya copari //
mama nityaṃ sabhāryasya satyametadbravīmi vaḥ

mayā kriyāvihīnena bhaktibāhyena sattamāḥ //
vratametatsamācīrṇaṃ tasyedaṃ sumahatpha lam

adhunā bhaktiyuktasya yathopakaraṇānmama //
bhaviṣye yatphalaṃ kiṃcinno vedmi ca munīśvarāḥ //
yena someśamutsṛjya atrāhaṃ bhakti tatparaḥ

// īśvara uvāca // //
evaṃ śrutvā tu te viprā vismayotphullalocanāḥ //
sādhusādhviti jalpaṃto rājānaṃ saṃpraśaṃsire

pūjayāmāsuraniśaṃ liṃgaṃ tatra svayaṃbhuvam //
tato'sau pārthivaśreṣṭho liṃgasyāsyaprasādataḥ //
saṃsiddhiṃ paramāṃ prāpto durllabhāṃ tridaśairapi

sā ca veśyā bhagavatī śivarātriprabhāvataḥ //
tasya liṃgasya māhātmyādraṃbhānāmāpsarā'bhavat

tasmātsarvaprayatnena talliṃgaṃ pūjayedbudhaḥ //
dharmakāmārthamokṣaṃ ca yo vāṃchatyakhilapradam

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsa kṣetramāhātmye kedāreśvara (rudreśvara)liṅgamāhātmyavarṇanaṃ nāmaikonacatvāriṃśo'dhyāyaḥ