Skanda Purana · Chapter 7.4

sūta uvāca // //
sa kṛtvā svāśramaṃ tatra vasiṣṭho bhagavānmuniḥ //
tatra śaṃbhornivāsāya tapastepe sudāruṇam

sa babhūva muniḥ samyakphalāhārasamanvitaḥ //
śīrṇa parṇāśanaḥ paścāddve śate samapadyata

jalāhāraḥ pañcaśatavarṣāṇi saṃbabhūva ha //
varṣāṇāṃ vāyubhakṣo'bhūttato daśaśatāni ca

pañcāgnisādhako grīṣme hemante salilāśayaḥ //
varṣāsvākāśavāsī ca sahasraṃ ca tato'bhavat

tatastuṣṭo mahādevastasyarṣeḥ sumahātmanaḥ //
bhittvā taṃ parvataṃ sadyastatpuro liṃgamutthitam //
taṃ dṛṣṭvā vismayāviṣṭo muniḥ stotramudairayat

namaḥ śivāya śuddhāya sarvagāyā'mṛtāya ca //
kaparddine namastubhyaṃ namastasmai trimūrttaye

namaḥ sthūlāya sūkṣmāya vyāpakāya mahātmane //
niṣaṃgiṇe namastubhyaṃ trinetrāya namonamaḥ

namaścandrakalādhāra namo digvasanāya ca //
pinākapāṇaye tubhyamaṣṭamūrte namonamaḥ

namaste jñānarūpāya jñānagamyāya te namaḥ //
namaste jñānadehāya sarvajñānamayāya ca

kāśīpate namastubhyaṃ giriśāya namonamaḥ //
jagatkāraṇarūpāya mahādevāya te namaḥ

gaurīkānta nama stubhyaṃ namastubhyaṃ śivātmane //
brahmaviṣṇusvarūpāya trinetrāya namonamaḥ

viśvarūpāya śuddhāya namastubhyaṃ mahātmane //
namo viśvasvarūpāya sarvadevamayāya ca

// sūta uvāca // //
etasminneva kāle tu vāguvācāśarīriṇī //
parituṣṭo'smi te bhadraṃ varaṃ varaya suvrata

ityuktvā parvataṃ bhittvā tatpuro liṃgamutthitam

// vasiṣṭha uvāca // //
liṃge'smiṃstava sāṃnidhyaṃ sadā bhavatu śaṃkara //
mayā pūrvaṃ pratijñātaṃ nagasyeha mahātmane //
satyaṃ kuru vaco me tvaṃ yadi tuṣṭo'si śaṃkara

// śrībhagavānuvāca // //
adyaprabhṛti liṃge'sminsāṃnidhyaṃ me bhaviṣyati //
tvadvākyādbrāhmaṇaśreṣṭha sarvaṃ satyaṃ bhaviṣyati

stotreṇānena yo martyo māṃ staviṣyati bhaktitaḥ //
kṛṣṇapakṣe caturdaśyāmāśvine munisattama

matpriyārthaṃ tu śakreṇa preṣitā munisattama //
mandākinīti vikhyātā nadī trailokyapāvinī

devasyottaradigbhāge kuṃḍaṃ tiṣṭhati nityaśaḥ //
tasyāṃ snātvā muniśreṣṭha liṃgaṃ me paśyate tu yaḥ //
sa yāti paramaṃ sthānaṃ jarāmaraṇavarjitam

acalaṃ bhedayitvā tu yasmānme liṃgamudgatam//
acaleśvaranāmnaiva loke khyātiṃ gamiṣyati

asya liṃgasya māhātmyānna kadāciccaliṣyati //
sarvathā ma idaṃ liṃgaṃ pralayānte na cālyate

// sūta uvāca //
etāvaduktvā vacanaṃ virarāma maheśvaraḥ //
vasiṣṭho'pi suhṛṣṭātmā gautamādyā munīśvarāḥ

śakrādayastato devāstīrthānyāyatanāni ca //
ānayāmāsa brahmarṣistapasā parvatottame

tatastuṣṭaḥ suraśreṣṭhastatra vāsamathākarot

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe'caleśvarotpatti varṇanaṃnāma caturtho'dhyāyaḥ