Skanda Purana · Chapter 7.39

// yayātiruvāca // //
yattvayā kīrtitaṃ brahmanpūrvaṃ devaiḥ prasāditaḥ //
liṃgaṃ saṃsthāpayāmāsa sthirarūpo maheśvaraḥ

kasmāttatpātitaṃ liṃgaṃ vālakhilyairmahātmabhiḥ //
kasmāttatrācalo jāto devadevo maheśvaraḥ

etanme kautukaṃ sarvaṃ yathāvadvaktumarhasi //
tasmindṛṣṭe ca kiṃ puṇyaṃ narāṇāṃ tatra jāyate

// pulastya uvāca // //
maheśvarasya māhātmyaṃ śṛṇu pārthivasattama //
atra te kīrtayiṣyāmi pūrvavṛttaṃ kathāṃtaram

yadā pañcatvamāpannā satī satyaparākramā //
apamānena dakṣasya yajñe na ca nimaṃtritā

tadā kāmo drutaṃ gṛhya puṣpacāpaṃ tamabhyagāt//
kandarppaṃ sahasā dṛṣṭvā sandhiteṣuṃ sudurjayam

āpatantaṃ bhayāttasya praṇaṣṭastripurāṃtakaḥ //
sa tadā bhramamāṇaśca itaścetaśca pārthiva

vālakhilyāśramaṃ prāptaḥ puṇyaṃ sadvṛkṣaśobhitam //
sa tatra bhagavāṃsteṣāṃ dārairdṛṣṭaḥ surūpavān

digvāsāḥ supriyālāpastatastāḥ kāmamohitāḥ //
tyaktvā putragṛhādyaṃ ca sarvāstatpṛṣṭhasaṃsthitāḥ //
babhūvuścāniśaṃ rājanmāṃ bhajasveti cābruvan

cakrurāliṃganaṃ kāściccumbanaṃ ca tathāparāḥ //
anyāstasya hi liṃgaṃ tatspṛśaṃti ca muhurmuhuḥ

sa cāpi bhagavāñchambhurniṣkāmaḥ parameśvaraḥ //
jagadvyāptiṃ samāśritya sarvaprāṇiṣu vartate

sa cāpi bhagavācchaṃbhustāsāṃ sarati prāṅmukhaḥ //
bhrāṃtastatrāśrame teṣāṃ dārānkāmena pīḍayan

atha te munayo dṛṣṭvā vikṛtiṃ dārasaṃbhavām //
ajānanto mahādevaṃ ruṣṭāstasya mahātmanaḥ //

daduḥ śāpaṃ susaṃtaptāḥ kalatrārthe paraṃtapa //
patatāṃ patatāṃ liṅgametatte pāpakṛttama

viḍambayasi no dārānajasraṃ cāsya darśanāt //
tataścaivāpatalliṃgaṃ tatkṣaṇāttatpuradviṣaḥ

brahmavākyena rājarṣe cakampe vasudhā tataḥ //
śīrṇāni giriśṛṃgāṇi cukṣubhurmakarālayāḥ //

tato devagaṇāḥ sarve bhayatrastā narādhipa //
akāle pralayaṃ matvā trailokye paryavasthitam

tata pitāmahaṃ jagmu stasmai sarvaṃ nyavedayan //
pralayasyeva cihnāni dṛśyante parameśvara

kiṃ nimittaṃ suraśreṣṭha na jānīmo vayaṃ prabho //
teṣāṃ tadvacanaṃ śrutvā ciraṃ dhyātvā pitāmahaḥ

abravītpātitaṃ liṃgaṃ vālakhilyaiḥ pinākinaḥ //
tenaite dāruṇotpātāḥ saṃjātā bhayasūcakāḥ

tasmānmayā samāyuktāḥ sarve tatra divaukasaḥ //
vrajaṃtu yena talliṃgaṃ sthāne saṃsthāpayecchivaḥ

yāvanno jāyate loke pralayo' kālasaṃbhavaḥ //
evaṃ saṃmaṃtrya te sarve tato'rbudamupāyayuḥ

vālakhilyāśrame yatra talliṃgaṃ nipapāta ha //
tuṣṭuvurvividhaiḥ sūktairvedoktairvinayānvitāḥ

// devā ūcuḥ // //
namaste devadeveśa bhaktānāṃ cābhayaṃkara //
namaste sarvavāsāya sarvayajñamayāya ca

sarveśvarāya devāya paramajyotiṣe namaḥ //
namaḥ sphuṭatara jñānagamyāya vedhase

tryaṃbakāya ca bhīmāya pinākavarapāṇaye //
tvayi sarvamidaṃ protaṃ sūtre maṇigaṇā iva

saṃsāre vibudhaśreṣṭha jagatsthāvarajaṃgamam //
na tadasti triloke'sminsusūkṣmamapi śaṃkara //
yattvayā na prabho vyāptaṃ sṛṣṭisaṃhārakāraṇāt

pṛthivyādīni bhūtāni tvayā sṛṣṭāni kāmataḥ //
yāsyaṃti tāni bhūyo'pi tava kāye jagatpate

prasīda bhagavaṃstasmālliṃgametatsureśvara //
sthāne sthāpaya bhadraṃ te yāvanna syātprajākṣayaḥ

// śrībhagavānuvāca // //
nirvikārasya malliṃgaṃ vālakhilyaiḥ prapātitam//
kathaṃ bhūyaḥ pragṛhṇāmi yāvacchuddhirna jāyate

śakto'haṃ vālakhilyānāṃ nigrahaṃ karttumañjasā //
kintu me brāhmaṇā mānyāḥ pūjyāśca surasattamāḥ

acalaṃ liṃgametaddhi noddharttuṃ śakyate vibho //
eka evātra nirdiṣṭa upāyo nāparaḥ smṛtaḥ

yadi me tvaṃ purā liṃgaṃ pūjayethāḥ pitāmaha //
tato devagaṇāḥ sarve tato viprāstato'pare

tato nau śāṃtimāgacchejjagatsthāvarajaṃgamam

// pulastya uvāca // //
evamuktaḥ sa bhagavāñchaṃkareṇa nṛpottama //
tatastaṃ pūjayāmāsa brahmā pūrvaṃ subhaktitaḥ

brahmaṇo'nantaraṃ viṣṇustataḥ śakra stato'pare //
vālakhilyādayo viprā mantraiśca śatarudriyaiḥ

tataste dāruṇotpātā upaśāṃtāśca tatkṣaṇāt //
abhavatsumukho loko vṛtto gandhavaho mṛduḥ

athovāca mahādevaḥ sarvāṃstāṃstridaśālayān//
vṛṇudhvaṃ suvaraṃ sarve matto yanmanasīpsitam

// devā ūcuḥ // //
tava liṃgasya saṃsparśādapi pāpakṛto narāḥ //
svargaṃ yāsyaṃti deveśa nāśaṃ yāsyati kilbiṣam //
vratadānāni sarvāṇi tīrthayātrāyutāni ca

tasmādvajreṇa devendrastavaitalliṃgamuttamam//
chādayiṣyati sarvatra yadi tvaṃ manyase prabho

// śrībhagavānuvāca // //
abhiprāyo mamāpyeṣa vartate hṛdi padmaja //
evaṃ karotu devendraḥ sarvadharmavivṛddhaye

pulastya uvāca // //
tataḥ saṃchādayāmāsa vajreṇa tridaśādhipaḥ //
talliṃgaṃ sarvamartyānāṃ yathā'dṛśyaṃ vyajāyata

adyāpi vajrasaṃsparśāttatsānnidhyaṃ gato naraḥ //
ājanmamaraṇātpāpānmucyate nātra saṃśayaḥ //

māhātmyaṃ kīrtitaṃ yasmāttalliṃge śaṃkareṇa tu //
vastreṇācchāditaṃ caiva śakreṇaiva dharātale

tataḥprabhṛti liṃgasya marttye pūjā vyajāyata //
purāsīcchaṃkaraḥ pūjyo yathānye tridaśālayāḥ

evametatpurāvṛttamarbude parvatottame //
liṃgasya patanātpūjāṃ yanmāṃ tvaṃ pari pṛcchasi

phālgunāntacaturddaśyāṃ naivedyaṃ nūtanairyavaiḥ //
yo dadātyacaleśāya sa bhūyo neha jāyate

brāhmaṇānbhojayedyastu bhaktyā tasminnavairyavaiḥ //
yavasaṃkhyāpramāṇāni yugāni divi modate

tatra dānaṃ praśaṃsanti saktūnāṃ munisattamāḥ //
nūtanānāṃ mahārāja yataḥ proktaṃ purāriṇā

kiṃ dānairvividhairdattaiḥ kiṃ yajñaiśca suvistaraiḥ //
kiṃ tīrthairvividhaihomaistapobhiḥ kiṃ ca kaṣṭadaiḥ

phālgunāntacaturddaśyāṃ sumaheśvarasannidhau //
dharmāṇyetāni sarvāṇi kalāṃ nārhaṃti ṣoḍaśīm

śṛṇu rājanpurā vṛttaṃ tatrāścaryaṃ yaduttamam //
kaścitpāpasamācāraḥ kuṣṭhī kṣāmatanurnaraḥ

bhikṣārthamāgatastatra lokairanyaiḥ samanvitaḥ //
tena bhikṣārjitaṃ tatra saktūnāṃ kuḍavaṃ nṛpa

tato roga parikleśādbhojanaṃ na cakāra saḥ //
dāghārdito jale tasminsnāto bhaktivivarjitaḥ //
saktūnkṛtvopadhāne tānsa ca supto niśāgame

tato nidrābhibhūtasya sārameyo jahāra ca //
bhakṣayāmāsa yukto'nyaiḥ sārameyairbubhukṣitaḥ

athāsau vismayādrājanpaṃcatvaṃ samupasthitaḥ //
tato jātismaro jāto vidarbhādhipatergṛhe

bhīmonāma nṛpaśreṣṭha damayantīpitā hi yaḥ //
taṃ prabhāvaṃ hi vijñāya saktūnāṃ tatra parvate

phālgunāṃtacaturdaśyāṃ varṣe varṣe jagāma saḥ //
kṛtvā caivopavāsaṃ tu rātrau jāgaraṇaṃ tathā

acaleśvarasānnidhye dadau saktūṃstato bahūn //
sahiraṇyāndvijendrāṇāṃ paśupakṣimṛgeṣu ca

atha te munayaḥ sarve gālavapramukhā nṛpa //
papracchuḥ kautukāviṣṭāḥ saktudānakṛte nṛpam

// ṛṣaya ūcuḥ // //
hastvaśvarathadānānāṃ śaktirasti tavādbhutā //
kasmātsaktūnpramuktvā tvaṃ nānyaddātumihecchasi

// pulastya uvāca // //
athā'sau kathayāmāsa pūrvametatsamudbhavam //
saktudānasya māhātmyaṃ munīnāṃ bhāvitātmanām

pūrvaṃ bhaktyā vihīnasya śunā vai saktavo hṛtāḥ //
tatprabhāvādiyaṃ prāptirmama jātā dvijottamāḥ

sāṃprataṃ bhaktida ttānāṃ kiṃ syājjānāmi no phalam//
etasmātkāraṇāddānaṃ saktūnāṃ prakaromyaham //
tīrthe'sminbhaktisaṃyuktaḥ satyenātmānamālabhe

//
// pulastya uvāca // //
tataste munayo hṛṣṭāḥ sādhusādhviti cābruvan//
cakruścaivātmaśaktyā te saktūnāṃ dānamuttamam

eṣa prabhāvo rājarṣe saktudānasya kīrttitaḥ //
maheśvarasya māhātmyaṃ satyaṃ cāpi prakīrttitam

yaścaitacchṛṇuyādbhaktyā kathyamānaṃ dvijānanāt //
ahorātra kṛtātpāpānmucyate nātra saṃśayaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe śivaliṃga maheśvaramāhātmyavarṇanaṃpuraḥsara saktudānamāhātmyavarṇanaṃnāmaikonacatvāriṃśo'dhyāyaḥ