Skanda Purana · Verses 7.38-3

// devyuvāca // //
yadetadbhavatā proktaṃ paśyetpūrvaṃ kaparddinam //
bhagavansaṃśayaṃ hyenaṃ yathāvadvaktumarhasi

sa bhṛtyaḥ kila deveśa tava śambho mahāprabhaḥ //
prabhoranantaraṃ bhṛtya eṣa dharmaḥ sanātanaḥ

īśvara uvāca // //
śṛṇu devi pravakṣyāmi yathā pūjyatamo hi saḥ //
kaparddī sarvadevānāmādyo vighneśvaraḥ prabhuḥ

yo'sāvatīṃdriyagrāhyaḥ prabhāsakṣetrasaṃsthitaḥ //
someśvaro mahādevi liṃgarūpī sadāśivaḥ

/
tasya vāme sthito viṣṇurvarāha iti yaḥ smṛtaḥ //
tasya dakṣiṇabhāge tu sthito brahmā prajāpatiḥ //
kaparddirūpamāsthāya sāvitryāḥ kopakāraṇāt

kṛte heraṃbanāmā tu tretāyāṃ vighnamarddanaḥ //
laṃbodaro dvāpare tu kaparddī tu kalau smṛtaḥ

evaṃ yugeyuge tasya avatāraḥ pṛthakpṛthak //
yathākāryānurūpeṇa jāyate ca punaḥpunaḥ

aṣṭāviṃśatime tatra devi prāpte caturyuge //
kāraṇātmā yathotpannaḥ kaparddī tatra me śṛṇu

purā dvāparasaṃdhau tu saṃprāpte ca kalau yuge //
striyo mlecchāśca śūdrāśca ye cānye pāpakāriṇaḥ //
prayāṃti svargamevāśu dṛṣṭvā someśvaraṃ prabhum

na yajñā na tapo dānaṃ na svādhpāyo vrataṃ na ca //
kurvatopi narā devi sarve yāṃti śivālayam

taṃ prabhāvaṃ viditvaivaṃ someśvarasamudbhavam //
agniṣṭomādikāḥ sarvāḥ kriyā naṣṭāḥ sureśvari

tato bālāśca vṛddhāśca ṛṣayo vedapāragāḥ //
śūdrāḥ striyo'pi taṃ dṛṣṭvā prayāṃti paramāṃ gatim

naṣṭayajñotsave kāle śūnye ca vasudhātale //
ūrddhvabāhubhirākrāṃtaṃ paripūrṇaṃ triviṣṭapam

tato devā maheṃdrādyā duḥkhenaiva samanvitāḥ //
paribhūtā manuṣyaiste śaṃkaraṃ śaraṇaṃ gatāḥ

ūcuḥ prāṃjalayaḥ sarva indrādyāḥ surasattamāḥ //
vyāptoyaṃ mānuṣaiḥ svargaḥ prasādāttava śaṃkara

nivāsāya prabho'smākaṃ sthānaṃ kiṃcitsamādiśa //
ahaṃ śreṣṭho hyahaṃ śreṣṭha ityevaṃ te parasparam//
jalpaṃtaḥ sarvato deva paryaṭaṃti yathecchayā

dharmarājaḥ sudharmātmā teṣāṃ karma śubhāśubham//
svayaṃ likhitamālokya tūṣṇīmāste suvismitaḥ

yeṣāmatha kṛtaṃ sajjaṃ kumbhīpākaṃ sudāruṇam //
rauravaḥ śālmalirdeva dṛṣṭvā tāndivi saṃsthitān //
vailakṣyaṃ paramaṃ gatvā vyāpāraṃ tyaktavānasau //

// śrībhagavānuvāca // //
pratijñātaṃ mayā sarvaṃ bhaktyā tuṣṭena vai surāḥ //
somāya mama sāṃnidhyamasminkṣetre bhaviṣyati

na śakyamanyathākartumātmano yadudīritam//
evaṃ yāsyaṃti te svargaṃ ye māṃ drakṣyaṃti tatra vai

bhayodvignāstato devāḥ pārvatīṃ prekṣya viśvataḥ //
ūcuḥ prāṃjalayaḥ sarve tvamasmākaṃ gatirbhava

evamuktvā'stuvandevāḥ stotreṇānena sattama //
jānubhyāṃ dharaṇīṃ gatvā śirasyādhāya cāṃjalim //

// devā ūcuḥ // //
namaste devadeveśi namaste viśvadhātrike //
namaste padmapatrākṣi namaste kāṃcanadyute

namaste saṃhartri kartri namaste śaṃkarapriye //
kālarātri namastubhyaṃ namaste giriputrike

ārye bhadre viśālākṣi namaste lokasundari//
tvaṃ ratistvaṃ dhṛtistvaṃ śrīstvaṃ svāhā tvaṃ sudhā satī

tvaṃ durgā tvaṃ manirmedhā tvaṃ sarvaṃ tvaṃ vasundharā //
tvayā sarvamidaṃ vyāptaṃ trailokyaṃ sacarācaram

nadīṣu parvatāgreṣu sāgareṣu guhāsu ca //
araṇyeṣu ca caityeṣu saṃgrāmeṣvāśrameṣu ca

trailokye tatra paśyāmo yatra tvaṃ devi na sthitā //
etajjñātvā viśālākṣi trāhi no mahato bhayāt

// īśvara uvāca // //
evamuktā tu sā devī devairiṃdrapurogamaiḥ //
kāruṇyānnijadehaṃ tvaṃ tadā mardditavatyasi

mardayaṃtyāstava tadā saṃjātaṃ ca mahanmalam //
tatra jajñe gajeṃdrāsyaścaturbāhurmanoharaḥ

tatobravītsurānsarvānbhavatī karuṇātmikā //
eṣa eva mayā sṛṣṭo yuṣmākaṃ hitakāmyayā

eṣa vighnāni sarvāṇi prāṇināṃ saṃvidhāsyati

mohena mahatā''viṣṭāḥ kāmopahatabuddhayaḥ //
somanāthamapaśyaṃto yāsyaṃti narakaṃ narāḥ

evaṃ te vacanaṃ śrutvā sarve te hṛṣṭamānasāḥ //
svasthānaṃ bhejire devāstyaktvā mānuṣajaṃ bhayam

athe bhavadanaḥ prāha tvāṃ devi vinayānvitaḥ //
kiṃ karomi viśālākṣi ādeśo dīyatāṃ mama

// śrībhagavatyuvāca // //
gaccha prābhāsikaṃ kṣetraṃ yatra saṃnihito haraḥ //
tadrakṣa mānuṣāṇāṃ ca yathā nāyāti gocaram

liṃgaṃ tu devadevasya sthāpitaṃ śaśinā svayam //
bhavatyā''deśito nityaṃ nṛṇāṃ vighnaṃ karoti yaḥ

prasthitaṃ puruṣaṃ dṛṣṭvā somanāthaṃ prati prabhum//
sa karoti mahāvighnaṃ kapardī lokapūjitaḥ

putradāragṛhakṣetra dhanadhānyasamudbhavam //
janayetsa mahāmohaṃ tataḥ paśyati no haram

athavā gaḍugaṃḍādi vyādhiṃ caiva samutsṛjet //
tairgrastaḥ puruṣo mohānna paśyati tato haram

tasmātsarvaprayatnena someśvaraparīpsayā //
sa nityaṃ pūjanīyastu smartavyastu divāniśam

stotreṇānena deveśi sarvavighnāṃtakena vai//
samārādhya gaṇādhyakṣaḥ prabhāsakṣetrarakṣakaḥ

tatte'haṃ saṃpravakṣyāmi stotraṃ tadvighramardanam//
kapardino mahādevi sāvadhānāvadhāraya //

ॐ namo vighnarājāya namaste'stu kapardine//
namo mahogradaṃṣṭrāya prabhāsakṣetravāsine

kapardinaṃ namaskṛtya yātrānirvighrahetave//
stoṣye'haṃ vighnarājānaṃ siddhibuddhipriyaṃ śubham

mahāgaṇapatiṃ śūramajitaṃ jayavarddhanam//
ekadaṃtaṃ ca dvidaṃtaṃ caturdaṃtaṃ caturbhujam

tryakṣaṃ ca śūlahastaṃ ca rakta netraṃ varapradam //
ajeyaṃ śaṃkukarṇaṃ ca pracaṇḍaṃ daṃḍanāyakam//
āyaskadaṃḍinaṃ caiva hutavaktraṃ hutapriyam

anarcito vighnakaraḥ sarvakāryeṣu yo nṛṇām //
taṃ namāmi gaṇādhyakṣaṃ bhīmamugramumāsutam

madavataṃ virūpākṣamibhavaktrasamaprabham //
dhruvaṃ ca niścalaṃ śāṃtaṃ taṃ namāmi vināyakam

tvayā pūrveṇa vapuṣā devānāṃ kāryasiddhaye //
gajarūpaṃ samāsthāya trāsitāḥ sarvadānavāḥ

ṛṣīṇāṃ devatānāṃ ca nāyakatvaṃ prakāśitam

iti stutaḥ surairagre pūjyase tvaṃ bhavātmaja //
tvāmārādhya gaṇādhyakṣamibhavaktrasamaprabham

dhruvaṃ ca niścalaṃ śāṃtaṃ parītaṃ vi jayaśriyā //
kāryārthaṃ raktakusumai raktacaṃdanavāribhiḥ

raktāṃbaradharo bhūtvā caturthyāmarcayettu yaḥ //
ekakālaṃ dvikālaṃ vā niyato niyatāśanaḥ

rājānaṃ rājaputraṃ vā rājamaṃtriṇameva ca //
rājyaṃ vā sarvavighneśo vaśīkuryātsarāṣṭrakam

yatphalaṃ sarvatīrtheṣu sarvayajñeṣu yatphalam//
sa tatphalamavāpnoti smṛtvā devaṃ vināyakam

viṣamaṃ na bhavettasya na sa gacchetparābhavam //
na ca vighnaṃ bhavettasya jano jātismaro bhavet

ya idaṃ paṭhati stotraṃ ṣaḍbhirmāsairvaraṃ labhet //
saṃvatsareṇa siddhiṃ ca labhate nātra saṃśayaḥ

prasādāddarśanaṃ yāti tasya someśvaraḥ prabhuḥ//
kapardākāramudaraṃ yato'sya samudāhṛtam//
tato'sya nāma jānīhi kaparddīti mahātmanaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye kapardivināyakamāhātmyavarṇanaṃnāmāṣṭātriṃśodhyāyaḥ