Skanda Purana · Verses 7.38-2

//śrīprahlāda uvāca // //
dvārakāyāśca māhātmyaṃ śṛṇu pautra mayoditam //
śṛṇvato gadataścāpi muktiḥ kṛṣṇādbhaveddhruvam

putreṇa lokāñjayati pautreṇānantyamaśnute //
atha putrasya pautreṇa nākamevādhirohati

yasya putraḥ śucirdakṣaḥ pūrve vayasi dhārmikaḥ //
viṣṇubhaktiṃ ca kurute taṃ putraṃ kavayo viduḥ

hemaśṛṃgaṃ raupyakhuraṃ savatsaṃ kāṃsyadohanam//
savastraṃ kapilānāṃ tu sahasraṃ ca dinedine

dattvā yatphalamāpnoti brāhmaṇe vedapārage //
tatphalaṃ snānamātreṇa gomatyāṃ madhubhiddine

yastvekaṃ bhojayedvipraṃ dvārakāyāṃ ca saṃsthitam //
subhikṣe bho dvijaśreṣṭhāḥ phalaṃ lakṣaguṇaṃ bhavet

phalaṃ lakṣaguṇaṃ proktaṃ durbhikṣe kṛṣṇasannidhau//
evaṃ dharmānusāreṇa dayādbhikṣāṃ tu bhikṣuke

api naḥ sa kule kaścidbhaviṣyati narottamaḥ //
yo yatīno kalau prāpte pitṝnuddiśya dāsyati

dvārakāyāṃ viśe ṣeṇa satkṛtya kṛṣṇasannidhau //
annadānaṃ yatīnāṃ tu kaupīnācchādanāni ca

nātmanaḥ kratubhiḥ sviṣṭairnāsti tīrthaiḥ prayojanam//
yatra vā tatra vā kāryyaṃ yatīnāṃ prīṇanaṃ sadā

śvapacādayo'pi te dhanyā ye gatā dvārakāṃ purīm //
prāpya bhāgavatānye vai pitṝnuddiśya putrakāḥ //

bhaktyā saṃpūjayiṣyaṃti vastrairdānaiśca bhūribhiḥ

gayāpiṃḍena nāsmākaṃ tṛptirbhavati tādṛśī //
yādṛśī viṣṇubhaktānāṃ satkāreṇopa jāyate

vaiśākhe ye kariṣyaṃti dvādaśīṃ kṛṣṇasannidhau //
kṛṣṇaṃ saṃpūjayantaśca rātrau kurvaṃti jāgaram

māhātmyaṃ paṭhanīyaṃ tu dvārakāsaṃbhavaṃ śubham //
kṛṣṇasya bālacaritaṃ bālakṛṣṇādidarśanam

krīḍanaṃ gokulasyaiva krīḍā gopījanasya ca //
kṛṣṇāvatārakarmāṇi śrotavyāni punaḥpunaḥ

rukmaśṛṃgīṃ raupyakhurīṃ muktālāṃgūlabhūṣitām//
savatsāṃ brāhmaṇe dattvā homārthaṃ cāhitāgnaye

nimiṣasparśanāṃśena phalaṃ kṛṣṇasya jāgare //
yatkiṃcitkurute pāpaṃ koṭijanmasu mānavaḥ //
kṛṣṇasya jāgare rātrau dahate nātra saṃśayaḥ

paṭhedbhāgavataṃ rātrau purāṇaṃ dayitaṃ hareḥ //
yāvatsūryyakṛtā''loko yāvaccandrakṛtā niśā

yāvatsasāgarā pṛthvī yāvacca kulaparvatāḥ //
tāvatkālaṃ vasetsvarge nānyathā mama bhāṣitam

āsphoṭayaṃti pitaraḥ praharṣaṃti pitāmahāḥ //
evaṃ taṃ svasutaṃ dṛṣṭvā śṛṇvānaṃ kṛṣṇasaṃbhavam

dvārakāyāśca māhātmyaṃ yatra no jāgare paṭhet //
tanmlecchasadṛśaṃ sthānamapavitraṃ parityajet

śāligrāmaśilā naiva yatra bhāgavatā na hi //
tyajettīrthaṃ mahāpuṇyaṃ puṇyamāyatanaṃ tyajet

tyajedguhyaṃ tathā'raṇyaṃ yatra na dvādaśīvratam

sudeśo'pi bhavenniṃdyo yatra no vaiṣṇavā vratam//
kudeśo'pi bhavetpuṇyo yatra bhāgavatāḥ kalau

saṃkīrṇayonayaḥ pūtā ye bhaktā madhusūdane //
mlecchatulyāḥ kulīnāste ye na bhaktā janārdane

rathārūḍhaṃ prakurvaṃti ye kṛṣṇaṃ madhumādhave //
muktiṃ prayāṃti te sarve kulakoṭisamanvitāḥ

devakīnandanasyārthe rathaṃ kārāpayanti ye //
kalpāṃtaṃ viṣṇuloke te vasanti pitṛbhiḥ saha

dvārakāyāstu māhātmyaṃ śrāvayedyaḥ kalau nṛṇām//
bhāvamutpādayedyo vai labhetkratuśataṃphalam

yo nārcayati pāpiṣṭho devamanyatra gacchati //
koṭijanmārjitaṃ puṇyaṃ harate rukmiṇīpatiḥ

śaṃkhoddhārasamudbhūtāṃ nityaṃ dehe bibhartti hi //
mṛttikāṃ daityarājendra śṛṇu vakṣyāmi yatphalam

yo dadāti yatīnāṃ ca vaiṣṇavānāṃ prayacchati //
svarṇabhāraśataṃ puṇḍraṃ nityaṃ prāpnoti mānavaḥ

gṛhe yasya sadā tiṣṭhecchaṃkhoddhārasya mṛttikā //
nitya kriyākṛtaṃpuṇyaṃ labhetkoṭiguṇaṃ bale

yasya puṇḍraṃ lalāṭe tu gopīcaṃdanasaṃjñakam //
na jahāti gṛhaṃ tasya lakṣmīḥ kṛṣṇapriyā dvijāḥ

na graho bādhate tasya norago na ca rākṣasaḥ //
piśācā na ca kūṣmāṃḍā na ca pretā na jaṃbhakāḥ

nāgnicaurabhayaṃ tasya darīṇāṃ caiva bandhanam //
vidyudulkābhayaṃ caiva na cotpātasamudbhavam

nāriṣṭaṃ nāpaśakunaṃ durnimittādikaṃ ca yat //
satkṛte viṣṇubhakte ca śāligrāmaśilārcane

pīte pādodake viprā naivedyasyāpi bhakṣaṇe //
tulasīsannidhau viṣṇorvilayāvasare kṛte

purā devena kathitaṃ śṛṇu pātraṃ vadāmyaham //
priyā bhāgavatā yeṣāṃ teṣāṃ dāso'smyahaṃ sadā

vihāya mathurāṃ kāśīmavantīṃ sarvapāpahām //
māyāṃ kāṃcīmayodhyāṃ ca saṃprāpte ca kalau yuge //

vasāmyahaṃ dvārakāyāṃ sarvasenāsamāvṛtaḥ //
tīrthavratairyajñadānai rudrādyairmunicāraṇaiḥ

śraddhātyāgena bhaktyā vā yastoṣayitumicchati //
gatvā dvāravatīṃ ramyāṃ draṣṭavyo'haṃ kalau yuge

trailokye yāni tīrthāni mayā śuddhāni bhūriśaḥ ///
vinyastāni ca gomatyāṃ cakratīrthe'tipāvane

dinenaikena gomatyāṃ cakratīrthe kalau yuge //
trailokyasaṃbhavaistīrthaiḥ snāto bhavati mānavaḥ

koṭipāpavinirmukto matsamaṃ vasate naraḥ //
mama loke na saṃdehaḥ kulakoṭisamanvitaḥ

nāparādhakṛtaiḥ pāpairliptaḥ syādu tkaṭaiḥ kṛtaiḥ //
śatajanmāyutānīha lakṣmīrna cyavate gṛhāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye gomatītīragata dvārakācakratīrthayorjāgarādimāhātmyavarṇanaṃ-nāmāṣṭātriṃśattamo'dhyāyaḥ