સ્કંદ પુરાણ · શ્લોક 7.37-2

॥ શ્રીપ્રહ્લાદ ઉવાચ ॥ ॥
કૃષ્ણકૃષ્ણેતિ કૃષ્ણેતિ શ્વપચો જાગરન્નિશિ ॥
જપેદપિ કલૌ નિત્યં કૃષ્ણરૂપી ભવેદ્ધિ સઃ

કૃષ્ણકૃષ્ણેતિ કૃષ્ણેતિ કલૌ વદત્યહર્નિશમ્ ॥
નિત્યં યજ્ઞાયુતં પુણ્યં તીર્થકોટિસમુદ્ભવમ્

સંપૂર્ણૈકાદશી ભૂત્વા દ્વાદશ્યાં વર્દ્ધતે યદિ ॥
ઉન્મીલિનીતિ વિખ્યાતા તિથીનામુત્તમા તિથિઃ

વંજુલીવાસરે યે વૈ રાત્રૌ કુર્વંતિ જાગરમ્॥
યજ્ઞાયુતાયુતં પુણ્યં મુહૂર્તાર્દ્ધેન જાયતે

સંપૂર્ણા દ્વાદશી ભૂત્વા વર્દ્ધતે ચાપરે દિને ॥
ત્રયોદશ્યાં મુનિશ્રેષ્ઠા વંજુલી દુર્લ્લભા કલૌ

ઉન્મીલિનીમનુપ્રાપ્ય યે પ્રકુર્વંતિ જાગરમ્ ॥
નિમિષાર્દ્ધેન તત્પુણ્યં ગવાં કોટિફલપ્રદમ્

સંપૂર્ણૈકાદશી ભૂત્વા પ્રત્યઽહં વર્દ્ધતે યદિ ॥
દર્શશ્ચ પૌર્ણમાસી ચ પક્ષવૃદ્ધિસ્તથોચ્યતે

પક્ષવૃદ્ધિકરીં પ્રાપ્ય યે પ્રકુર્વંતિ જાગરમ્ ॥
નિમિષાર્દ્ધાર્દ્ધમાત્રેણ ગવાં કોટિફલપ્રદમ્

॥ શ્રીપ્રહ્લાદ ઉવાચ ॥ ॥
ચક્રતીર્થે નરઃ સ્નાત્વા મુચ્યતે સર્વ કિલ્બિષૈઃ ॥
સ યાતિ પરમં સ્થાનં દાહપ્રલયવર્જિતમ્

ચક્રં પ્રક્ષાલિતં યત્ર કૃષ્ણેન સ્વયમેવ હિ ॥
તેન વૈ ચક્રતીર્થં હિ પુણ્યં ચ પરમં હરેઃ ॥
ભવંતિ તત્ર પાષાણાશ્ચક્રાંકા મુક્તિદાયકાઃ

તત્રૈવ યદિ લભ્યંતે ચક્રૈર્દ્વાદશભિઃ સહ ॥
દ્વાદશાત્મા સ વિજ્ઞેયો મોક્ષદઃ પરિકીર્તિતઃ ॥

એકચક્રેણ પાષાણો દ્વારવત્યાં સુશોભનઃ ॥
સુદર્શનાભિધેયોસૌ મોક્ષૈકફલદાયકઃ

લક્ષ્મીનારાયણૌ દ્વૌ તૌ ભુક્તિમુક્તિફલપ્રદૌ ॥
ત્રિભિશ્ચૈવાચ્યુતં દેવં સદેન્દ્રપદદાયકમ્

ભૂતિદો વિઘ્નહંતા ચ ચતુશ્ચક્રો જનાર્દ્દનઃ ॥
પઞ્ચભિર્વાસુદેવસ્તુ જન્મમૃત્યુભયાપહઃ

પ્રદ્યુમ્નઃ ષડ્ભિરેવાસૌ લક્ષ્મીં કાંતિં દદાતિ ચ ॥
સપ્તભિર્બલદેવસ્તુ ગોત્રકીર્તિવિવર્દ્ધનઃ

વાંછિતં ચાષ્ટભિર્ભક્ત્યા દદાતિ પુરુષોત્તમઃ ॥
સર્વં દદ્યાન્નવવ્યૂહો દુર્લ્લભો યઃ સુરોત્તમૈઃ

રાજ્યપ્રદો દશભિસ્તુ દશાવતાર એવ ચ ॥
એકાદશભિરૈશ્વર્ય્યમનિરુદ્ધઃ પ્રયચ્છતિ

નિર્વાણં દ્વાદશાત્મા તુ ચક્રૈર્દ્વાદશભિઃ સ્મૃતમ્ ॥
અત ઊર્ધ્વમનંતોઽસૌ સૌખ્યમોક્ષપ્રદાયકઃ

યે કેચિત્તત્ર પાષાણાઃ કૃષ્ણચક્રેણ મુદ્રિતાઃ॥
તેષાં સ્પર્શનમાત્રેણ મુચ્યતે સર્વકિલ્બિષૈઃ

બ્રહ્મહત્યાદિકં પાપં મનોવાક્કાયકર્મજમ્ ॥
તત્સર્વં વિલયં યાતિ ચક્રાંકિતપ્રપૂજનાત્

મ્લેચ્છદેશે શુભે વાઽપિ ચક્રાંકો યત્ર તિષ્ઠતિ ॥
યોજનાનિ દશ દ્વે ચ મમ ક્ષેત્રં ચ સુન્દરિ

મૃત્યુકાલે ચ સંપ્રાપ્તે હૃદયે યસ્તુ ધારયેત્ ॥
ચક્રાકં પાપદલનં સ યાતિ પરમાં ગતિમ્

ગોમતીસંગમે સ્નાત્વા ભૃગુતીર્થે તથૈવ ચ ॥
ન માતુર્વસતે કુક્ષૌ યદ્યપિ સ્યાત્સ પાતકી ॥

તામસં રાજસં વાપિ યત્કૃતં વિષ્ણુપૂજનમ્ ॥
તત્સાત્ત્વિકત્વમભ્યેતિ નિમ્નગાંભો યથાર્ણવે

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે દ્વારકાક્ષેત્રસ્થસુદર્શનપ્રમુખાનન્તાન્તચક્રચિહ્નાંકિત પાષાણમાહાત્મ્યવર્ણનપૂર્વકતત્પૂજનફલાદિકથનંનામ સપ્તત્રિંશત્તમોઽધ્યાયઃ