Skanda Purana · Verses 7.36-2

// sūta uvāca // //
prahlādasya vacaḥ śrutvā sthitastatra sabhāsthale //
papracchātyutsukamanā balistatkṣetravaibhavam

prahlādastadvacaḥ śrutvā bhaktibhāvapuraskṛtam //
abhinandya ca taṃ premṇā pravaktumupacakrame

// prahlāda uvāca// //
ekaikasminpade datte purīṃ dvāravatīṃ prati //
puṇyaṃ kratusahasrāṇāṃ phalaṃ bhavati dehinām

ye'pīcchaṃti manovṛttyā gamanaṃ dvārakāṃ prati //
teṣāṃ pralīyate pāpaṃ pūrvajanmāyutārjitam

atyugrāṇyapi pāpāni tāvattiṣṭhaṃti vigrahe //
yāvanna gacchate jaṃtuḥ kalau dvāravatīṃ prati

lobhenā'pyuparodhena daṃbhena kapaṭena vā //
cakratīrthe tu yo gacchenna punarviśate bhuvi //६/
hīnavarṇo'pi pāpātmā mṛtaḥ kṛṣṇupurīṃ prati //
kali kālakṛtairdoṣairatyugrairapi mānavaḥ //
bhaktyā kṛṣṇamukhaṃ dṛṣṭvā na lipyati kadācana

tāvadvirājate kāśī hyavaṃtī mathurāpurī //
yāvanna paśyate jaṃtuḥ purīṃ kṛṣṇena pālitām

yeṣāṃ kṛṣṇālaye prāṇā gatā dānavanāyaka //
na teṣāṃ punarāvṛttiḥ kalpakoṭiśatairapi

durlabho dvārakāvāso durlabhaṃ kṛṣṇadarśanam //
durlabhaṃ gomatīsnānaṃ rukmiṇīdarśanaṃ kalau

nityaṃ kṛṣṇapurīṃ ramyāṃ ye smaraṃti gṛhe sthitāḥ //
na teṣāṃ pātakaṃ kiṃciddehamāśritya tiṣṭhati

keśavārcā gṛhe yasya na tiṣṭhati mahīpate //
tasyānnaṃ na ca bhoktavyamabhakṣyeṇa samaṃ smṛtam

noṣṇatvaṃ dvija rāje vai na śītatvaṃ hutāśane //
vaiṣṇavānāṃ na pāpatvamekādaśyupavāsinām

nāsti nāsti mahābhāgāḥ kalikālasamaṃ yugam //
smaraṇātkīrttanādviṣṇoḥ prāpyate paramavyayam

satyabhāmāpatiryatra yatra puṇyā ca gomatī //
narā muktiṃ prayāsyaṃti tatra snātvā kalau yuge

mādhave śuklapakṣe tu trispṛśāṃ dvādaśīṃ yadi //
labhate dvārakāyāṃ tu nāsti dhanyatarastataḥ

trispṛśāṃ dvādaśīṃ prāpya gatvā kṛṣṇapurīṃ naraḥ //
yaḥ karoti harerbhaktyā so'śvamedhaphalaṃ labhet

naṃdāyāṃ tu jayāyāṃ vai bhadrā caiva bhavedyadi //
upavāsārcane gīte durllabhā kṛṣṇasannidhau

udayaikādaśī svalpā aṃte caiva trayodaśī //
saṃpūrṇā dvādaśī madhye trispṛśā ca hareḥ priyā

ekena copavāsena upavāsā'yutaṃ phalam //
jāgare śatasāhasraṃ nṛtye koṭiguṇaṃ kalau

tatphalaṃ labhate marttyo dvārakāyāṃ dinedine //
gṛheṣu vasatāmetatkiṃ punaḥ kṛṣṇasaṃnidhau //

vāṅmanaḥkāyajairdoṣairhatā ye pāpabuddhayaḥ //
dvāravatyāṃ vimucyaṃte dṛṣṭvā kṛṣṇamukhaṃ śubham

daityeśvara narāḥ ślāghyā dvāravatyāṃ gatāśca ye

durllabhānīha tīrthāni durlabhāḥ parvatottamāḥ //
durllabhā vaiṣṇavā loke dvārakāvasatiḥ kalau

gavāṃ koṭisahasrāṇi ratnako ṭiśatāni ca //
dattvā yatphalamāpnoti tatphalaṃ kṛṣṇasannidhau

yasyāḥ sīmāṃ praviṣṭasya brahmahatyādipātakam //
naśyate darśanādeva tāṃ purīṃ ko na sevate

cakrāṃkitā śilā yatra gomatyudadhisaṃgame //
yacchati pūjitā mokṣaṃ tāṃ purīṃ ko na sevate

siṃhasthe ca gurau viprā godāvaryyāṃ tu yatphalam//
tatphalaṃ snānamātreṇa gomatyāṃ kṛṣṇasannidhau

dvārakā'vasthitaṃ toyaṃ ṣaṇmāsaṃ pibate naraḥ //
tasya cakrāṃkito deho bhavate nātra saṃśayaḥ

manvantarasahasrāṇi kāśīvāsena yatphalam //
tatphalaṃ dvārakāyāṃ ca vasataḥ paṃcabhirddinaiḥ

tāvanmṛtaprajā nārī durbhagā daityapuṃgava //
yāvanna paśyate bhaktyā kalau kṛṣṇapriyāṃ purīm

rukmiṇīṃ satyabhāmāṃ ca devīṃ jāṃbavatīṃ tathā //
mitraviṃdāṃ ca kāliṃdīṃ bhadrāṃ nāgnajitīṃ tathā

saṃpūjya lakṣmaṇāṃ tatra vaiṣṇavīḥ kṛṣṇavallabhāḥ //
etāḥ saṃpūjya vidhivacchreṣṭhaputraśca labhyate

tāvadbhavabhayaṃ puṃsāṃ gṛhabhaṃgaśca mūrkhatā //
yāvanna paśyate bhaktyā kalau kṛṣṇapurīṃ naraḥ

na sarvatra mahāpuṇyaṃ saṃgame saritāṃpateḥ //
jāhnavīsaṃgamānmuktirgomatīnīrasaṃgamāt //
saṃparke gomatīnīrapūto'haṃ kṛṣṇasannidhau

gomatīnīrasaṃpṛktaṃ ye māṃ paśyaṃti mānavāḥ //
na teṣāṃ punarāvṛttirityāha saritāṃpatiḥ

dvārakāṃ gacchamānasya vipattiśca bhavedyadi //
na tasya punarāvṛttiḥ kalpakoṭiśatairapi

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye dvārakādarśanagomatīsaritsnānavidhimāhātmyavarṇanaṃnāma ṣaṭtriṃśo'dhyāyaḥ