સ્કંદ પુરાણ · શ્લોક 7.36-2

॥ સૂત ઉવાચ ॥ ॥
પ્રહ્લાદસ્ય વચઃ શ્રુત્વા સ્થિતસ્તત્ર સભાસ્થલે ॥
પપ્રચ્છાત્યુત્સુકમના બલિસ્તત્ક્ષેત્રવૈભવમ્

પ્રહ્લાદસ્તદ્વચઃ શ્રુત્વા ભક્તિભાવપુરસ્કૃતમ્ ॥
અભિનન્દ્ય ચ તં પ્રેમ્ણા પ્રવક્તુમુપચક્રમે

॥ પ્રહ્લાદ ઉવાચ॥ ॥
એકૈકસ્મિન્પદે દત્તે પુરીં દ્વારવતીં પ્રતિ ॥
પુણ્યં ક્રતુસહસ્રાણાં ફલં ભવતિ દેહિનામ્

યેઽપીચ્છંતિ મનોવૃત્ત્યા ગમનં દ્વારકાં પ્રતિ ॥
તેષાં પ્રલીયતે પાપં પૂર્વજન્માયુતાર્જિતમ્

અત્યુગ્રાણ્યપિ પાપાનિ તાવત્તિષ્ઠંતિ વિગ્રહે ॥
યાવન્ન ગચ્છતે જંતુઃ કલૌ દ્વારવતીં પ્રતિ

લોભેનાઽપ્યુપરોધેન દંભેન કપટેન વા ॥
ચક્રતીર્થે તુ યો ગચ્છેન્ન પુનર્વિશતે ભુવિ ॥૬।
હીનવર્ણોઽપિ પાપાત્મા મૃતઃ કૃષ્ણુપુરીં પ્રતિ ॥
કલિ કાલકૃતૈર્દોષૈરત્યુગ્રૈરપિ માનવઃ ॥
ભક્ત્યા કૃષ્ણમુખં દૃષ્ટ્વા ન લિપ્યતિ કદાચન

તાવદ્વિરાજતે કાશી હ્યવંતી મથુરાપુરી ॥
યાવન્ન પશ્યતે જંતુઃ પુરીં કૃષ્ણેન પાલિતામ્

યેષાં કૃષ્ણાલયે પ્રાણા ગતા દાનવનાયક ॥
ન તેષાં પુનરાવૃત્તિઃ કલ્પકોટિશતૈરપિ

દુર્લભો દ્વારકાવાસો દુર્લભં કૃષ્ણદર્શનમ્ ॥
દુર્લભં ગોમતીસ્નાનં રુક્મિણીદર્શનં કલૌ

નિત્યં કૃષ્ણપુરીં રમ્યાં યે સ્મરંતિ ગૃહે સ્થિતાઃ ॥
ન તેષાં પાતકં કિંચિદ્દેહમાશ્રિત્ય તિષ્ઠતિ

કેશવાર્ચા ગૃહે યસ્ય ન તિષ્ઠતિ મહીપતે ॥
તસ્યાન્નં ન ચ ભોક્તવ્યમભક્ષ્યેણ સમં સ્મૃતમ્

નોષ્ણત્વં દ્વિજ રાજે વૈ ન શીતત્વં હુતાશને ॥
વૈષ્ણવાનાં ન પાપત્વમેકાદશ્યુપવાસિનામ્

નાસ્તિ નાસ્તિ મહાભાગાઃ કલિકાલસમં યુગમ્ ॥
સ્મરણાત્કીર્ત્તનાદ્વિષ્ણોઃ પ્રાપ્યતે પરમવ્યયમ્

સત્યભામાપતિર્યત્ર યત્ર પુણ્યા ચ ગોમતી ॥
નરા મુક્તિં પ્રયાસ્યંતિ તત્ર સ્નાત્વા કલૌ યુગે

માધવે શુક્લપક્ષે તુ ત્રિસ્પૃશાં દ્વાદશીં યદિ ॥
લભતે દ્વારકાયાં તુ નાસ્તિ ધન્યતરસ્તતઃ

ત્રિસ્પૃશાં દ્વાદશીં પ્રાપ્ય ગત્વા કૃષ્ણપુરીં નરઃ ॥
યઃ કરોતિ હરેર્ભક્ત્યા સોઽશ્વમેધફલં લભેત્

નંદાયાં તુ જયાયાં વૈ ભદ્રા ચૈવ ભવેદ્યદિ ॥
ઉપવાસાર્ચને ગીતે દુર્લ્લભા કૃષ્ણસન્નિધૌ

ઉદયૈકાદશી સ્વલ્પા અંતે ચૈવ ત્રયોદશી ॥
સંપૂર્ણા દ્વાદશી મધ્યે ત્રિસ્પૃશા ચ હરેઃ પ્રિયા

એકેન ચોપવાસેન ઉપવાસાઽયુતં ફલમ્ ॥
જાગરે શતસાહસ્રં નૃત્યે કોટિગુણં કલૌ

તત્ફલં લભતે મર્ત્ત્યો દ્વારકાયાં દિનેદિને ॥
ગૃહેષુ વસતામેતત્કિં પુનઃ કૃષ્ણસંનિધૌ ॥

વાઙ્મનઃકાયજૈર્દોષૈર્હતા યે પાપબુદ્ધયઃ ॥
દ્વારવત્યાં વિમુચ્યંતે દૃષ્ટ્વા કૃષ્ણમુખં શુભમ્

દૈત્યેશ્વર નરાઃ શ્લાઘ્યા દ્વારવત્યાં ગતાશ્ચ યે

દુર્લ્લભાનીહ તીર્થાનિ દુર્લભાઃ પર્વતોત્તમાઃ ॥
દુર્લ્લભા વૈષ્ણવા લોકે દ્વારકાવસતિઃ કલૌ

ગવાં કોટિસહસ્રાણિ રત્નકો ટિશતાનિ ચ ॥
દત્ત્વા યત્ફલમાપ્નોતિ તત્ફલં કૃષ્ણસન્નિધૌ

યસ્યાઃ સીમાં પ્રવિષ્ટસ્ય બ્રહ્મહત્યાદિપાતકમ્ ॥
નશ્યતે દર્શનાદેવ તાં પુરીં કો ન સેવતે

ચક્રાંકિતા શિલા યત્ર ગોમત્યુદધિસંગમે ॥
યચ્છતિ પૂજિતા મોક્ષં તાં પુરીં કો ન સેવતે

સિંહસ્થે ચ ગુરૌ વિપ્રા ગોદાવર્ય્યાં તુ યત્ફલમ્॥
તત્ફલં સ્નાનમાત્રેણ ગોમત્યાં કૃષ્ણસન્નિધૌ

દ્વારકાઽવસ્થિતં તોયં ષણ્માસં પિબતે નરઃ ॥
તસ્ય ચક્રાંકિતો દેહો ભવતે નાત્ર સંશયઃ

મન્વન્તરસહસ્રાણિ કાશીવાસેન યત્ફલમ્ ॥
તત્ફલં દ્વારકાયાં ચ વસતઃ પંચભિર્દ્દિનૈઃ

તાવન્મૃતપ્રજા નારી દુર્ભગા દૈત્યપુંગવ ॥
યાવન્ન પશ્યતે ભક્ત્યા કલૌ કૃષ્ણપ્રિયાં પુરીમ્

રુક્મિણીં સત્યભામાં ચ દેવીં જાંબવતીં તથા ॥
મિત્રવિંદાં ચ કાલિંદીં ભદ્રાં નાગ્નજિતીં તથા

સંપૂજ્ય લક્ષ્મણાં તત્ર વૈષ્ણવીઃ કૃષ્ણવલ્લભાઃ ॥
એતાઃ સંપૂજ્ય વિધિવચ્છ્રેષ્ઠપુત્રશ્ચ લભ્યતે

તાવદ્ભવભયં પુંસાં ગૃહભંગશ્ચ મૂર્ખતા ॥
યાવન્ન પશ્યતે ભક્ત્યા કલૌ કૃષ્ણપુરીં નરઃ

ન સર્વત્ર મહાપુણ્યં સંગમે સરિતાંપતેઃ ॥
જાહ્નવીસંગમાન્મુક્તિર્ગોમતીનીરસંગમાત્ ॥
સંપર્કે ગોમતીનીરપૂતોઽહં કૃષ્ણસન્નિધૌ

ગોમતીનીરસંપૃક્તં યે માં પશ્યંતિ માનવાઃ ॥
ન તેષાં પુનરાવૃત્તિરિત્યાહ સરિતાંપતિઃ

દ્વારકાં ગચ્છમાનસ્ય વિપત્તિશ્ચ ભવેદ્યદિ ॥
ન તસ્ય પુનરાવૃત્તિઃ કલ્પકોટિશતૈરપિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે ચતુર્થે દ્વારકામાહાત્મ્યે દ્વારકાદર્શનગોમતીસરિત્સ્નાનવિધિમાહાત્મ્યવર્ણનંનામ ષટ્ત્રિંશોઽધ્યાયઃ