Skanda Purana · Chapter 7.35

// pulastya uvāca // //
tato gacchennṛpaśreṣṭha tīrthaṃ pāpapraṇāśanam //
māmuhradamiti khyātaṃ tasminparvatarodhasi

tatra snāto naraḥ samyakchraddhāvānsusamāhitaḥ //
mucyate pātakairghoraiḥ pūrvajanmakṛtairapi

tasya paścimadigbhāge liṃgamasti mahīpate //
sarvakāmapradaṃ nṛṇāṃ sthāpitaṃ mudgalena tu

snātvā māmuhrade puṇye yastalliṃgaṃ ca paśyati //
śuklapakṣe caturddaśyāṃ phālgune māsi mānavaḥ //
sa prāpnoti paraṃ śreyaḥ sarvatīrtheṣu durlabham

yastatra kurute śrāddhaṃ dakṣiṇāṃ mūrtimāśritaḥ //
pitarastasya tṛpyaṃti yāvadābhūtasaṃplavam

tatra dānaṃ praśaṃsaṃti nīvārāṇāṃ maharṣayaḥ //
śākamūlādibhiḥ śrāddhaṃ pitṝṇāṃ tuṣṭidaṃ nṛpa

// yayātiruvāca // //
māmuhradamiti vibho kathaṃ nāmā'bhavatpurā //
mudgalasyāśramaṃ brūhi mama sarvaṃ vidhānataḥ

//
// pulastya uvāca // //
tatrasthasya purā rājanmudgalasya mahātmanaḥ //
vimānaṃ varamādāya devadūtaḥ samāgataḥ

so'bravīddevarājñāhaṃ preṣito munisattama //
tavārthāyā''ruhainaṃ tvaṃ vimānaṃ gamyatāṃ divi

// mudgala uvāca // //
svargasya ye guṇā dūta ye ca doṣā prakīrtitāḥ ///
tānme vada kariṣye'haṃ śrutvā vai yatkṣamaṃ bhavet

brūhi tānsakalāndūta tvāgamiṣyāmyahaṃ tataḥ

// devadūta uvāca// //
alametena darpeṇa kriyatāṃ śakrajalpitam//
puṇyaiḥ svakairdvijaśreṣṭha samāgaccheridaṃ tataḥ

// mudgala uvāca // //
aśrutaistairna gacche'hametanme hṛdi niścitam //
kariṣye'haṃ tapo bhūri pūjayiṣye maheśvaram

// dūta uvāca // //
na śaktaḥ svarguṇānvaktumapi varṣaśatairapi //
saṃkṣepātkathayiṣyāmi yadi te niścayaḥ paraḥ

naṃdanādīni ramyāṇi tatra devavanāni ca //
ananyasadṛśā bhogāḥ sadā tṛptirdvijottama

/
bubhukṣā naiva tṛṣṇā ca nidrālasye na ca prabho //
raṃbhādyapsaraso mukhyā gaṃdharvāstuṃbarādayaḥ //
ramayaṃti naraṃ tatra gītairnṛtyairanekaśaḥ

evaṃ ca vasate tatra janaḥ svarge tapodhana //
yāvatpuṇyakṣayastāvatpaścātpātamavāpnuyāt

eka eva mune doṣaḥ svarloke pratibhāti me //
sa eva patanākhyastu svargiṇāṃ ca bhayāvahaḥ

na puṇyaṃ labhate tatra kartuṃ vipra kathaṃcana //
karmabhūmiriyaṃ brahmanbhogabhūmistu sā smṛtā

yadatra kriyate karma śubhaṃ tatropa bhujyate //
tathā dṛṣṭvā vimānasthānbhūridharmādisaṃyutān

bahutejonvitānsvarge hyalpapuṇyo dvijottama //
paścāttāpajaduḥkhena svargastho duḥkhitaḥ sadā

na mayā sukṛtaṃ bhūri kṛtaṃ marttye kathaṃcana

tathā ca patamānāṃśca dṛṣṭvā cānyānsahasraśaḥ //
ātmanaśca mahadduḥkhaṃ jāyate ca tadadbhutam

etatte sarvamākhyātaṃ guṇadoṣasamudbhavam //
svargasaṃceṣṭitaṃ brahmankuruṣva yadabhīpsitam

// mudgala uvāca // //
patanasya bhayaṃ yatra puṇyahānirna varddhanam//
tena svargeṇa me dūta naiva kāryaṃ kathaṃcana

vācyastvayā mamādeśāddevarājaḥ sphuṭaṃ vacaḥ//
kṣamyatāmaparādho me na svargāya spṛhā mama

tatkarmā'haṃ kariṣyāmi yena no patanādbhayam/.
sādhayiṣyāmi tām̐llokānye sadā pātavarjitāḥ

//
// pulastya uvāca // //
evamuktvā nṛpaśreṣṭha mudgalaḥ svarganiḥspṛhaḥ //
sthitastatraiva nirataḥ śivadhyānaparāyaṇaḥ

śrutvā dūto'pi śakrasya tasya vākyaṃ savistaram//
kathayāmāsa śakrasya taṃ bhūyaḥ so'bhyabhāṣata

devadūtāpramāṇaṃ ca vimānaṃ hi tvayā kṛtam //
na kṛtaṃ kena citpūrvaṃ na kariṣyati kaścana

tasmāttatra drutaṃ gatvā balādānaya taṃ munim //
ānayasvānyathā śāpaṃ tava dāsyāmyasaṃśayam // ३१ / //
// pulastya uvāca // //
śakrasya vacanaṃ śrutvā devadūte bhayānvitaḥ //
prasthitaḥ satvaraṃ tatra mudgalo yatra tiṣṭhati

mudgalo'pi vimānasthaṃ punardṛṣṭvā samāgatam //
māmuhrade praviśyātha vārayāmāsa taṃ tadā

sa tasya vacanenaiva staṃbhito likhito yathā //
calituṃ naiva śaknoti prabhāvāttasya sanmuneḥ

cirakālagataṃ jñātvā dūtaṃ tu tridaśādhipaḥ //
svayaṃ tatrāyayau kopādāruhyairāvaṇaṃ gajam

/
atha dṛṣṭvā tadā dūtaṃ staṃbhitaṃ mudgalena tu //
vadhārthaṃ tūdyatastasya sa vajraṃ bhrāmayaṃstadā

etasminneva kāle tu utpātāstatra dāruṇāḥ //
apasavyaṃ mṛgāścakruḥ paśavaḥ pakṣiṇaśca ye //
tāndṛṣṭvā cintayāmāsa mudgalo vismayānvitaḥ

atha dṛṣṭvāṃbaragataṃ vajrodyatakaraṃ harim //
staṃbhayāmāsa taṃ sadyo dṛṣṭipātena mudgalaḥ

tatra śakraḥ stutiṃ cakre bhagnotsāho nṛpottama //
muñca māṃ brāhmaṇaśreṣṭha yāsyāmi tridaśālayam

svarge vā yadi vā marttye tiṣṭha tvaṃ svecchayā dvija //
mayā kṛtaḥ samudyogo hitārthaṃ te mune hyayam

varaṃ varaya bhadraṃ te nityaṃ yo manasi sthitaḥ //
taṃ te sarvaṃ pradāsyāmi yadyapi syātsudurlabham

// mudgala uvāca // //
eṣa eva varaḥ ślāghyo yattvaṃ dṛṣṭaḥ sureśvara //
darśanaṃ te sahasrākṣa svapneṣvapi sudurlabham

avaśyaṃ yadi me deyo varo vṛtraniṣūdana //
tvatprasādena me mokṣo jāyatāṃ śīghrameva hi

mā mu hradaṃ samāgatya dūtaḥ prokto mayā yataḥ //
tato māmuhradamiti khyātiṃ yātu dharātale

tīrthametatsahasrākṣa sarva pāpapraṇāśanam //
atra snātvā divaṃ yāṃtu tvatprasādātsureśvara

piṇḍadānātparāṃ prītiṃ labhaṃtāṃ pitaro'tra hi

// indra uvāca // //
māmuhradamiti khyātaṃ tīrthametadbhaviṣyati //
variṣṭhaṃ nātra sandeho matprasādādvijottama

atra ye phālgune māsi paurṇamāsyāṃ samāhitāḥ //
kariṣyaṃti punaḥ snānaṃ te yāsyaṃti parāṃ gatim

piṇḍadānādgayātulyaṃ lapsyaṃte phalamuttamam //
puṇyadānaphalaṃ cātra saṃkhyāhīnaṃ dvijottama

// pulastya uvāca // //
evamuktvā yayau svargaṃ dūtamādāya vajrabhṛt //
mudgalo'pi paraṃ brahma ciṃtayanhyaniśaṃ tataḥ

śukladhyānaparo bhūtvā mokṣaṃ prāptastato'kṣayam

atra gāthā purā gītā nāradena mahātmanā //
bahuviprasamavāye parvatesminmahīpate

māmu hrade naraḥ snātvā dṛṣṭvā taṃ mudgaleśvaram //
iha bhuktvā'khilānkāmānante muktimavāpsyati //
etasmātkāraṇādrājanmāmuhradamiti smṛtam

tattīrthaṃ sarvatīrthānāṃ pravaraṃ lokaviśrutam //
tasmātsarvaprayatnena snānaṃ tatra samācaret

mokṣakāmo viśeṣeṇa ya icchetparamaṃ padam //
caṇḍikāśramamāsādya kiṃ punaḥ paritapyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame'rbudakhaṇḍe māmuhradotpattivarṇanaṃnāma pañcatriṃśo'dhyāyaḥ