Skanda Purana · Verses 7.34-3

// īśvara uvāca // //
sarasvatī varaṃ prāpya variṣṭhaṃ vaḍavānalāt //
punastaṃ sāgare kṣeptumudyatā sā manasvinī

devādeśātprabhāsasya purataḥ saṃsthitā tadā //
samudramāhūya tadā vāḍavārpaṇakāṃkṣiṇī

tvamādiḥ sarvadevānāṃ tvaṃ prāṇaḥ prāṇināṃ sadā //
devādeśādgṛhāṇa tvamāgatyārṇava vāḍavam

evaṃ saṃciṃtito devyā yadāsāvaṃbhasāṃpatiḥ //
tathā jalātsamuttīrya samāyāto mahādyutiḥ

taṃ dṛṣṭvā vismitā devī divyaṃ viṣṇumivāparam //
śyāmaṃ kamalapatrākṣaṃ sāgaraṃ sumanoramam

vicitramālyābharaṇaṃ citravastrānulepanam//
āpagābhiḥ sarūpābhiḥ strīrūpābhiḥ samāvṛtam

evaṃvidhaṃ samālokya sā devī brahmaṇaḥ sutā //
sarasvatī jalanidhimuvācedaṃ śucismitā

tvamagrajaḥ sarvabhavodbhavānāṃ tvaṃ jīvitaṃ janmavatāṃ narāṇām //
tasmātsurāṇāṃ kuru kāryamiṣṭaṃ vahniṃ gṛhāṇa tvamihopanītam

atrāṃtare so'pi vimṛśya sarvaṃ kāryaṃ svabuddhyā kimihopapannam //
kṛtvā'nalasya grahaṇaṃ mayedaṃ kāryaṃ surāṇāṃ vihitaṃ bhavecca

evaṃ ciṃtayatastasya grahaṇaṃ rucitaṃ tataḥ //
vāḍavāgneḥ samudrasya surapīḍākṛte yadā

tadā tena puraḥsthena devī sābhihitā bhṛśam //
vāḍavaṃ saṃprayacchainaṃ suraśatruṃ sarasvati

tatastayā praṇamyāśu pitāmahapuraḥsarān //
cāraṇāṃścārucitrāṃgyā sarasvatyā divi sthitān

punaśca karasaṃstho'sau vāḍavo'bhihitastayā //
tvamapo bhakṣayasveti surairukta imā iti

evamuktvā samudrasya tadā devyā samarppitaḥ //
vāḍavo'gniḥ sarasvatyā surādeśānmahābalaḥ

taṃ samarpya tatastasmi nnadī bhūtvā sarasvatī //
praviṣṭā sāgaraṃ devī nāradeśvaramārgataḥ

daityasūdanasāṃnidhye dattvārghyaṃ lavaṇāṃbhasi //
arghyeśvaraṃ pratiṣṭhāpya daityasūdana paścime

tato'bdhiṃ saṃpraviṣṭā sā paṃcasrotā mahānadī //
svarūpeṇaiva sā puṇyā punaḥ puṇyatamā'bhavat

prabhāsakṣetrasaṃparkātsamudrasya ca saṃgamāt //
sāgaro'pi samāsādya sarasvatyāstu vāḍavam //
nirdhano vai dhanaṃ prāpyācintayatkva kṣipāmyaham

sa tenaiva karasthena dīpya mānena sāgaraḥ //
vahninā śikharasthena bhāti merurivāparaḥ

taṃ tathāvidhamālokya tatra ye jalacāriṇaḥ //
yādogaṇāste mumucurdāhabhītā mahāsvanam

taṃ śrutvā bhairavaṃ śabdamāyāto daityasūdanaḥ //
āha yādogaṇānsarvānmā bhaiṣṭa sumahābalāḥ

yasmādanena prathamā āpo bhakṣyā na tatragāḥ //
prāṇinastanna bhetavyaṃ bhavadbhistu mamājñayā

evamuktastu kṛṣṇena tūṣṇīṃbhūtā jalecarāḥ

tūṣṇīṃbhūteṣu sarveṣu jalajeṣu jaleśvaram //
prāhācyutaḥ prakṣipa tvamapāṃ madhye tu vāḍavam

agādhembhasi tenāsau nikṣipto vāḍavo'nalaḥ //
varuṇena pibannāste tajjalaṃ sumahābalaḥ

tasyocchvāsāniloddhūtaṃ tattoyaṃ sāgarādbahiḥ //
nirmaryādeva yuvatiritaścetaścadhāvati

atha kāle gate devi śuṣyatyaṃbu śanaiḥśanaiḥ //
viditvā kṣīyamāṇāstā apo jalanidhistataḥ

āhaivaṃ puṃḍarīkākṣamapaḥ kuru tvamakṣayāḥ //
anyathā sarvanāśena jalānāṃ māmihāgrataḥ //
bhakṣayiṣyatyasau vahnirvāḍavo hi janārddana

etacchrutvā vacastasya samudrasya tu bhīṣaṇam //
kṛtaṃ tadakṣayaṃ toyamā tmano bhayanāśanam

jñātvā surāḥ sarvamidaṃ viceṣṭitaṃ kṛtyānalasyāsya nibaṃdhanaṃ tathā //
pralobhanaṃ toyapuraḥsarā dviṣaḥ pupūjire keśavamatra cāriṇam

evaṃ sarasvatī prāptā prabhāsaṃ kṣetramuttamam //
brahmalokānmahādevi sarvapāpapraṇāśinī

someśāddakṣiṇāgneye sāgarasya samī pataḥ //
saṃsthitā tu mahādevī vaḍavānaladhāriṇī

snātvā'gnitīrthe pūrvaṃ tāṃ pūjayedvidhinā naraḥ //
daṃpatyorbhojanaṃ tatra paridhānaṃ sakañcu kam

dattvā tato mahādevaṃ pūjayecca kaparddinam //
iti vṛttaṃ purā devi cākṣuṣasyāṃtare'bhavat

dadhīcyanvayajātasya vāḍavasya mahā tmanaḥ //
asminpunarmahādevi prāpte vaivasvateṃ'tare //
aurvastu bhārgave vaṃśe samutpanno mahādvijaḥ

saṃkṣipto'sau sarasvatyā devamātrā mahāprabhaḥ//
tāvatsthāsyatyapāṃ garbhe yāvanmanvatarāvadhiḥ

iti te kathitaṃ devi sarasvatyāḥ samudbhavam //
śrutaṃ pāpaharaṃ nṛṇāṃ kīrttidaṃ puṇyavarddhanam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sarasvatyavatāramahimavarṇanaṃnāma catustriṃśo'dhyāyaḥ