Skanda Purana · Verses 7.34-2

// śrīprahlāda uvāca // //
evamadbhutamāhātmyaṃ dvārakāyāṃ munīśvarāḥ //
sarveṣāṃ kṣetratīrthānāṃ mahāpāpavidārakm

varṇānāmaśramāṇāṃ ca patitānāṃ viśeṣataḥ/
mahāpāpaharaṃ proktaṃ mahāpuṇyavivarddhanaṃ

atyugrapāparāśīnāṃ dāhasthānaṃ yathā smṛtam //
dvārakāgamanaṃ viprāḥ kiṃ punardvārakāsthitiḥ

viśeṣeṇa tu viprendrāḥ kanyārāśisthite gurau //
brahmādayopi dṛśyaṃte yatra tīrthaiśca saṃyutāḥ

prativarṣaṃ prakurvaṃti dvārakāgamanaṃ narāḥ //
teṣāṃ pādarajaḥ spṛṣṭvā divaṃ yāṃti ca pāpinaḥ

gomatī nīrapūtānāṃ kṛṣṇavaktrāvalokinām //
darśanātpātakaṃ teṣāṃ yāti janmaśatārjitam

itihāsena pūrvoktaṃ śrūyatāṃ munipuṅgavāḥ //
dilīpavasiṣṭha saṃvāde paramāścaryyavarddhanam

kāśyāṃ tu vajralepo hi kṣetra ekatra naśyati //
yāturdarśanataḥ śrutvā dilīpo vākyamabravīt

// dilīpa uvāca // //
vajralepaśca kāśyāṃ tu ghoro yatra vinaśyati //
kṛtsnaśo'tha mahāpuṇyaṃ prāpyaṃ yatra tadasti kim

na prarohaṃti pāpāni yasminkṣetre dvijottama //
tatkṣetraṃ kathyatāṃ puṇyaṃ yatra pāpaṃ praṇaśyati

// vasiṣṭha uvāca // //
āsītkāśyāṃ purā kaścittridaṇḍī mokṣadharmavit //
japandaśāśvemedhe tu gāyatrīṃ ca samāhitaḥ

tatra kācitsamāyātā yuvatī gajagāminī //
tīre saṃsthāpya vāsāṃsi gaṃgāyāḥ śramaśāntaye //
praviṣṭā ca jale nagnā jalakrīḍāṃ cakāra ha

nagnāṃ tāṃ krīḍatīṃ vīkṣya yatirmadanapūritaḥ //
daivāgnibhraṃśito mārgātsahasā ca vimohitaḥ

manasā kāmayāmāsa sā'pi taṃ taruṇaṃ yatim //
tayośca saṃgatistatra saṃjātā pāpakarmaṇoḥ

tayā vimohitaḥ sadyastāmevānusasāra saḥ //
tatprītyai cārjayāmāsa dhanamanyāyatastadā

vārāṇasyāṃ hi na tyaktaścaṃḍālasya pratigrahaḥ //
snānahīnaḥ sadā pāpī rātrau cauryyeṇa varttate

kasmiṃścitsamaye pāpī māṃsārthī tu vanaṃ gataḥ //
dadarśa pramadāṃ tatra mātaṃgīṃ madirekṣaṇām

tasyāḥ prathamatāruṇyaṃ dṛṣṭvā garveṇa pāpmanā //
vane'tha nirjane tatra mātaṃgīsaṃgameyivān

tayā sahānnapānādi kṛtavānpāpamohitaḥ //
aśnāti surayā paṃkaṃ gomāṃsaṃ pāpalaṃpaṭaḥ

tadgṛhe nidhanaṃ prāptaḥ pāpātmā sarvabhakṣakaḥ //
vārāṇasīprabhāvena na prāpto narakaṃ tadā

kiṃ tu tatra kṛtaṃ pāpaṃ vajralepaṃ sudāruṇam //
śūdrīsaṃparka pāpena jāto'sau krūrayoniṣu

vṛko vyāghroragaḥ śvānaḥ śṛgālaḥ sūkaro'bhavat //
duraṃtāṃ yātanāṃ prāptaḥ śamaleśaṃ na vindati

evaṃ janmasahasraistu na tasya pāpakarmaṇaḥ //
mātaṃgyā saṃgajaṃ pāpaṃ vyanaśyata yugāyutaiḥ // २३ /
tato'sau saptame jātaḥ śaśakaścaiva janmani //
tato'sau rākṣaso jātaḥ pāpātmā sarvabhakṣakaḥ

prāṇino bhakṣayansarvānsaṃprāpto viṃdhyaparvate //
asmādanantaraṃ bhāvyaṃ kṛkalāsatvamadbhutam//

śūdrīsaṃgajapāpena bhāvyaṃ ca kṛmiyoninā //
mātaṃgīsaṃgame proktaṃ phalaṃ hyatijugupsitam

yugāyutaṃ sahasraistu bhokṣyamāṇaṃ sudāruṇam //
atyāścaryyamabhūttatra dilīpa śrūyatāṃ mahat

ālokitaṃ ca viṃdhyādrau sarveṣāṃ vismayāspadam //
dṛṣṭvā dvārāvatīṃ kaścitkṛṣṇavaktraṃ suśobhanam

gomatīnīrapūtastu viṃdhyaṃ prāptaḥ sa pāṃthikaḥ //
mātrāṃ kṛṣṇaprasādasya skandhe kṛtvā praharṣitaḥ

prayāsyansvagṛhaṃ tatra dadarśa pathi rākṣasam //
drutaṃ ca krūrakarmāṇaṃ dṛṣṭvā bhakṣitumāgatam

tasya darśanamātreṇa vajralepaḥ sudāruṇaḥ //
vārāṇasīsamudbhūto bhasmasādabhavatkṣaṇāt

janmakoṭiśatenāpi yo na śakyo vyapohitum //
tatpāpaparvatānmuktaḥ kṛṣṇapāṃthikadarśanāt

dagdhe'tha krūrabhāve tu ghanamukto yathā śaśī //
reje puṇyaprakāśena kṛṣṇapāṃthikadarśanāt

tato'bhimukhamabhyetya dvārakāpathikaṃ mudā //
nanāma śraddhayā bhūmau taddarśanamahotsavaḥ

natvā'tha vismitaḥ prāha aho'dya tava darśanāt //
gato ghoratamo bhāvaḥ prāptā saṃsiddhiruttamā

kasmāttvamāgato bhadra prabhāvaḥ kīdṛśastava //
vajralepastu kāśyāṃ vai dagdhaste darśanādanu

// vasiṣṭha uvāca // //
ityevaṃ rākṣasenoktaṃ śrutvā kṛṣṇasya pāṃthikaḥ //
vismayaṃ paramāpannaḥ prāha taṃ harṣamānasaḥ

// pāṃthika uvāca // ///
śrīmaddvāravatīṃ dṛṣṭvā hyāgato'smyatra rākṣasa //
vajralepaharo'smākaṃ prabhāvaḥ kṛṣṇadarśanāt

gomatyāṃ yaḥ sakṛtsnātvā paśyetkṛṣṇamukhāṃbujam ///
sarvānuddharate pāpādapi trailākyadāhakāt

// vasiṣṭha uvāca // //
ityukto rākṣaso hṛṣṭaḥ śuddhātmā bhaktisaṃyutaḥ //
natvā pradakṣiṇaṃ kṛtvā saṃprāpto dvārakāṃ tadā

gomatyāṃ sa tanuṃ tyaktvā prāpto'sau vaiṣṇavaṃ padam //
stūyamānaḥ sureśānairgadharvaiḥ puṣpavṛṣṭibhiḥ

itthaṃ mahāprabhāvo hi dvārakāyāḥ prakīrttitaḥ //
na prarohaṃti pāpāni yasyāḥ pāṃthikadarśanāt //
dvārakāyāṃ tu kiṃ vācyaṃ na prarohaṃti pātakam

ityetatkathitaṃ rājanyatpṛṣṭohaṃ tvayā'nagha //
sarvakṣetrottamaṃ kṣetraṃ vajralepavināśanam

// śrīprahlāda uvāca // //
vasiṣṭhenoditaṃ śrutvā dilīpo hṛṣṭa mānasaḥ //
dvārakāṃ kṣetrarājaṃ taṃ jñātvā ca vismayaṃ yayau

yayau dvāravatīṃ hṛṣṭo devadevasya sādaram //
kṛṣṇaṃ dṛṣṭvā parāṃ siddhiṃ saṃprāpto devamaṃdire

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye dvārakāpānthadarśana mātrataḥ kāśyāṃ kṛtasya pāpavajralepasya vināśane yativṛttāntavarṇanapūrvakaṃ dilīpakṛtadvārakāyātrāvarṇanaṃnāma catustriṃśattamo'dhyāyaḥ