Skanda Purana · Chapter 7.34

// pulastya uvāca // //
kṛṣṇatīrthaṃ tato gacchetkṛṣṇasya dayitaṃ sadā //
yatra sannihito nityaṃ svayaṃ viṣṇurmahīpate // //
// yayātiruvāca // //
kṛṣṇatīrthaṃ kathaṃ tatra jātaṃ brāhmaṇasattama //
kasminkāle mune brūhi sarvaṃ vistarato mama // //

// pulastya uvāca // //
tasminnekārṇave ghore naṣṭe sthāvarajaṃgame //
caṃdrārkapavane naṣṭe jyotiṣi pralayaṃ gate

tato yugasahasrāṃte vibuddhaḥ kamalāsanaḥ //
ekākī ciṃtayāmāsa kathaṃ sṛṣṭirbhavediti

bhramaṃścāpi caturvaktro yāvatpaśyati dūrataḥ //
caturbhujaṃ viśālākṣaṃ puruṣaṃ purataḥ sthitam

taṃ covāca caturvaktraḥ kastvaṃ kena vinirmitaḥ //
kimarthamiha saṃprāptaḥ sarvaṃ vistarato vada

tamuvācātha goviṃdaḥ prahasañchlakṣṇayā girā

ahamādyaḥ pumāneko mayā sṛṣṭo bhavānapi //
sraṣṭumicchāmi bhūyo'pi bhūtagrāmaṃ caturvidham

// pulastya uvāca // //
tasya tadvacanaṃ śrutvā kruddho devaḥ pitāmahaḥ //
abravītparuṣaṃ vākyaṃ bhartsayaṃśca punaḥpunaḥ

sṛṣṭastvaṃ hi mayā mūḍha prathamo'hamasaṃśayam //
tvādṛśānāṃ sahasrāṇi kariṣye'hamasaṃśayam

evaṃ vivadamānau tau mitho rājanmahādyutī //
spardhayā roṣatāmrākṣau yuyudhāte parasparam

muṣṭibhirbāhubhiścaiva nakhairdaṃtairvikarṣaṇaiḥ //
evaṃ varṣasahasraṃ tu tayoryuddhamavarttata

tato varṣasahasrāṃte tayormadhye nṛpottama //
prādurbhūtaṃ mahāliṃgaṃ divyaṃ tejomayaṃ śubham

etasminneva kāle tu vāguvācāśarīriṇī //
yuddhādbrahmannivartasva tvaṃ ca viṣṇo mamājñayā

etanmāheśvaraṃ liṃgaṃ yo'sya cāṃte gamiṣyati //
sa jyeṣṭhaḥ sa vibhuḥ karttā yuvayornātra saṃśayaḥ

adhobhāgaṃ vrajatveka ekaścorddhvaṃ mamājñayā //
tacchrutvā satvaro brahmā vyomamārgaṃ samāśritaḥ

vidārya vasudhāṃ kṛṣṇo'pyadhastātsatvaraṃ gataḥ //
sa bhittvā saptapātālānadho yāvatprayāti ca //
tāvatkālāgnirudrastu dṛṣṭastena mahātmanā

gaṃtumicchaṃstato'dhastādyāvadvegaṃ karoti saḥ //
tāvattasyārcibhirdagdhaḥ kṛṣṇatvaṃ samapadyata

tato mūrchābhisaṃtapto dahyamāno'dbhutāgninā //
nivartya sahasā viṣṇurvailakṣyaṃ paramaṃ gataḥ

tathā liṃgaṃ samāsādya bhaktyā pūjā kṛtā tataḥ //
vedoktaiḥ paramaiḥ sūkṣmaiḥ stutiṃ cakre mahīpate

brahmā'pi vyomamārgeṇa gato haṃsavimānataḥ //
divyaṃ varṣasahasraṃ tu tasyāṃtaṃ nābhyapadyata

tato varṣasahasrāṃte ketakīṃ so'pyapaśyata //
āyāṃtīṃ vyomamārgeṇa tayā pṛṣṭaścaturmukhaḥ

kva tvayā gamyate brahmannirālaṃbe mahāpathi //
śūnye tattvaṃ samācakṣva paraṃ kautūhalaṃ hi me

// brahmovāca // //
mama spardhā samutpannā viṣṇunā saha śobhane //
liṃgasyāsya hi paryaṃtaṃ yo labhiṣyati cāvayoḥ

sa jyāyānitaro hīno hyetaduktaṃ pinākinā //
prasthito'haṃ tataścorddhvamadhomārgaṃ gato hariḥ

labdhvā liṃgasya paryaṃtaṃ yāsyāmi kṣitimaṃḍale //
tasya tadvacanaṃ śrutvā tatpuṣpamabhyabhāṣata

vyarthaśramo'si lokeśa nāṃto liṃgasya vidyate //
caturyugasahasrāṇāṃ koṭirekā pitāmaha

liṃgamūrdhnaḥ pataṃtyā me kālo jāto mahādyute //
tathāpi kṣiti pṛṣṭhaṃ tu na prāptāsmi kathaṃcana

yāvatkālena haṃsaste yojanaṃ saṃpragacchati //
tāvatkālena gacchāmi yojanānāmahaṃ śatam

tasmānnivartanaṃ yuktaṃ mama vākyena te vibho //
darśayitvā ca māṃ viṣṇorjyeṣṭhatvaṃ vraja sāṃpratam

tato hṛṣṭamanā bhūtvā gṛhītvā tāṃ caturmukhaḥ //
punarvarṣasahasrāṃte bhūmipṛṣṭhamupāgataḥ //
darśayāmāsa tāṃ viṣṇoreṣā liṃgasya mūrdhataḥ

mayā''nītā śubhā mālā labdhaścāṃtaṃ caturbhuja //
tvayā labdho na cāsatyaṃ vada me puruṣottama

// viṣṇuruvāca // //
anaṃtasyāprameyasya devadevasya śūlinaḥ //
nāhaṃ śaktaḥ paraṃ pāraṃ gaṃtuṃ brahmankathaṃcana

yadi tvayā'sya paryaṃto labdho brahmankathaṃcana //
tatte tuṣṭiṃ gato nūnaṃ devadevo maheśvaraḥ

nānyathā cāsya paryaṃto dṛśyate kena citkvacit //
tasmājjyeṣṭho bhavāñchreṣṭhaḥ kaniṣṭho'hamasaṃśayam

// pulastya uvāca // //
etasminneva kāle tu bhagavānvṛṣabhadhvajaḥ //
kopaṃ cakre mahārāja brahmāṇaṃ prati tatkṣaṇāt

athāha darśanaṃ gatvā dhigdhigvyarthaprajalpaka //
mithyā prajalpamānena kimidaṃ sāhasaṃ kṛtam //

yasmāttvayā mṛṣā proktaṃ mama paryaṃtadarśanam //
tasmāttvaṃ sarvavarṇānāṃ pūjārho na bhaviṣyasi

ye ca tvāṃ pūjayiṣyaṃti mānavā moha saṃyutāḥ //
te kṛcchraṃ paramaṃ prāpya nāśaṃ yāsyaṃti kṛtsnaśaḥ

ketakyā ca tathā proktaṃ yasmāttasmātsuduṣṭayā //
asyā hi sparśanāllokaḥ śvapākatvaṃ prayāsyati

evaṃ śāpo tayordattvā devaḥ provāca keśavam //
prasannavadano bhūtvā tadā tuṣṭo maheśvaraḥ

// bhagavānuvāca // //
vāsudeva mahābāho tuṣṭaste'haṃ mahāmate//
satyasaṃbhāṣaṇādeva varaṃ varaya suvrata

// śrīvāsudeva uvāca// //
eṣa eva varaḥ ślāghyo yattvaṃ tuṣṭo maheśvaraḥ //
na cāpuṇyavatāṃ deva tvaṃ tuṣṭimadhigacchasi //
avaśyaṃ yadi me deyo varo deveśvara tvayā

liṃgametadanaṃtākhyaṃ laghutāṃ naya mā ciram//
yena sṛṣṭirbhavelloke vyāptaṃ viśvamanena tu

// pulastya uvāca // //
tataḥ saṃkṣipya talliṃgaṃ laghu kṛtvā maheśvaraḥ //
abravītkeśavaṃ bhūyaḥ śṛṇu vākyamidaṃ hare

etanmedhyatame deśe liṃgaṃ sthāpaya me hare //
pūjaya tvaṃ vidhānena paraṃ śreyaḥ prapatsyase

mama tejovinirdagdhaḥ kṛṣṇatvaṃ hi yato gataḥ //
kṛṣṇa eva tato nāma loke khyātiṃ gamiṣyati

kṛṣṇakṛṣṇeti te nāma prātarutthāya mānavaḥ //
kīrtayiṣyati yo bhaktyā sa yāti paramāṃ gatim

// pulastya uvāca // //
evamuktvā tamīśānastatraivāṃtaradhīyata //
vāsudevo'pi talliṃgaṃ gṛhītvā'rbudaparvate //
nirjhare sthāpayāmāsa supuṇye vimalodake

kṛṣṇatīrthaṃ tato jātaṃ nāmnā hi dharaṇītale //
śṛṇu pārthivaśārdūla tatra snātasya yatphalam

snātvā kṛṣṇahrade puṇye talliṃgaṃ paśyate tu yaḥ //
sarvatīrthodbhavaṃ śreyaḥ sa marttyo labhate'khilam

tathā ca sarvadānānāṃ niṣkāmaḥ prāpnuyātphalam //
sakāmo'pi phalaṃ ceṣṭaṃ yadyapi syātsudurllabham

tasmātsarvaprayatnena snānaṃ tatra samācaret //
ya icchecchāśvataṃ śreyo nātra kāryā vicāraṇā

ekādaśyāṃ mahārāja nirāhāro jitendriyaḥ //
yastatra jāgaraṃ kṛtvā liṃgasyāgre subhaktitaḥ

prabhāte kurute śrāddhaṃ yastu śraddhāsamanvitaḥ //
pitṛnsaṃtārayetsarvānpūrvajaiḥ saha dharmavit

tilānkṛṣṇānnarastatra brāhmaṇebhyo dadāti yaḥ //
brahmahatyādibhiḥ pāpaiḥ sa marttyo mucyate dhruvam //

darśanādeva rājendra kṛṣṇatīrthasya mānavaḥ //
mucyate sarvapāpebhyo nātra kāryā vicāraṇā

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe kṛṣṇatīrthamāhātmyavarṇanaṃnāma catustriṃśo'dhyāyaḥ