Skanda Purana · Chapter 7.33

// pulastya uvāca // //
tataḥ pārtheśvaraṃ gacchedevaṃ pātakanāśanam //
yaṃ dṛṣṭvā mānavaḥ samyaṅmucyate sarvapātakaiḥ

pārthānāmnyabhavatsādhvī devalasya priyā satī //
tayā pūrvaṃ tapastaptaṃ tatra sthāne mahīpate

sā pūrvamabhavadvaṃdhyā ṛṣipatnī yaśasvinī //
vairāgyaṃ paramaṃ gatvā tataścaivārbudaṃ gatā

vāyubhakṣā nirāhārā samacittā''sane sthitā //
tato varṣasahasrāṃte bhaktyā tasyā mahīpate //

udbhidya dharaṇīpṛṣṭhaṃ sahasā liṃgamutthitam //
etasminneva kāle tu vāguvācāśarīriṇī

pūjayaitanmahābhāge śivaliṃgaṃ supāvanam //
tvadbhaktyā dharaṇīpṛṣṭhānniḥsṛtaṃ kāmadaṃ mahat

yo yaṃ kāmamabhidhyāyanpūjayiṣyati mānavaḥ //
anyopi tadabhipretaṃ prāpsyate nātra saṃśayaḥ //

pārtheśvarākhyametaddhi loke khyātiṃ gamiṣyati //
evamuktvā tato vāṇī virarāma mahīpate

tataḥ sā vismayāviṣṭā pūjayāmāsa tattadā //
tataḥ putraśataṃ prāptaṃ divyaṃ vaṃśadharaṃ tathā

tataḥ prabhṛti talliṃgaṃ vikhyātaṃ dharaṇītale //
tatrāsti nirmalaṃ toyaṃ girigahvaraniḥsṛtam

tatra snātvā naraḥ samyagyastaṃ paśyati bhāvataḥ //
na sa paśyati saṃsāre duḥkhaṃ saṃtānasaṃbhavam

śuklapakṣe caturddaśyāṃ jāgaraṃ tasya cāgrataḥ //
yaḥ karoti nirāhāraḥ sa putraṃ labhate dhuvam

piṃḍanirvāpaṇaṃ tatra yaḥ karoti samāhitaḥ //
tasya putratvamāyāti pitarastatprasādataḥ //

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe pārtheśvaramāhātmyavarṇanaṃnāma trayastriṃśo'dhyāyaḥ