Skanda Purana · Verses 7.31-3

// devyuvāca // //
sakārapaṃcakaṃ proktaṃ yattvayā mama śaṃkara //
kathaṃ tadatra saṃvṛttametanme saṃśayaṃ mahat

kathaṃ vātra samāyātā kutaścāpi sarasvatī //
kathaṃ sa vāḍavo jātaḥ kasminkāle kathaṃ hyabhūt //
tatsarvaṃ vistareṇedaṃ yathāvadvaktumarhasi

// īśvara uvāca // //
śṛṇu devi yathā jātā tasminkṣetre sarasvatī //
yataścaiva samudbhūtā sarvapāpapraṇāśinī

hiraṇyā vajriṇī nyaṃkuḥ kapilā ca sarasvatī

ṛṣibhiḥ pañcabhiścātra samāhūtā yathā purā //
vāḍavenāgninā yuktā yathā jātā śṛṇuṣva tat

purā devāsure yuddhe nivṛtte somakāraṇāt //
pitāmahasya vacanāttārāṃ candraḥ samarpayat

tato yātāḥ surāḥ svargaṃ paśyanto'dhomukhā mahīm //
dadṛśuste tato devā bhūmyāṃ svargamivāparam

āśramaṃ munimukhyasya dadhīcerloka viśrutam //
sarvarttukusumopetaṃ pādapairupaśobhitam //
ketakīkuṭajodbhūta bakulāmodamoditam

evaṃvidhaṃ samāsādya tadāśramapadaṃ guru //
kautukāddraṣṭumārabdhāḥ sarve devā manoramam

te ca tīrthāśrame tasminyānānyutsṛjya saṃyatāḥ //
pravṛttāstamṛṣiṃ draṣṭuṃ prākṛtāḥ puruṣā yathā

dṛṣṭavaṃtaḥ surāḥ sarve pitāmahamivāparam //
tatasta ṛṣiṇā sarve pādyārghyādibhirarccitāḥ

yathoktamāsanaṃ bhejuḥ sarve devāḥ savāsavāḥ //
teṣāṃ madhye samutthāya śakraḥ provāca taṃ munim

āyudhāni vimucyāgre bhavāngṛhṇātvimāni hi //
tanniśamya vacaḥ prāha dadhīciḥ pākaśāsanam

muktāstrāṇi mamābhyāśe yūyaṃ yāta triviṣṭapam //
taṃ śakraḥ prāha caitāni kāryakāle hyupasthite

deyāni te punaḥ śatrūnabhijeṣyāmahe raṇe //
punaḥpunastataḥ śakraḥ saṃdiśya munisattamam

asmākameva deyāni na cānyasya tvayā mune//
bāḍhamityudite śakramuktavānmunisattamaḥ

dāsyāmi te samastāni yuddhakāle viśeṣataḥ//
nāsya mithyā bhavedvākyamiti matvā śacīpatiḥ//
muktvāstrāṇi tadabhyāśe punaḥ svargaṃ gatastadā

astrārpaṇaṃ yaḥ prayataḥ prayatnācchṛṇoti rājā bhuvi bhāvitātātmā //
so'bhyeti yuddhe vijayaṃ paraṃ hi sutāṃśca dharmārthayaśobhirāmāḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhā sakhaṇḍe prathame prabhāsakṣetramāhātmye vaḍavānalotpattivṛttānte dadhīcimaharṣaye sarvadevakṛtasvasvaśastrasamarpaṇavarṇanaṃnāmaikatriṃśodhyāyaḥ