Skanda Purana · Verses 7.31-2

// prahlāda uvāca/// //
divyasvaprabhayā dhvāṃtaṃ bhūtānāṃ nāśayansadā //
janayanparamānaṃdaṃ bhaktānāṃ ca bhayāpahaḥ

patākābhirdhvajasthābhirdvārakājayavarddhanaḥ //
divyapuṇyaprakāśena rājate girirāḍiva

dṛṣṭvā''layaṃ tadā viṣṇostadāyudhavibhūṣitam//
vihāya pāduke cchatraṃ daṇḍavatpatitā bhuvi

bhūmisaṃluṭhanaṃ teṣāṃ tīrthānāmadbhutaṃ mahat //
abhavadvipra śārdūlāḥ kṣetrādīnāṃ ca sarvaśaḥ

vārāṇasī kurukṣetraṃ prayāgo jāhnavī tathā //
yamunā narmadā puṇyā puṇyā prācī sarasvatī

godāvarī mahāpuṇyā gayā tisrastu maṃgalāḥ //
śāligrāmaṃ mahākṣetraṃ puṇyā cakranadī śubhā

payoṣṇī tapatī kṛṣṇā kāveryyādyāḥ supuṇyadāḥ //
puṣkarādīni tīrthāni sāgarāḥ parvatottamāḥ

ayodhyā mathurā māyā avaṃtyādyāśca muktidāḥ //
śrīraṃgākhyamanaṃtaṃ ca prabhāsaṃ ca viśeṣataḥ

puruṣottamaṃ mahākṣetramaraṇyānyādayaḥ śubhāḥ //
trailokye varttamānāni sarvatīrthāni sarvaśaḥ

dṛṣṭvā kṛṣṇālayaṃ puṇyaṃ muhurmuhuḥ praharṣitāḥ //
jaya śabdairnamaḥśabdairgarjaṃto harināmabhiḥ

ānaṃdāśrūṇi muṃcaṃtaḥ premṇā gadgadayā girā //
stuvaṃti munayaḥ sarve tīrthādīni ca sarvaśaḥ

atha saṃstuvatāṃ teṣāmanyonyaṃ muditātmanām //
vīkṣya vaktrāṇi sarveṣāṃ maharṣirnārado'bravīt

// śrīnārada uvāca // //
rāśayaḥ puṇya puṃjānāṃ kṛtā yuṣmābhiruttamāḥ //
tajjanmanā sahasraistu yaddṛṣṭaṃ kṛṣṇamaṃdiram

darśanaṃ kṛṣṇadevasya dvārakāgamane matiḥ //
dṛḍhabhaktirmahāviṣṇornālpasya tapasaḥ phalam

dhanyā vai pūrvajāsteṣāṃ vaṃśajāḥ kṛṣṇadarśanaṃ //
sotsavā dvārakāṃ yāṃti paśyaṃti ca haripriyām

dhanyeyaṃ gautamī gaṃgā gautamo'yaṃ mahātapāḥ //
yatprasādena sarveṣāṃ kalyāṇaṃ samupasthitam

yajñādhyayanadānānāṃ tapovratasamādhinām//
saṃprāptaphalamasmābhiryuṣmābhiḥ sarvatīrthakāḥ

yūyaṃ sarvāṇi tīrthāni kṣetrāṇi caiva kṛtsnaśaḥ //
kṛṣṇājñayā sarvakālaṃ tiṣṭhadhvaṃ sarvadaivataiḥ //

vasaṃti ye'tra te dhanyā ekāhamapi pāvanāḥ //
paśyaṃtu sumahābhāgā godāvaryyatra jāhnavī

iyaṃ ca śobhate puṇyā dvārakā kṛṣṇa vallabhā //
prapaśyaṃtu mahābhāgāstathā vārāṇasīṃ śubhām

kṣetrāṇi kurumukhyāni paśyaṃtu dvārakāṃ prabhoḥ //
tādṛśī mathurā kāśī māyā'dhyodhyā ca rājate

avantī na ca kāṃcī ca kṣetraṃ ca puruṣottamam //
sūryoparāgakāle'pi kurukṣetraṃ na rājate

īdṛśaṃ na gayātīrthaṃ yādṛgetatprakāśate

grahanakṣatratārāṇāṃ yathā sūryyo virājate //
sakṣetratīrtharājānāṃ dvārakārko virājate

// prahlāda uvāca // //
niśamya nāradenoktaṃ prahṛṣṭāśca tathā dvijāḥ //
kṣetrāṇi sarvatīrthāni puraskṛtya ca gautamam

vihāya gautamīṃ tatra prayayurhyagratogrataḥ //
prahṛṣṭā gautamī tatra praṇamya tvaritā yayau

gītavādyaiśca nṛtyaiśca patākābhiḥ samaṃtataḥ //
prayayuḥ stotrapāṭhaiśca sarve te dvārakāśraye

sa tīrthānyagrataḥ kṛtvā madhye kṛtvā tu śobhanam //
prayāgaṃ tīrtharājaṃ ca prahṛṣṭaṃ kṣetradarśanāt

tataḥ paścātsaritsnānaṃ cakāra ṛṣisattamaḥ //
jāhnavī gautamī revā yamunāprāksarasvatī

sarayūrgaṃḍakī tāpī payoṣṇī yamunā tathā //
kṛṣṇā bhīmarathī gaṃgā kāverī cāghanāśinī //

maṃdākinī mahāpuṇyā puṇyā bhogavatī nadī //
vrajaṃti yugapatsarvāḥ paśyaṃtyo dvārakāṃ purīm

tataste sāgarāḥ sapta svaiḥsvaistīrthaiḥ samanvitāḥ //
tataḥ paścādaraṇyānyāśramaiḥ puṇyaiyutāni ca

tatastu parvatā ramyā mervādyāstu suśobhanāḥ //
nṛtyaṃto gāyamānāśca stavādyaistu maharṣibhiḥ

tataśca ṛṣayo devāḥ samaṃtāddhṛṣṭamānasāḥ //
gāyaṃto nṛtyamānāśca garjaṃto harināmabhiḥ

vāditraninadairuccairjayaśabdaiḥ praharṣitāḥ //
prāptāste gomatītīraṃ sarvayajñasamanvitāḥ //
vavaṃdire mahāpuṇyāḥ sarve te hṛṣṭamānasāḥ

// śrīnārada uvāca // //
he bhāgīrathi he reve yamune śṛṇu gautami //
śreṣṭhā śrīgomatīdevī vikhyātā bhuvanatraye

yasyāḥ sakṛjjalasnānaṃ sparddhate brahmavidyayā //
tena vai gomatī seyaṃ sarvatīrthottamottamā //
brahmajñānena mucyaṃte prayāgamaraṇena vā //
snānamātreṇa gomatyāṃ mucyate pūrvajaiḥ saha

// prahlāda uvāca // //
niśamya tāni tīrthāni māhātmyaṃ mahadadbhutam //
gomatyāḥ śraddhayā snātvā utsavairagrato yayuḥ

tataḥ kṣetrāṇi tīrthāni saritaḥ sāgarādayaḥ //
dadṛśurdvārakāṃ ramyāmāgatā dvāramaṇḍape

sthitāṃ siṃhāsane divye maṇikāṃcanabhūṣite //
sundarāṃ śukla varṇāṃ ca rudrādityasamaprabhām

divyavastrāṃ sugaṃdhāḍhyāṃ ratnābharaṇabhūṣitām //
kirīṭakuṇḍalairdivyaiḥ śobhitāṃ kaṃkaṇādibhiḥ

varadābhayahastāṃ ca śaṃkhacakragadāyudhām//
śvetātapatraśobhāḍhyāṃ cāmaravyajanādibhiḥ

saṃstavaiḥ stūyamānāṃ ca gītavādyādiharṣitām //
mahāsiṃhāsanasthāṃ tu dṛṣṭvā dvāravatīṃ purīm//
praṇemuryugapatsarve sarvāṇi ca subhaktitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye mūrtimatīdvāravatīdarśanavarṇanaṃnāmaikatriṃśattamo'dhyāyaḥ