સ્કંદ પુરાણ · શ્લોક 7.31-3

॥ દેવ્યુવાચ ॥ ॥
સકારપંચકં પ્રોક્તં યત્ત્વયા મમ શંકર ॥
કથં તદત્ર સંવૃત્તમેતન્મે સંશયં મહત્

કથં વાત્ર સમાયાતા કુતશ્ચાપિ સરસ્વતી ॥
કથં સ વાડવો જાતઃ કસ્મિન્કાલે કથં હ્યભૂત્ ॥
તત્સર્વં વિસ્તરેણેદં યથાવદ્વક્તુમર્હસિ

॥ ઈશ્વર ઉવાચ ॥ ॥
શૃણુ દેવિ યથા જાતા તસ્મિન્ક્ષેત્રે સરસ્વતી ॥
યતશ્ચૈવ સમુદ્ભૂતા સર્વપાપપ્રણાશિની

હિરણ્યા વજ્રિણી ન્યંકુઃ કપિલા ચ સરસ્વતી

ઋષિભિઃ પઞ્ચભિશ્ચાત્ર સમાહૂતા યથા પુરા ॥
વાડવેનાગ્નિના યુક્તા યથા જાતા શૃણુષ્વ તત્

પુરા દેવાસુરે યુદ્ધે નિવૃત્તે સોમકારણાત્ ॥
પિતામહસ્ય વચનાત્તારાં ચન્દ્રઃ સમર્પયત્

તતો યાતાઃ સુરાઃ સ્વર્ગં પશ્યન્તોઽધોમુખા મહીમ્ ॥
દદૃશુસ્તે તતો દેવા ભૂમ્યાં સ્વર્ગમિવાપરમ્

આશ્રમં મુનિમુખ્યસ્ય દધીચેર્લોક વિશ્રુતમ્ ॥
સર્વર્ત્તુકુસુમોપેતં પાદપૈરુપશોભિતમ્ ॥
કેતકીકુટજોદ્ભૂત બકુલામોદમોદિતમ્

એવંવિધં સમાસાદ્ય તદાશ્રમપદં ગુરુ ॥
કૌતુકાદ્દ્રષ્ટુમારબ્ધાઃ સર્વે દેવા મનોરમમ્

તે ચ તીર્થાશ્રમે તસ્મિન્યાનાન્યુત્સૃજ્ય સંયતાઃ ॥
પ્રવૃત્તાસ્તમૃષિં દ્રષ્ટું પ્રાકૃતાઃ પુરુષા યથા

દૃષ્ટવંતઃ સુરાઃ સર્વે પિતામહમિવાપરમ્ ॥
તતસ્ત ઋષિણા સર્વે પાદ્યાર્ઘ્યાદિભિરર્ચ્ચિતાઃ

યથોક્તમાસનં ભેજુઃ સર્વે દેવાઃ સવાસવાઃ ॥
તેષાં મધ્યે સમુત્થાય શક્રઃ પ્રોવાચ તં મુનિમ્

આયુધાનિ વિમુચ્યાગ્રે ભવાન્ગૃહ્ણાત્વિમાનિ હિ ॥
તન્નિશમ્ય વચઃ પ્રાહ દધીચિઃ પાકશાસનમ્

મુક્તાસ્ત્રાણિ મમાભ્યાશે યૂયં યાત ત્રિવિષ્ટપમ્ ॥
તં શક્રઃ પ્રાહ ચૈતાનિ કાર્યકાલે હ્યુપસ્થિતે

દેયાનિ તે પુનઃ શત્રૂનભિજેષ્યામહે રણે ॥
પુનઃપુનસ્તતઃ શક્રઃ સંદિશ્ય મુનિસત્તમમ્

અસ્માકમેવ દેયાનિ ન ચાન્યસ્ય ત્વયા મુને॥
બાઢમિત્યુદિતે શક્રમુક્તવાન્મુનિસત્તમઃ

દાસ્યામિ તે સમસ્તાનિ યુદ્ધકાલે વિશેષતઃ॥
નાસ્ય મિથ્યા ભવેદ્વાક્યમિતિ મત્વા શચીપતિઃ॥
મુક્ત્વાસ્ત્રાણિ તદભ્યાશે પુનઃ સ્વર્ગં ગતસ્તદા

અસ્ત્રાર્પણં યઃ પ્રયતઃ પ્રયત્નાચ્છૃણોતિ રાજા ભુવિ ભાવિતાતાત્મા ॥
સોઽભ્યેતિ યુદ્ધે વિજયં પરં હિ સુતાંશ્ચ ધર્માર્થયશોભિરામાઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભા સખણ્ડે પ્રથમે પ્રભાસક્ષેત્રમાહાત્મ્યે વડવાનલોત્પત્તિવૃત્તાન્તે દધીચિમહર્ષયે સર્વદેવકૃતસ્વસ્વશસ્ત્રસમર્પણવર્ણનંનામૈકત્રિંશોધ્યાયઃ