Skanda Purana · Chapter 7.31

// pulastya uvāca // //
raktānubandhaṃ vai gacchettīrthaṃ trailokyaviśrutam //
yatra snāto naraḥ samyaṅmucyate brahmahatyayā

purā''sītpārthivonāma iṃdraseno mahīpatiḥ //
tasyā''sītsupriyā bhāryā sunandānāma bhāminī //
pativratā patiprāṇā sadā patyuḥ priye sthitā

kasyacittvatha kālasya sa rājā saparigrahaḥ //
paradeśaṃ gato haṃtuṃ śatrusaṃghaṃ durāsadam

taṃ nihatya dhanaṃ bhūri gṛhītvā prasthito gṛham //
tato'gre preṣayāmāsa sa dūtaṃ kṛtrimaṃ nṛpa

sunandāṃ brūhi gatvā tvamindraseno hato raṇe //
tadākārastato lakṣyaḥ pātivratye mamājñayā

yadi sā niścayaṃ gacchenmaraṇaṃ prati bhāminī //
tadā rakṣyā prayatnena vācyaṃ hāsyaṃ mamodbhavam

evamukto gato dūtastatkṣaṇānnṛpasattama //
tasyai nivedadāmāsa yaduktaṃ tena bhūbhujā

atha tasya vacaḥ śrutvā sunaṃdā cāruhāsinī //
gataprāṇā nṛpaśreṣṭha patiprāṇā mahāsatī

yasminkāle mṛtā sā tu sunandā śīlamaṃḍanā //
tasminkāle nṛpaḥ so'pi tatpāpena samāśritaḥ

athāpaśyaddvitīyāṃ sa cchāyāṃ gātrasya copari //
tathā gurutaraṃ kāyaṃ sālasyaṃ samapadyata

tejohīnaṃ sudurgaṃdhi vivarṇaṃ nṛpasattama //
atha prāpto gṛhaṃ rājā śrutvā bhāryāsamudbhavam

vināśaṃ duḥkhaśokārtaḥ karuṇaṃ paryadevayat//
sa jñātvā pāpamātmānaṃ strīhatyāsuvidūṣitam

brāhmaṇānāṃ samādeśāttathā yātrāparo'bhavat //
kṛtvaurddhvadaihikaṃ tasyā laghumātra parigrahaḥ //
vārāṇasyāṃ gataḥ pūrvaṃ tatra dānaṃ dadau bahu

kapālamocane tīrthe sarvapāpapraṇāśane //
trinetro yatra nirmuktaḥ purā vai brahmahatyayā

tasya cchāyā dvitīyā sā na naṣṭā tatra bhūpate //
tataḥ kanakhalaṃ prāptaḥ supuṇyaṃ śuddhidaṃ nṛṇām

tathaiva puṣkarāraṇyaṃ tasmādamarakaṇṭakam //
kurukṣetraṃ tato rājanprāpto'sau nṛpasattamaḥ

prabhāsaṃ somatīrthaṃ ca tatastu kṛmijāṃgale //
ekahaṃsaṃ tato rājanpuṇyapāriplavaṃ tataḥ

rudrakoṭiṃ virūpākṣaṃ tataḥ paṃcanadaṃ nṛpa //
evamādīni tīrthāni puṇyānyāyatanāni ca //
paribhramanmahīpāla pariśrāṃto narādhipaḥ

tato varṣasahasrāṃte saṃprāpto'rbudaparvate //
tatrāpaśyannarapatistīrthānyāyatanāni ca

tapasvisaṃghānvividhānbrāhmaṇānvedapāragān //
dadau dānāni bahuśo brāhmaṇebhyo yadṛcchayā

prāpto raktānubaṃdhaṃ ca tīrthaṃ tatraiva parvate //
tatra snāto viniṣkrāṃto yāvatpaśyati bhūmipaḥ

tāvanna dṛśyate cchāyā dvitīyā strīvadhodbhavā //
laghutvaṃ sarvagātrāṇi saṃprāptāni mahīpate

vigandhatā praṇaṣṭā ca tejovṛddhiḥ parābhavat //
tato hṛṣṭamanā bhūtvā dattvā dānāni bhūriśaḥ //
stūyamānaścaturdikṣu baṃdibhiḥ prasthito gṛham

tato raktānubaṃdhasya somātikramaṇaṃ nṛpa //
yāvatkaroti rājendra tāvadasya punastathā

sā cchāyā dṛśyate dehe dvitīyā nṛpasattama //
sa eva gandho gātreṣu tejohāniśca sā nṛpa

tato duḥkhābhisaṃtapto gatastatraiva tatkṣaṇāt //
raktabaṃdhamanuprāpto vipāpmā so'bhavatpunaḥ

sa jñātvā tīrthamāhātmyaṃ paraṃ pārthivasattamaḥ //
tatra dārūṇi cāhṛtya citāṃ kṛtvā tato nṛpa //
dānaṃ dattvā dvijāgrebhyaḥ praviṣṭo havyavāhanam

tato vimānamāruhya parityajya kalevaram //
divyamālyāṃbaradharaḥ śivalokamupāgamat

śivalokamanuprāpte tasminpārthivasattame //
devarṣayastadā vākyamidamāhuḥ suvismayāt

tīrthebhyastu paraṃ tīrthamidaṃ vai pāvanaṃ param //
indraseno hyataḥ pāpāttīrthasaṃgādvyamucyata

tataḥ prabhṛti tattīrthaṃ khyātaṃ ca dharaṇītale //
raktānāṃ prāṇināṃ yasmādanubandhaṃ karoti yat

raktānubandhamityeva tasmāttatkīrttyate kṣitau //
tatra santarpya vai devānyaḥ śrāddhaṃ kurute nṛpa

tatra saṃkramaṇe bhānoryaḥ snānaṃ kurute naraḥ //
śraddhayā parayā yukto mucyate brahmahatyayā

pitṛkṣetre gayāyāṃ ca śrāddhaṃ yaḥ kurute naraḥ //
gayāśrāddhasamaṃ prāhuḥ phalaṃ tasya maharṣayaḥ

candrasūryoparāge vā godānaṃ nṛpasattama //
yaḥ karoti narastatra sa kulānsapta tārayet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe raktānubandhamāhātmyavarṇanaṃnāmaikatriṃśo'dhyāyaḥ //