Skanda Purana · Verses 7.30-3

// devyuvāca // //
snātvā tatrāgnitīrtheṣu kaṃ devaṃ pūrvamarccayet //
nirvighnā jāyate yena yātrā nṛṇāṃ sureśvara //
tanme yātrāvidhānaṃ tu yathāvadvaktumarhasi

// īśvara uvāca // //
evaṃ snātvā vidhānena dattvārghyaṃ ca mahodadhau //
saṃpūjya gaṃdhapuṣpaiśca vastraiḥ puṣpāvalepanaiḥ

hiraṇmayaṃ yathāśaktyā prakṣipettatra kaṃkaṇam //
tataḥ pitṝṃstarpayitvā gaccheddevaṃ kapardinam

puṣpairdhūpaistathā gandhairvastraiḥ saṃpūjya bhaktitaḥ //
gaṇānāṃ tveti mantreṇa arghyaṃ cāsmai nivedayet

śūdrāṇāmatha deveśi maṃtraścāṣṭākṣaraḥ smṛtaḥ //
tatra someśvaraṃ gaccheddevaṃ pāpaharaṃ param

snāpayitvā vidhānena japecca śatarudriyam //
tathā rudrānsapañcāṃgāstathānyā rudrasaṃhitāḥ

snāpayetpayasā caiva dadhnā ghṛtayutena ca //
madhunekṣurasenaiva kuṃkumena vilepayet

karpūrośīramiśreṇa mṛganābhiyutena ca //
candanena sugandhena pūjyaṃ saṃpūjayettataḥ

dhūpairbahuvidhairdevaṃ dhūpayitvā yathāvidhi //
vastraiḥ saṃveṣṭayetpaścāddadyānnaivedyamuttamam

ārārtikaṃ tataḥ kṛtvā nṛtyaṃ kuryādyathecchayā //
aṣṭāṃgaṃ praṇipatyaivaṃ gītavādyādikaṃ tataḥ

dharmaśravaṇasaṃyuktaṃ kāryaṃ prekṣaṇakaṃ vibhoḥ //
tato dadyāddvijātibhyastapasvibhyaśca śaktitaḥ

dīnāṃdhakṛpaṇebhyaśca dānaṃ kārpaṭikeṣu ca //
vṛṣabhastatra dātavyaḥ pravṛtte krūrakarmaṇi //
upavāsaṃ tataḥ kuryāttasminnahani bhāmini

yasminnahani paśyeta devaṃ someśvaraṃ naraḥ //
sā tithirvarṣamekaṃ tu upoṣyā bhaktitatparaiḥ

evaṃ kṛtvā naro bhaktyā labhate janmanaḥ phalam //
tathā ca sarvatīrthānāṃ sakalaṃ labhate phalam //

uddharetpitṛvargaṃ ca mātṛvargaṃ ca bhāmini //
bālye vayasi yatpāpaṃ vārdhakye yauvane'pi vā

kṣālayeccaiva tatsarvaṃ dṛṣṭvā someśvaraṃ naraḥ //
na duḥkhito na dāridro durbhago vā na jāyate

saptajanmāntareṇaiva dṛṣṭe someśvare vibhau //
dhanadhānyasamāyukte sphīte sañjāyate kule

bhaktirbhavati bhūyo'pi somanāthaṃ prati prabhum //
kṣīreṇa snapanaṃ pūrvaṃ tato dhārāsamudbhavam

prathame prathame yāme mahāsnā namataḥ param //
madhyāhne devadevasya ye prapaśyanti mānavāḥ //
saṃdhyāmārārtikaṃ bhūyo na jāyante ca mānuṣāḥ

matvā kaliyugaṃ raudraṃ bahupāpaṃ varānane //
nānyena tarate durgāṃ karmaṇā durgatiṃ naraḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetra māhātmye someśvaramāhātmye someśvarapūjāmāhātmyavarṇanaṃnāma triṃśodhyāyaḥ