સ્કંદ પુરાણ · શ્લોક 7.30-3

॥ દેવ્યુવાચ ॥ ॥
સ્નાત્વા તત્રાગ્નિતીર્થેષુ કં દેવં પૂર્વમર્ચ્ચયેત્ ॥
નિર્વિઘ્ના જાયતે યેન યાત્રા નૃણાં સુરેશ્વર ॥
તન્મે યાત્રાવિધાનં તુ યથાવદ્વક્તુમર્હસિ

॥ ઈશ્વર ઉવાચ ॥ ॥
એવં સ્નાત્વા વિધાનેન દત્ત્વાર્ઘ્યં ચ મહોદધૌ ॥
સંપૂજ્ય ગંધપુષ્પૈશ્ચ વસ્ત્રૈઃ પુષ્પાવલેપનૈઃ

હિરણ્મયં યથાશક્ત્યા પ્રક્ષિપેત્તત્ર કંકણમ્ ॥
તતઃ પિતૄંસ્તર્પયિત્વા ગચ્છેદ્દેવં કપર્દિનમ્

પુષ્પૈર્ધૂપૈસ્તથા ગન્ધૈર્વસ્ત્રૈઃ સંપૂજ્ય ભક્તિતઃ ॥
ગણાનાં ત્વેતિ મન્ત્રેણ અર્ઘ્યં ચાસ્મૈ નિવેદયેત્

શૂદ્રાણામથ દેવેશિ મંત્રશ્ચાષ્ટાક્ષરઃ સ્મૃતઃ ॥
તત્ર સોમેશ્વરં ગચ્છેદ્દેવં પાપહરં પરમ્

સ્નાપયિત્વા વિધાનેન જપેચ્ચ શતરુદ્રિયમ્ ॥
તથા રુદ્રાન્સપઞ્ચાંગાસ્તથાન્યા રુદ્રસંહિતાઃ

સ્નાપયેત્પયસા ચૈવ દધ્ના ઘૃતયુતેન ચ ॥
મધુનેક્ષુરસેનૈવ કુંકુમેન વિલેપયેત્

કર્પૂરોશીરમિશ્રેણ મૃગનાભિયુતેન ચ ॥
ચન્દનેન સુગન્ધેન પૂજ્યં સંપૂજયેત્તતઃ

ધૂપૈર્બહુવિધૈર્દેવં ધૂપયિત્વા યથાવિધિ ॥
વસ્ત્રૈઃ સંવેષ્ટયેત્પશ્ચાદ્દદ્યાન્નૈવેદ્યમુત્તમમ્

આરાર્તિકં તતઃ કૃત્વા નૃત્યં કુર્યાદ્યથેચ્છયા ॥
અષ્ટાંગં પ્રણિપત્યૈવં ગીતવાદ્યાદિકં તતઃ

ધર્મશ્રવણસંયુક્તં કાર્યં પ્રેક્ષણકં વિભોઃ ॥
તતો દદ્યાદ્દ્વિજાતિભ્યસ્તપસ્વિભ્યશ્ચ શક્તિતઃ

દીનાંધકૃપણેભ્યશ્ચ દાનં કાર્પટિકેષુ ચ ॥
વૃષભસ્તત્ર દાતવ્યઃ પ્રવૃત્તે ક્રૂરકર્મણિ ॥
ઉપવાસં તતઃ કુર્યાત્તસ્મિન્નહનિ ભામિનિ

યસ્મિન્નહનિ પશ્યેત દેવં સોમેશ્વરં નરઃ ॥
સા તિથિર્વર્ષમેકં તુ ઉપોષ્યા ભક્તિતત્પરૈઃ

એવં કૃત્વા નરો ભક્ત્યા લભતે જન્મનઃ ફલમ્ ॥
તથા ચ સર્વતીર્થાનાં સકલં લભતે ફલમ્ ॥

ઉદ્ધરેત્પિતૃવર્ગં ચ માતૃવર્ગં ચ ભામિનિ ॥
બાલ્યે વયસિ યત્પાપં વાર્ધક્યે યૌવનેઽપિ વા

ક્ષાલયેચ્ચૈવ તત્સર્વં દૃષ્ટ્વા સોમેશ્વરં નરઃ ॥
ન દુઃખિતો ન દારિદ્રો દુર્ભગો વા ન જાયતે

સપ્તજન્માન્તરેણૈવ દૃષ્ટે સોમેશ્વરે વિભૌ ॥
ધનધાન્યસમાયુક્તે સ્ફીતે સઞ્જાયતે કુલે

ભક્તિર્ભવતિ ભૂયોઽપિ સોમનાથં પ્રતિ પ્રભુમ્ ॥
ક્ષીરેણ સ્નપનં પૂર્વં તતો ધારાસમુદ્ભવમ્

પ્રથમે પ્રથમે યામે મહાસ્ના નમતઃ પરમ્ ॥
મધ્યાહ્ને દેવદેવસ્ય યે પ્રપશ્યન્તિ માનવાઃ ॥
સંધ્યામારાર્તિકં ભૂયો ન જાયન્તે ચ માનુષાઃ

મત્વા કલિયુગં રૌદ્રં બહુપાપં વરાનને ॥
નાન્યેન તરતે દુર્ગાં કર્મણા દુર્ગતિં નરઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્ર માહાત્મ્યે સોમેશ્વરમાહાત્મ્યે સોમેશ્વરપૂજામાહાત્મ્યવર્ણનંનામ ત્રિંશોધ્યાયઃ