Skanda Purana · Verses 7.30-2

// // śrīprahlāda uvāca // //
tadā teṣāṃ sutīrthānāṃ kṣetrāṇāmabhavanmudaḥ //
gantuṃ dvāravatīṃ puṇyāṃ sarveṣāmapi sarvaśaḥ

dvārakāgamane dṛṣṭvā tathā nāradagautamau //
mahotsavo mahāṃstatra bhaviṣyati manoharaḥ

tīrthānāṃ kṛṣṇayātrāyāṃ gantavyamityavo catuḥ //
atha te hyṛṣayo devāḥ sarvatīrthasamanvitāḥ

gautamīṃ tu puraskṛtya yayurdvāravatīṃ mudā //
tadā sarvāṇi tīrthāni kṣetrāraṇyāni kṛtsnaśaḥ //
dvārakāgamanaṃ cakruḥ sānandā ṛṣayaḥ surāḥ

śraddhayā parayā bhaktyā kṛṣṇadarśanalālasāḥ//
vīṇāninādatattvajñaṃ nāradaṃ pathi te' bruvan

// ṛṣaya ūcuḥ // //
rāśayaḥ puṇyapuñjānāṃ kṛtā vai tapasāṃ tathā //
yajñadānavratānāṃ ca tīrthānāṃ mahatāṃ bhuvi

saṃprāptastatprasādo'yaṃ yaddrakṣyāmaḥ kuśasthalīm //
pṛcchāmahe'dhunā tvāṃ vai yogināṃ paramaṃ gurum

dvārakāyāstu yātrāyāṃ ko vidhiḥ saṃprakīrtitaḥ //
niyamaḥ ko'tra karttavyo varjanīyaṃ ca kiṃ mune

śrotavyaṃ kīrtitavyaṃ ca smartavyaṃ kiṃ ca vai pathi //
utsavāścātra ke proktā dvārakāyāśca tatpathi///
ekaikaśca mahābhāga bhaktānandavivarddhanam //
etatsarvaṃ mahābhāga kṛpayā saṃprakīrtyatām

// śrīnārada uvāca // //
kṛtābhyaṃgastu pūrvedyuḥ saṃpūjya śraddhayā harim//
bhojayedvaiṣṇavānviprānsvaśaktyā saṃpraharṣitaḥ

anujñāto mahāviṣṇoḥ prasādamupayujya vai //
śayīta bhuvi suprīto dvārakāṃ kṛṣṇamānasaḥ

śvobhūte tu śuciḥ snātaḥ saṃpūjya jagadīśvaram //
pradakṣiṇaṃ namaskṛtya mahāviṣṇoranujñayā //
pṛṣṭvā kulavṛddhāṃśca brāhmaṇānvaiṣṇavānpriyān

tatastu tadanujñāto gītavāditrasaṃstavaiḥ //
yātrāraṃbhaṃ prakurvīta dvārakāyāṃ praharṣitaḥ

dvārakāṃ gacchamānastu śānto dāṃtaḥ śuciḥ sadā //
brahmacaryamadhaḥ śayyāṃ kurvīta niyatendriyaḥ

sahasranāmapaṭhanaṃ purāṇapaṭhanaṃ tathā //
karttavyaṃ sakṛpaṃ cittaṃ satāṃ śuśrūṣaṇaṃ tathā

annadānādikaṃ sarvaṃ vibhave sati mānavaḥ //
api svalpaṃ svaśaktyā vai kṛtaṃ koṭiguṇaṃ bhavet

pathi kṛṣṇasya yo bhaktyā grāsamekaṃ prayacchati //
dvīpāṃtā tena dattā bhūḥ puṇyasyānto na vidyate

kiṃ punardvārakākṣetre kṛṣṇasya ca samīpataḥ //
kalāvekekasikthe ca rājasūyāyutaṃ phalam

gayāśrāddhasahasrāṇi kṛtāni śatasaṃkhyayā //
annadānaṃ kṛtaṃ yaistu dvārakāpathi mānavaiḥ

auṣadhaṃ cānnapānīyaṃ pāduke kaṃbalaṃ tathā//
vāsāṃsyupānahau caiva vittaṃ ca vibhave sati //
varjayetsaṃkaraṃ vidvānyūthālāpāṃstathaiva ca

paranindāṃ ca paiśunyaṃ parasya parivañcanam //
parānnaṃ parapākaṃ ca sati vitte tyajedbudhaḥ

na doṣo hīnavittasya tāvanmātraparigrahe //
śrotavyā satkathā viṣṇornāmasaṃkīrttanāmṛtam

dvārakāpathigacchadbhiranyonyaṃ bhaktivarddhanam //
japtavyaṃ vaidikaṃ jāpyaṃ stotramāgamikaṃ tathā

yātrāyāṃ yatphalaṃ proktaṃ śrīkṛṣṇasya ca vai kalau //
na śakyate mayā vaktuṃ vadanairyugasaṃkhyayā

ityetatkathitaṃ sarvaṃ yatpṛṣṭaṃ tu dvijottamāḥ //
yatadhvaṃ tatprayatnena viṣṇuprāptau ca satvaram

// śrīprahlāda uvāca // //
evaṃ te nāradenoktā munayo hṛṣṭamānasāḥ //
cakruste sahitāḥ sarve kṛṣṇadevasya tatpathi

kecicchṛṇvanti tā viṣṇoḥ satkathā lokaviśrutāḥ //
yāsāṃ saṃśravaṇādeva bhagavānviśate hṛdi

kīrtyamānāni nāmāni mahāpuṇyapradāni vai //
pāvanāni sadā loke kalau viprā viśeṣataḥ

purāṇasaṃhitā divyā munibhiḥ parikīrtitāḥ //
prakāśayaṃti yā viṣṇormahimānaṃ sumaṃgalam

sadguṇāḥ karmavīryyāṇi kṛtāni viṣṇunā purā //
līlāvatārarūpaistu śṛṇvanti parayā mudā //

apare vāsudevasya caritāni sumaṃgalāḥ //
vadaṃti parayā bhaktyā sānandāḥ sāśrulocanāḥ

anye smaraṃti deveśamanādinidhanaṃ vibhum//
kecijjapaṃti munayaḥ stotrāṇi parayā mudā

kecittu śatanāmāni japanti munayaḥ pathi //
anye sahasranāmāni lakṣanāma tathā'pare

kecillaukikagītāni harināmāni harṣitāḥ //
utsavaiśca vrajaṃtyanye patākādivibhūṣitāḥ

gītavāditraghoṣeṇa karatālasvanena ca // //
nāsti dhanyatamastasmāttriṣu lokeṣu kaścana

darśanaṃ yasya saṃjātaṃ vaiṣṇavānāmanuttamam//
tathaiva jāhnavī puṇyā yamunā ca sarasvatī //

revādyāḥ saritaḥ sarvāḥ pracakrurgītanarttanam //
prayāgādīni tīrthāni sāgarāḥ parvatottamāḥ

vārāṇasī kurukṣetraṃ puṇyānyanyāni kṛtsnaśaḥ //
trailokye yāni tīrthāni kṣetrāṇi devanāyakāḥ //
cakrurgītaṃ ca nṛtyaṃ ca dvārakāyāśca satpathi

ekaikasminpade datte dvārakāpathi gacchatām //
puṇyaṃ kratusahasrāṇāṃ tatpādarajasaṃkhyayā

atha te munayaḥ sarve tīrthakṣetrādisaṃyutāḥ //
śrīmatkṛṣṇālayaṃ dūrāddadṛśurnāradādayaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye dvārakāṃ prati godāvaryāditīrthakṣetradeva maharṣigamanotsavayātrāvarṇanaṃnāma triṃśattamo'dhyāyaḥ