Skanda Purana · Verses 7.28-2

// mārkaṇḍeya uvāca // //
kṛtvā jāgaraṇaṃ viṣṇoryathānyāyaṃ nareśvara //
pitṝnyacchati puṇyaṃ ca tataḥ kiṃ kurute yamaḥ

bhukto vā yadi vā'bhuktaḥ svaccho vā'svaccha eva vā //
vimuktiḥ kathitā tatra harijāgaraṇānnṛṇām

asnāto vā naraḥ snāto jāgare samupasthite //
sarvatīrthāpluto jñeyastaṃ dṛṣṭvā divamāvrajet

śvapacā jāgaraṃ kṛtvā padaṃ nirvāṇamāgatāḥ //
kiṃ punarvarṇasaṃbhūtāḥ sadācāraparāstathā

yuvatīnādamākarṇya yathā nidrā na jāyate //
jāgare caivameva syāttatkathānāṃ ca kīrtane

brahmahatyā surāpānaṃ steyaṃ gurvaṃganāgamaḥ //
utkallanaṃ manaḥpāpaṃ śodhayedviṣṇu jāgaraḥ

vimuktiḥ kāmukasyoktā kiṃ punarvīkṣatāṃ harim

vācikaṃ mānasaṃ pāpaṃ karaṇairyadupārjitam//
anyairnimiṣamātreṇa vyapohati na saṃśayaḥ

goṣṭhyāṃ samāgatā ye tu teṣāṃ pāpaṃ kutaḥ smṛtam //
mātṛpūjā gayāśrāddhaṃ sutīrthagamanaṃ tathā //
jāgarasya nṛṇāṃ rājansamāni kavayo viduḥ

jananīpūjanaṃ bhūpa hyaśvamedhāyutaiḥ samam //
pūrṇaṃ varṣaśataṃ bhūpa kuśāgreṇoddhṛtaṃ jalam

pibanpātre dvijaḥ samyaktīrthe puṣkarasaṃjñite //
jāgarasyaiva caitāni kalāṃ nārhaṃti ṣoḍaśīm

kṛtvā kāṃcanasaṃpūrṇāṃ vasudhāṃ vasudhādhipa //
dattvā yatphalamāpnoti tatphalaṃ harijāgare

nikṛṃtanaṃ karmaṇaśca hyātmanā duṣkṛtaṃ kṛtam //
vyapohati na saṃdeho yena jāgaraṇaṃ kṛtam // //
saṃkṣepataḥ pravakṣyāmi punareva mahīpate //
jāgare padmanābhasya yatphalaṃ kavayo viduḥ

raverbiṃbamidaṃ bhittvā sa yogī harijāgare //
prayāti paramaṃ sthānaṃ yogigamyaṃ niraṃjanam //
sāṃkhyayogaiḥ suduḥkhena prāpyate yatpadaṃ hareḥ

nadyo nadā yathā yāṃti sāgare saṃsthitiṃ kramāt //
evaṃ jāgaraṇātsarve tatpade yāṃti saṃsthitim

merumaṃdaramānāni kṛtvā pāpāni vā naraḥ //
harijāgaraṇe tāni vyapohati na saṃśayaḥ

rājyaṃ svargaṃ tathā mokṣaṃ yaccānyadīpsitaṃ nṛṇām //
dadāti bhagavānkṛṣṇaḥ svagītairjāgare sthitaḥ

jāgareṇaiva pāpānāṃ śvapacānāṃ mahīpate //
tatpadaṃ kavibhiḥ proktaṃ kiṃ punastu dvijanmanām

japadhyānavihīnasya gāyakasyāpi bhūpate //
karmabhraṣṭasya ca prokto mokṣastu harijāgare

tannāsti triṣu lokeṣu puṇyaṃ puṇyavatāṃ nṛṇām //
yattu sādhayate bhūpa jāgare saṃvyavasthitaḥ

tvayā punaridaṃ kāryyaṃ smarttavyo garuḍadhvajaḥ //
ekādaśyāṃ na bhoktavyaṃ kartavyaṃ jāgaraṃ sadā

jāgare varttamānasya śvapacasya gatirbhavet //
kiṃpunarvarṇajātīnāṃ vaiṣṇavānāṃ mahīpate

ye tu jāgaraṇe nidrāṃ na yāṃti nṛpapuṃgava //
na teṣāṃ jananī yāti khedaṃ garbhāvadhāraṇāt

tasmājjāgaraṇaṃ kāryyaṃ māturjaṭharavarjibhiḥ //
bhītermokṣaparairmartyaiḥ sukhaceṣṭābahiṣkṛtaiḥ

yastu jāgaraṇaṃ rātrau kuryādbhaktisamanvitaḥ //
nimiṣenimiṣe rājannaśvamedhaphalaṃ labhet

śayano tthāpanābhyāṃ ca samaṃ puṇyamudāhṛtam //
viśeṣo nāsti bhūpāla viṣṇunā kathitaṃ purā

brāhmaṇāḥ kṣatriyā vaiśyāḥ sthitāḥ śūdrāśca jāgare //
pakṣiṇaḥ kṛmikīṭāśca hyaneke caiva jaṃtavaḥ //
te gatāḥ paramaṃ sthānaṃ yogigamyaṃ niraṃjanam

yāni kāni ca pāpāni brahmahatyāsamāni ca //
kṛṣṇajāgaraṇe tāni kṣayaṃ yāṃti na saṃśayaḥ

ekataḥ kratavaḥ sarve sarvatīrthasamanvitāḥ //
ekato devadevasya jāgaraḥ kṛṣṇavallabhaḥ //
na samaṃ hyadhikaḥ proktaḥ kavibhiḥ kṛṣṇajāgaraḥ

sūryaśakrādayo devā brahmarudrādayo gaṇāḥ //
nityameva samāyāṃti jāgare kṛṣṇavallabhe

gaṃgā sarasvatī revā yamunā ca śatahradā//
caṃdrabhāgā vitastā ca nadyaḥ sarvāśca tatra vai

sarāṃsi ca hradāścaiva samudrāḥ kṛtsnaśo nṛpa //
ekādaśyāṃ nṛpaśreṣṭha gacchaṃti harijāgare

spṛhaṇīyāstu devebhyo ye narāḥ kṛṣṇajāgare //
nṛtyaṃ gītaṃ prakurvaṃti vīṇāvādyaṃ tathaiva ca

bhaktyā vā'pyathavā'bhaktyā śucirvāpyathavā'śuciḥ //
kṛtvā jāgaraṇaṃ viṣṇormucyate pāpakoṭibhiḥ

pādayoḥ pāṃsukaṇikā yāvattiṣṭhaṃti bhūtale //
tāvadvarṣasahasrāṇi jāgarī vasate divi

tasmādgṛhaṃ pragantavyaṃ jāgare mādhavasya ca //
kalau malavināśāya dvādaśadvādaśīṣu ca

subahūnyapi pāpāni kṛtvā jāgaraṇaṃ hareḥ //
nirddahenmerutulyāni yugakoṭiśatānyapi

unmīlinī mahīpāla yaiḥ kṛtā prītisaṃyutaiḥ //
kalau jāgaraṇopetā phalaṃ vakṣyāmi tacchṛṇu

sthitau yugasahasraṃ tu pādenaikena bhūtale //
kāśyāṃ ca jāhnavītīre tatphalaṃ labhate naraḥ

bhavedyugasahasraṃ ca vinā''hāreṇa yatphalam//
unmīlinīṃ samāsādya phalaṃ jāgaraṇe hareḥ

duṣprāpyaṃ vaiṣṇavaṃ sthānaṃ makhakoṭiśataiḥ kṛtaiḥ //
helayā prāpyate nūnaṃ dvādaśyāṃ jāgare kṛte

na kurvaṃti vrataṃ viṣṇorjāgareṇa samanvitam //
parasvaṃ pāradāryaṃ ca pāpaṃ tānprati gacchati

ekenaivopavāsena bhāvahīnāstu mānavāḥ //
nirddagdhā'khilapāpāste prayāṃti svargakānanam

yatra bhāgavataṃ śāstraṃ yatra jāgaraṇaṃ hareḥ //
śāligrāmaśilā yatra tatra gaccheddhariḥ svayam

na puryyaḥ pāvanāḥ sapta kalau vedavaco nahi //
yādṛśaṃ vāsaraṃ viṣṇoḥ pāvanaṃ jāgarānvitam

saṃprāpte vāsare viṣṇorye na kurvaṃti jāgaram//
majjaṃti narake ghore narānāryyo na saṃśayaḥ

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye dvādaśījāgaṇaraṇamāhātmyavarṇanaṃnāmāṣṭāviṃśatitamo'dhyāyaḥ