Skanda Purana · Chapter 7.28

// pulastya uvāca // //
tato gacchennṛpaśreṣṭha supuṇyaṃ mānuṣaṃ hradam //
yatra snāto naraḥ samyaṅmanuṣyo jāyate sadā

na tiryaktvamavāpnoti kṛtvā'pi bahupātakam //
tatrāścaryamabhūtpūrvaṃ yattacchṛṇu narādhipa

mṛgayūthamanuprāpta vyādhavyāptaṃ samantataḥ //
te mṛgā bhayasantrastāḥ praviṣṭā jalamadhyataḥ

sadyo manuṣyatāṃ prāptāḥ pūrvajātismarāstathā //
etasminneva kāle tu vyādhāste samupāgatāḥ

cāpabāṇadharāḥ sarve yathā vai yamakiṃkarāḥ //
papracchuśca mṛgānbhūpa mānuṣatvamupāgatān

mṛgayūthamanu prāptamasminsthāne jalāśraye //
kena mārgeṇa tadyātaṃ vadadhvaṃ satvaraṃ hi naḥ //
vayaṃ sarve pariśrāṃtāḥ kṣuttṛḍbhyāṃ ca viśeṣataḥ

// manuṣyā ūcuḥ // //
vayaṃ te hariṇāḥ sarve mānuṣyaṃ bhāvamāśritāḥ //
tīrthasyāsya prabhāveṇa satyametadasaṃśayam

// pulastya uvāca // //
tataste śabarāḥ sarve tyaktvā cāpāni pārthiva //
kṛtvā snānaṃ jale tasminsadyaḥ siddhiṃ gatā nṛpa

tataḥ śakrastu taddṛṣṭvā tīrthaṃ pāpaharaṃ nṛpa //
pūrayāmāsa sarvatra pāṃsubhirnṛpasattama

adyāpi manujāstatra budhāṣṭamyāṃ narādhipa //
snānaṃ ye prakariṣyaṃti tiryaktvaṃ na vrajaṃti te

pitṛmedhaphalaṃ kṛtsnaṃ śrāddhadānādavāpnuyuḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe manuṣyatīrthaprabhāva varṇanaṃnāmāṣṭāviṃśo'dhyāyaḥ