Skanda Purana · Chapter 7.279

// īśvara uvāca //
tato gacchenmahādevi cyavanārkamanuttamam //
hiraṇyāpūrvabhāgasthaṃ cyavanena pratiṣṭhitam

sarvakāmapradaṃ nṛṇāṃ pūjitaṃ vidhivannaraiḥ //
saptamyāṃ ca vidhānena yaḥ stoṣyati raviṃ naraḥ

aṣṭottaraśatairnāmnāṃ samyakchraddhāsamanvitaḥ //
śṛṇu tāni mahādevi śucirbhūtvā samāhitaḥ

kṣaṇaṃ tvaṃ kuru deveśi sarvaṃ vakṣyāmyaśeṣataḥ //
dhaumyena tu yathāpūrvaṃ pārthāya sumahātmane

nāmāṣṭaśatamākhyātaṃ tacchṛṇuṣva mahāmate //
sūryo'ryamā bhagastvaṣṭā pūṣā'rkaḥ savitā raviḥ

gabhastimānajaḥ kālo mṛtyurddhātā prabhākaraḥ //
pṛthivyāpaśca tejaśca khaṃ vāyuśca parāyaṇaḥ

somo bṛhaspatiḥ śukro budhoṃ'gāraka eva ca //
indro vivasvāndīptāṃśuḥ śuciḥ sauriḥ śanaiścaraḥ //

brahmā rudraśca viṣṇuśca skando vaiśravaṇo yamaḥ //
vaidyuto jāṭharaścāgniriṃdhanastejasāṃ patiḥ

dharmadhvajo vedakarttā vedāṃgo vedavāhanaḥ //
kṛtaṃ tretā dvāparaśca kaliḥ sarvāmarāśrayaḥ

kalākāṣṭhāmuhūrttāśca pakṣā māsā aharniśāḥ //
saṃvatsarakaro'śvasthaḥ kālacakro vibhāvasuḥ

puruṣaḥ śāśvato yogī vyaktāvyaktaḥ sanātanaḥ //
lokādhyakṣaḥ prajādhyakṣo viśvakarmā tamonudaḥ

varuṇaḥ sāgaroṃśuśca jīvanto jīvano'rihā //
bhūtāśrayo bhūtapatiḥ sarvabhūtaniṣevitaḥ

sraṣṭā saṃvarttako vahniḥ sarvasyādikaro'malaḥ //
anaṃtaḥ kapilo bhānuḥ kāmadaḥ sarvatomukhaḥ

jayo viṣādo varadaḥ sarvadhātuniṣevitaḥ //
samaḥ suvarṇo bhūtādiḥ śīghragaḥ prāṇadhārakaḥ

dhanvaṃtarirdhūmaketurādidevo'diteḥ sutaḥ//
dvādaśātmā'raviṃdākṣaḥ pitā mātā pitāmahaḥ

svargadvāraṃ prajādvāraṃ mokṣadvāraṃ triviṣṭapam //
dehakarttā praśāṃtātmā viśvātmā viśvatomukhaḥ //
carācarātmā sūkṣmātmā maitreṇa vapuṣā'nvitaḥ

etadvai kīrtanīyasya sūryasyāmitatejasaḥ //
nāmnāmaṣṭottaraśataṃ proktaṃ śakreṇa dhīmatā

śakrācca nāradaḥ prāpto dhaumyastu tadanantaram //
dhaumyādyudhiṣṭhiraḥ prāpya sarvānkāmānavāptavān

etāni kīrtanīyasya sūryasyāmitatejasaḥ //
nāmāni yaḥ paṭhennityaṃ sarvānkāmānavāpnuyāt

surapitṛmanujayakṣasevitamasuraniśācarasiddhavaṃditam //
varakanakahutāśanaprabhaṃ tvamapi nama hitāya bhāskaram

sūryodaye yastu samāhitaḥ paṭhetsa putralābhaṃ dhanaratnasaṃcayān //
labheta jātismaratāṃ sadā naraḥ smṛtiṃ ca medhāṃ ca sa viṃdate pumān //

imaṃ stavaṃ devavarasya yo naraḥ prakīrttayecchuddhamanāḥ samāhitaḥ //
sa mucyate śokadavāgnisārāllabheta kāmānmanasā yathepsitān

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye cyavanādityamāhātmyasūryāṣṭottaraśatanāma māhātmyavarṇanaṃnāmaikonāśītyuttaradviśatatamo'dhyāyaḥ