Skanda Purana · Chapter 7.280

īśvara uvāca//
tato gacchenmahādevi cyavaneśvaramuttamam//
tatraiva saṃsthitaṃ liṃgaṃ sarvapātakanāśanam

yatra śaryātinā dattā sukanyā sā maharṣaye //
yatra saṃstaṃbhitaṃ sainyamānāhārttamathākarot

/ (ānāha – jaṭhara ādhmānam)
eṣa śaryātiyajñasya deśo devi prakāśate //
prabhāsakṣetramadhye tu sākṣātpātakanāśanaḥ

sākṣāttatrābhajatsomamaśvibhyāṃ saha kauśikaḥ //
cukopa bhārgavaścaiva mahendrāya mahātapāḥ

saṃstaṃbhayāmāsa ca taṃ vāsavaṃ cyavanaḥ prabhuḥ //
sukanyāṃ cāpi bhāryāṃ sa rājaputrīmavāptavān

//
// devyuvāca // //
kathaṃ viṣṭaṃbhitastena bhagavānpākaśāsanaḥ //
kimarthaṃ bhārgavaścāpi kopaṃ cakre mahātapāḥ

nāsatyau ca kathaṃ brahmankṛ tavānsomapāyinau //
tatsarvaṃ ca yathāvṛttamākhyātu bhagavānmama

// īśvara uvāca // //
bhṛgormaharṣeḥ putro'bhūccyavano nāma nāmataḥ //
sa prabhāsaṃ samāsādya tapastepe mahāmuniḥ

sthāṇubhūto mahātejā vīrasthāne ca bhāmini //
atiṣṭhatsuciraṃ kālamekadeśe varānane

sa valmīko'bhavattatra latābhirabhisaṃvṛtaḥ //
kālena mahatā devi samākīrṇaḥ pipīlakaiḥ

sa tathā saṃvṛto dhīmānmṛtpiṃḍa iva sarvataḥ //
tapyate sma tapo ghoraṃ valmīkena samāvṛtaḥ

athāsya yātakālasya śaryātirnāma pārthivaḥ //
tīrthayātrāprasaṃgena śrīsomeśadidṛkṣayā //
ājagāma mahākṣetraṃ prabhāsaṃ pāpanāśanam

tasya strīṇāṃ sahasrāṇi catvāryāsanparigrahāḥ //
ekaiva tu sutā śubhrā sukanyānāma nāmataḥ //

sā sakhībhiḥ parivṛtā sarvābharaṇabhūṣitā //
caṃkramyamāṇā valmīkaṃ bhārgavasya samāsadat

sā caiva sudatī tatra paśyamānā manoramān //
vanaspatīnvicinvaṃtī vijahāra sakhīvṛtā

rūpeṇa vayasā caiva surāpānamadena ca //
babhaṃja vanavṛkṣāṇāṃ śākhāḥ parama puṣpitāḥ

tāṃ sakhīrahitāmekāmekavastrāmalaṃkṛtām //
dadarśa bhārgavo dhīmāṃścaraṃtīmiva vidyutam

tāṃ paśyamāno vijane sa reme paramadyutiḥ //
kṣāmakaṇṭhaśca brahmarṣistapobalasamanvitaḥ

tāmabhāṣata kalyāṇīṃ sā cāsya na śṛṇoti vai //
tataḥ sukanyā valmīke dṛṣṭvā bhārgavacakṣuṣī

kautūhalātkaṇṭakena buddhimohabalātkṛtā //
kinnu khalvidamityuktvā nirbibhedāsya locane

akudhyatsa tayā viddho netre paramamanyumān //
tataḥ śaryātisainyasya śakṛnmūtre samāvṛṇot

tato ruddhe śakṛnmūtre sainyamānāhaduḥkhitam //
tathāgatamabhibhekṣya paryatapyata pārthivaḥ

taponityasya vṛddhasya roṣaṇasya viśeṣataḥ //
kenāpakṛtamadyeha bhārgavasya mahātmanaḥ //
jñātaṃ vā yadi vā'jñātaṃ tadidaṃ brūta mā ciram

tatrocuḥ sainikāḥ sarve na vidmo'pakṛtaṃ vayam //
sarvopāyairyathākāmaṃ bhavānsamadhigacchatu

tataḥ sa pṛthivīpālaḥ sāmnā cogreṇa ca svayam //
paryapṛcchatsuhṛdvargaṃ pratyajānanna caiva te

ānāhārttaṃ tato dṛṣṭvā tatsainyaṃ saṃmukhoditam//
pitaraṃ duḥkhitaṃ cāpi sukanyaivamathābravīt

mayā tāteha valmīke dṛṣṭaṃ sarvamabhijvalat //
uddyotavadavijñānāttanmayā viddhamantikāt

etacchrutvā tu śaryāti rvalmīkaṃ kṣipramabhyagāt//
tatrāpaśyattapovṛddhaṃ vayovṛddhaṃ ca bhārgavam

athāvadatsvasainyārthaṃ prāṃjaliḥ sa mahīpatiḥ //
ajñānādbālayā yatte kṛtaṃ tatkṣaṃtumarhasi

tato'bravīnmahīpālaṃ cyavano bhārgavastadā //
rūpaudāryasamāyuktāṃ lobhamohasamāvṛtām

tāmeva pratigṛhyāhaṃ rājanduhitaraṃ tava //
kṣamiṣyāmi mahīpāla satyametadbravīmi te

// īśvara uvāca // //
ṛṣervacanamājñāya śaryātiravicārayan//
dadau duhitaraṃ tasmai cyavanāya mahātmane

pratigṛhya ca tāṃ kanyāṃ bhagavānprasasāda ha //
prāpte prasāde rājā tu sasainyaḥ puramāvrajat

sukanyāpi patiṃ labdhvā tapasvinamaninditam //
nityaṃ paryacaratprītyā tapasā niyamena ca

agnīnāmatithīnāṃ ca śuśrūṣuranasūyayā //
samārādhayata kṣipraṃ cyavanaṃ sā śubhānanā

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsa kṣetramāhātmye cyavaneśvaramāhātmyavarṇanaṃnāmāśītyuttaradviśatatamo'dhyāyaḥ