Skanda Purana · Chapter 7.277

tatraiva saṃsthitaṃ paśyedbhūdharaṃnāma nāmataḥ //
uddhṛtya pṛthivīṃ yasmāddaṃṣṭrāgreṇa dadhāra saḥ

bhūdharastena cākhyāto devikātaṭasaṃsthitaḥ //
vedapādo yūpadaṃṣṭraḥ kratudantaḥ srucīmukhaḥ

agnijihvo darbharomā brahmaśīrṣo mahātapāḥ //
ahorātrekṣaṇaparo vedāṃgaśrutibhūṣaṇaḥ

ādyanāsaḥ sruvatuṃḍaḥ sāmaghoṣasvano mahān //
prāgvaṃśakāyo dyutimā nnānādīkṣāvirājitaḥ

dakṣiṇāhṛdayo yogī mahāsatraśayo mahān //
upākarmoṣṭharucakaḥ pravargyāvartabhūṣaṇaḥ

nānācchandogatipatho brahmoktakramavikramaḥ //
bhūtvā yajñavarāho'sau tatra sthāne sthito'bhavat

puṣyamāse hyamāvāsyāmekādaśyāmathāpi vā //
prāpte prāvṛṣi kāle ca jñātvā kanyāgataṃ ravim

pāyasaṃ guḍasaṃyuktaṃ haviṣyaṃ ca guḍaplutam //
namo vaḥ pitaro rasāya annādyamabhimaṃtrayet

tejo'siśukramityājyaṃ dadhikrāvṇena vai dadhi //
kṣīramājyāya mantreṇa vyañjanāni ca yāni tu

bhakṣyabhojyāni sarvāṇi mahānindreṇa dāpayet //
saṃvatsa roniyo maṃtraṃ japtvā tenodakaṃ dvijaḥ

evaṃ saṃbhojya vai viprānpiṇḍadānaṃ tu dāpayet //
ityanena vidhānena yastatra śrāddhakṛdbhavet

tasya tṛptāstu pitaro yāvadiṃdrāścaturddaśa //
gayāśrāddhaṃ vināpīha gayāśrāddhaphalaṃ labhet

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṃḍe prathame prabhāsakṣetramāhātmye devikāmāhātmye bhūdharayajñavarāhamāhātmyavarṇanaṃnāma saptasaptatyuttaradviśatatamo'dhyāyaḥ