Skanda Purana · Chapter 7.276

// īśvara uvāca // //
tato gacchenmahādevi ṛṣitīrthasya sannidhau //
kāmikaṃ hi paraṃ kṣetraṃ devikānāma nāmataḥ

mahāsiddhivanaṃ tatra ṛṣisiddhasamāvṛtam //
nānādrumalatākīrṇaṃ parvatairupaśobhitam

caṃpakairbakulairdivyairaśokaiḥ stabakaiḥ paraiḥ //
punnāgaiḥ kiṃkirātaiśca sugandhairnāgakesaraiḥ

mallikotpalapuṣpaiśca pāṭalāpārijātakaiḥ //
cūtacaṃpakapitthaiśca śrīphalaiḥ panasaistathā

kharjūrairbadaraiścānyairmātuliṃgaiḥ sadāḍimaiḥ //
jaṃbīraiścaiva divyaiśca nāraṃgairupa śobhitam

śikhibhiḥ kokilābhiśca gīyamānaṃ tu ṣaṭpadaiḥ //
mṛgairṛkṣairvarāhaiśca siṃhairvyāghraistathā paraiḥ

śvāpadairvividhākāraiḥ kandarai rgahvaraistathā //
surāsuragaṇaiḥ siddhairyakṣagandharvapannagaiḥ

apsaroraganāgaiśca bahubhistu samākulam //
kecitstuvaṃti īśaṃ tu kecinnṛtyaṃti cāgrataḥ

puṣpairvṛṣṭiṃ tu muñcaṃti mukhavādyāni cāpare //
hasaṃti cāpare hṛṣṭā garjaṃti ca tathāpare

ūrddhvabāhavastathā cānye anye dhyāyaṃti tadgatāḥ //
tasminsthānaṃ mahādevi devikāyāstaṭe śubhe

umāpatīśvaro nāma tatrāhaṃ saṃsthitaḥ sadā //
yugeyuge sadā pūrṇe kalpe manvantare tathā

na tyajāmi sadā devi devikāyāstaṭaṃ śubham //
durllabhaṃ sarvaloke'sminpavitraṃ supriyaṃ hi me

tvayā saha sthitaścāhaṃ tasmi nsthāne varānane //
umayā yuktadehatvāttena khyātaṃ umāpatiḥ

puṣyamāse tvamāvasyāṃ dadyācchrāddhaṃ samāhitaḥ //
na paśyāmi kṣayaṃ tasya tasmindattasya pārvati

brahmahatyāsahasraṃ tu tasya darśanato vrajet //
gobhūhiraṇyavāsāṃsi tatra dadyādvicakṣaṇaḥ

sa ekaḥ paramaḥ putro yo gatvā tatra sundari //
dadecchrāddhaṃ pitṝṇāṃ ca tasyāṃto naiva vidyate

devaiḥ sarvaiḥ samāhūtā snānārthaṃ sā saridvarā //
deviketi samākhyātā tena sā pāpanāśinī

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye devikāyāmumāpatimāhātmyavarṇanaṃnāma ṣaṭsaptatyuttaradviśatatamo'dhyāyaḥ