Skanda Purana · Chapter 7.26

// pulastya uvāca // //
tato gacchennṛpaśreṣṭha tīrthaṃ trailokyaviśrutam //
tasminkanakhalaṃnāma parvate pāpanāśane

śṛṇu tatrā'bhavatpūrvaṃ yadāścaryaṃ mahīpate //
pārthivaḥ sumatirnāma saṃprāpto'rbudaparvate

sūryagrahe mahīpāla tīrthaṃ kanakhalaṃ gataḥ //
tena viprārthamānītaṃ suvarṇaṃ jātyameva hi

prabhūtaṃ patitaṃ toye pramādāttasya bhūpateḥ //
na labdhaṃ tena bhūpāla anveṣaṇapareṇa ca

tataḥ snātvā gṛhaṃ prāptaḥ paścāttāpasamanvitaḥ //
tataḥ kālena mahatā sa bhūyastatra cāgataḥ

snānārthaṃ bhāskare graste taṃ ca deśamapaśyata //
ciṃtayāmāsa medhāvī hyasmindeśe tadā mama

suvarṇaṃ patitaṃ hastānna ca labdhaṃ kathaṃcana

// pulastya uvāca // //
evaṃ ciṃtayatastasya vāguvācāśarīriṇī //
nātra nāśo'sti rājendra iha loke paratra ca

atra koṭiguṇaṃ jātaṃ suvarṇaṃ yatpurātanam //
paścāttāpastvayā bhūri kṛto yaddravyanāśane

tasmātsaṃkhyā ca saṃjātā tathaivākalpitasya ca //
ye'tra śraddhāsamāyuktāḥ suvarṇairnṛpasattama //
yatnācchrāddhaṃ kariṣyaṃti suvarṇaṃ ca viśeṣataḥ

brāhmaṇebhyaḥ pradāsyaṃti saṃkhyā tasya na vidyate //
atrānveṣaya deśe tvaṃ prāpsyase nā'tra saṃśayaḥ

sa śrutvā bhāratī tatra hyākāśādutthitāṃ nṛpa //
anveṣamāṇo'smindeśe suvarṇaṃ tacca labdhavān

śubhraṃ koṭiguṇaṃ prājyaṃ tatastuṣṭiṃ samāgataḥ //
jñātvā tīrthaprabhāvaṃ taṃ brāhmaṇebhyaḥ sahasraśaḥ //
pradadau ca dayāyukta uddiśya pitṛdevatāḥ

tatastasya prabhāveṇa sa dānasya mahīpatiḥ //
saṃjāto dhanadonāma yakṣo nānādhanapradaḥ

tatra yaḥ kurute śrāddhaṃ grahe sūryasya bhūmipa //
ākalpaṃ pitarastasya tṛptiṃ yāṃti sutarpitāḥ

snānena ṛṣayo devāstuṣṭiṃ yāṃti mahoragāḥ //
nāśaḥ saṃjāyate sadyaḥ pāpasya pṛthivīpate

tasmātsarvaprayatnena snānaṃ tatra samācaret //
yathāśaktyā tathā dānaṃ śrāddhaṃ ca nṛpasattama

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe kanakhalatīrthamāhātmyavarṇanaṃnāma ṣaṅviṃśo'dhyāyaḥ //