Skanda Purana · Verses 7.26-2

// śrīmārkaṇḍeya uvāca // //
prahlādaṃ sarvadharmajñaṃ vedaśāstrārthapāragam //
vaiṣṇavāgamatattvajñaṃ bhagavadbhaktitatparam

sukhāsīnaṃ mahāprājñamṛṣayo draṣṭumāgatāḥ //
sarvaśāstrārthatattvajñāḥ svadharmapratipālakāḥ //

// ṛṣaya ūcuḥ // //
vinā jñānādvinā dhyānādvinā cendriyanigrahāt //
anāyāsena yenaitatprāpyate paramaṃ padam

saṃkṣepātkathaya snehāddṛṣṭādṛṣṭaphalodayam //
dharmānmanujaśārdūla brūhi sarvānaśeṣataḥ

ityukto'sau mahābhāgo nārāyaṇaparāyaṇaḥ //
kathayāmāsa saṃkṣepātsarvalokahitodyataḥ

// śrīprahlāda uvāca // //
śrūyatāmabhidhāsyāmi guhyādguhyataraṃ mahat //
yasya saṃśravaṇādeva sarvapāpakṣayo bhavet //

aṣṭādaśapurāṇānāṃ sārātsārataraṃ ca yat //
tadahaṃ kathayiṣyāmi bhuktimuktiphalapradam

sukhāsīnaṃ mahādevaṃ jagataḥ kāraṇaṃ param //
papraccha ṣaṇmukho bhaktyā sarvalokahitodyataḥ

// skanda uvāca // //
bhagavansarvalokānāṃ duḥkhasaṃsārabheṣajam //
kathayasva prasādena sukhopāyaṃ vimuktaye

// īśvara uvāca // //
caturvidhaṃ tu yatpāpaṃ koṭijanmārjitaṃ kalau //
jāgare vaiṣṇavaṃ śāstraṃ vācayitvā vyapohati

vaiṣṇavasya tu śāstrasya yo vaktā jāgare hareḥ //
madbhaktaṃ taṃ vijānīyādvipannastvanyathā bhavet

harijāgaraṇaṃ kāryaṃ madbhaktena vijānatā //
anyathā pāpino jñeyā ye dviṣanti janārddanam

jāgaraṃ ye ca kurvaṃti gāyaṃti harivāsare //
agniṣṭomaphalaṃ teṣāṃ nimiṣārddhena ṣaṇmukha

jāgare paśyatāṃ viṣṇormukhaṃ rātrau muhurmuhuḥ //
yeṣāṃ hṛṣyaṃti romāṇi rātrau jāgaraṇe hareḥ //
kulāni divi tāvaṃti vasaṃti harisannidhau

yamasya pathi nirmuktā janāḥ pāpaśatairvṛtāḥ//
gītaśāstravinodena dvādaśījāgarānvitāḥ

suprabhātā niśā teṣāṃ dhanyāḥ sukṛtino narāḥ //
prāṇātyayena muhyaṃti yaiḥ kṛtaṃ jāgaraṃ hareḥ

putriṇaste narā loke dhaninaḥ khyātapauruṣāḥ //
yeṣāṃ vaṃśodbhavāḥ putrāḥ kurvaṃti harijāgaram

iṣṭaṃ makhaiḥ kṛtaṃ dānaṃ dattaṃ piṃḍaṃ gayāśire //
snātaṃ nityaṃ prayāge tu yaiḥ kṛtaṃ jāgaraṃ hareḥ

dayitā viṣṇubhaktāśca nityaṃ mama ṣaḍānana //
kurvaṃti vāsaraṃ viṣṇoryasmājjāgaraṇaṃ hitam

śrutvā harṣaṃ na cāpnoti jāgaraṃ na karoti yaḥ //
prakaṭīkaroti tannūnaṃ jananyā durviceṣṭitam

saṃprāpya vāsaraṃ viṣṇorna yeṣāṃ jāgaro hareḥ //
vyarthaṃ gataṃ ca tatpuṇyaṃ teṣāṃ varṣaśatodbhavam

putro vā putraputro vā dauhitro duhitā'pi vā // /
kariṣyati kule'smākaṃ kalau jāgaraṇaṃ hareḥ

pātyamānāḥ prajalpaṃti pitaro yamakiṃkaraiḥ //
muktirbhaviṣyatyasmākaṃ narakājjāgare kṛte

/
nānyathā jāyate'smākaṃ muktiryajñaśatairapi //
vinā jāgaraṇenaiva naralokātkathaṃcana //
tasmājjāgaraṇaṃ kāryaṃ pitṝṇāṃ hitamicchatā

bhaktirbhāgavatānāṃ ca goviṃdasyāpi kīrtanam //
na dehagrahaṇaṃ tasmātpunarloke bhaviṣyati

jāgaraṃ kurute yaśca saṃgame vijayādine //
punarddehaprajananaṃ dagdhaṃ tenā''tmanā svayam

trispṛśā vāsaraṃ yena kṛtaṃ jāgaraṇānvitam //
keśavasya śarīre tu sa līno nātra saṃśayaḥ

unmīlinī kṛtā yena rātrau jāgaraṇānvitā //
prabhavaṃti na pāpāni sthūlasūkṣmāṇi tasya tu

satālavādyasaṃyuktaṃ saṃgītaṃ jāgaraṃ hareḥ //
yaḥ kārayati devasya dvādaśyāṃ dānasaṃyutam

tasya puṇyaṃ pravakṣyāmi mahābhāgavatasya hi //
tilaprasthahasraṃ tu sahiraṇyaṃ dvijātaye //
dattvā yatphalamāpnoti hyayane ravisaṃkrame

hemabhāraśataṃ nityaṃ savatsaṃ kapilāyutam //
prekṣaṇīyapradānena tatphalaṃ prāpnuyātkalau

yaḥ punarvāsare putra divyairṛṣikṛtaiḥ stavaiḥ //
toṣayetpadmanābhaṃ vai vaidikairviṣṇusāmabhiḥ

ṛgyajuḥsāmasambhūtaivaiṣṇavaiścaiva putraka //
saṃskṛtaiḥ prākṛtaiḥ stotrairanyaiśca vividhaistathā

prītiṃ karoti deveśo dvādaśyāṃ jāgare sthitaḥ //
śṛṇu puṇyaṃ samāsena yadgītaṃ brahmaṇā mama

triḥsaptakṛtvo dharaṇīṃ triguṇīkṛtya ṣaṇmukha //
dattvā yatphalamāpnoti tatphalaṃ prāpnuyānnaraḥ

gavāṃ śatasahasreṇa savatsenāpi yatphalam //
tatphalaṃ prāpnuyānmarttyaḥ stotrairyastoṣayeddharim

vaidikī daśaguṇā prītiryāmenaikena jāgare //
evaṃ phalānusāreṇa kāryyaṃ jāgaraṇaṃ hareḥ

yaḥ punaḥ paṭhate rātrau gītāṃ nāmasahasrakam //
dvādaśyāṃ purato viṣṇorveṣṇavānāṃ samīpataḥ

puṇyaṃ bhāgavataṃ skāṃdapurāṇaṃ dayitaṃ hareḥ //
mādhuraṃ bālacaritaṃ gopīnāṃ caritaṃ tathā

etānpaṭhati rātrau yaḥ pūjayitvā tu keśavam //
na vedmyahaṃ phalaṃ vatsa yadi jñāsyati keśavaḥ

dīpaṃ prajvālayedrātrau yaḥ stavairharijāgare //
na cāstaṃ gacchate tasya puṇyaṃ kalpaśatairapi

maṃjarīsahitaiḥ patraistulasīsambhavairharim //
jāgare pūjayedbhaktyā nāsti tasya punarbhavaḥ

snānaṃ vilepanaṃ pūjā dhūpaṃ dīpaṃ ca saṃstavam //
naivedyaṃ ca satāṃbūlaṃ jāgare dattamakṣayam

dhyātumicchati ṣaḍvaktraṃ yo māṃ bhaktiparāyaṇaḥ //
sa karotu mahābhaktyā dvādaśyāṃ jāgaraṃ hareḥ

vāsare vāsudevasya sarve devāḥ savāsavāḥ //
dehamāśritya tiṣṭhaṃti ye prakurvaṃti jāgaram

jāgarevāsudevasya mahābhāratakīrtanam //
ye kurvaṃti gatiṃ yāṃti yogināṃ te na saṃśayaḥ

caritaṃ rāmadevasya ye vadhaṃ rāvaṇasya ca //
paṭhaṃti jāgare viṣṇoste yāṃti paramāṃ gatima // ४७
adhītya caturo vedānkṛtvā caivārcanaṃ hareḥ //
snātvā ca sarvatīrtheṣu jāgare tatphalaṃ hareḥ

rathānāmayutairyattu sahasrairvaravāraṇaiḥ // lakṣeṇāśvavarāṇāṃ tu tatphalaṃ jāgare hareḥ

dhānyaśailasahasraistu tulāpuruṣako ṭibhiḥ //
yatphalaṃ munibhiḥ proktaṃ tatphalaṃ jāgare hareḥ

kanyākoṭipradānaṃ ca svarṇabhāraśataṃ tathā //
dattaṃ ratnāyutaśataṃ yaiḥ kṛto jāgaro hareḥ

aṣṭādaśapurāṇaistu paṭhitairyatphalaṃ bhavet //
tatphalaṃ śatasāhasraṃ kṛte jāgaraṇe hareḥ

manvādi paṭhatāṃ śāstraṃ yatphalaṃ hi dvijanmanaḥ //
adhikaṃ phalamāpnoti kurvāṇo jāgaraṃ hareḥ

durbhikṣe cānnadātṝṇāṃ puṃsāṃ bhavati yatphalam //
saṃnyāsināṃ sahasraistu yatphalaṃ bhojitaiḥ kalau //
phalaṃ tatsamavāpnoti kurvatāṃ jāgaraṃ hareḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye dvādaśījāgaraṇamāhātmyavarṇanaṃnāma ṣaḍviṃśatitamo'dhyāyaḥ