સ્કંદ પુરાણ · અધ્યાય 7.26

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ તીર્થં ત્રૈલોક્યવિશ્રુતમ્ ॥
તસ્મિન્કનખલંનામ પર્વતે પાપનાશને

શૃણુ તત્રાઽભવત્પૂર્વં યદાશ્ચર્યં મહીપતે ॥
પાર્થિવઃ સુમતિર્નામ સંપ્રાપ્તોઽર્બુદપર્વતે

સૂર્યગ્રહે મહીપાલ તીર્થં કનખલં ગતઃ ॥
તેન વિપ્રાર્થમાનીતં સુવર્ણં જાત્યમેવ હિ

પ્રભૂતં પતિતં તોયે પ્રમાદાત્તસ્ય ભૂપતેઃ ॥
ન લબ્ધં તેન ભૂપાલ અન્વેષણપરેણ ચ

તતઃ સ્નાત્વા ગૃહં પ્રાપ્તઃ પશ્ચાત્તાપસમન્વિતઃ ॥
તતઃ કાલેન મહતા સ ભૂયસ્તત્ર ચાગતઃ

સ્નાનાર્થં ભાસ્કરે ગ્રસ્તે તં ચ દેશમપશ્યત ॥
ચિંતયામાસ મેધાવી હ્યસ્મિન્દેશે તદા મમ

સુવર્ણં પતિતં હસ્તાન્ન ચ લબ્ધં કથંચન

॥ પુલસ્ત્ય ઉવાચ ॥ ॥
એવં ચિંતયતસ્તસ્ય વાગુવાચાશરીરિણી ॥
નાત્ર નાશોઽસ્તિ રાજેન્દ્ર ઇહ લોકે પરત્ર ચ

અત્ર કોટિગુણં જાતં સુવર્ણં યત્પુરાતનમ્ ॥
પશ્ચાત્તાપસ્ત્વયા ભૂરિ કૃતો યદ્દ્રવ્યનાશને

તસ્માત્સંખ્યા ચ સંજાતા તથૈવાકલ્પિતસ્ય ચ ॥
યેઽત્ર શ્રદ્ધાસમાયુક્તાઃ સુવર્ણૈર્નૃપસત્તમ ॥
યત્નાચ્છ્રાદ્ધં કરિષ્યંતિ સુવર્ણં ચ વિશેષતઃ

બ્રાહ્મણેભ્યઃ પ્રદાસ્યંતિ સંખ્યા તસ્ય ન વિદ્યતે ॥
અત્રાન્વેષય દેશે ત્વં પ્રાપ્સ્યસે નાઽત્ર સંશયઃ

સ શ્રુત્વા ભારતી તત્ર હ્યાકાશાદુત્થિતાં નૃપ ॥
અન્વેષમાણોઽસ્મિન્દેશે સુવર્ણં તચ્ચ લબ્ધવાન્

શુભ્રં કોટિગુણં પ્રાજ્યં તતસ્તુષ્ટિં સમાગતઃ ॥
જ્ઞાત્વા તીર્થપ્રભાવં તં બ્રાહ્મણેભ્યઃ સહસ્રશઃ ॥
પ્રદદૌ ચ દયાયુક્ત ઉદ્દિશ્ય પિતૃદેવતાઃ

તતસ્તસ્ય પ્રભાવેણ સ દાનસ્ય મહીપતિઃ ॥
સંજાતો ધનદોનામ યક્ષો નાનાધનપ્રદઃ

તત્ર યઃ કુરુતે શ્રાદ્ધં ગ્રહે સૂર્યસ્ય ભૂમિપ ॥
આકલ્પં પિતરસ્તસ્ય તૃપ્તિં યાંતિ સુતર્પિતાઃ

સ્નાનેન ઋષયો દેવાસ્તુષ્ટિં યાંતિ મહોરગાઃ ॥
નાશઃ સંજાયતે સદ્યઃ પાપસ્ય પૃથિવીપતે

તસ્માત્સર્વપ્રયત્નેન સ્નાનં તત્ર સમાચરેત્ ॥
યથાશક્ત્યા તથા દાનં શ્રાદ્ધં ચ નૃપસત્તમ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખંડે કનખલતીર્થમાહાત્મ્યવર્ણનંનામ ષઙ્વિંશોઽધ્યાયઃ ॥