Skanda Purana · Verses 7.25-3

// īśvara uvāca // //
sa gandharvastadā devi ārirādhayiṣurbhavam //
somavāravrataṃnāma papraccha munisattamam

// gandharva uvāca // //
kathaṃ somavrataṃ kāryaṃ vidhānaṃ tasya kīdṛśam //
kasminkāle ca tatkāryaṃ sarvaṃ vistarato vada

// gośṛṃga uvāca // //
sādhusādhu mahāprājña sarvasattvopakārakam //
yanna kasyacidākhyātaṃ tadadya kathayāmi te

sarvarogaharaṃ divyaṃ sarvasiddhipradāyakam //
somavāravrataṃnāma sarvakāmaphalapradam

sarvakālikamādeyaṃ varṇānāṃ śubhakārakam //
nārī naraiḥ sadā kāryaṃ dṛṣṭvādṛṣṭvā phalodayam

brahmaviṣṇvādibhirdevaiḥ kṛtametanmahāvratam //
punastu somarājena dakṣaśāpahatena ca

ārādhito'nena śaṃbhuḥ śaṃbhudhyānapareṇa tu //
tatastuṣṭo mahādevaḥ somarājasya bhaktitaḥ

tenoktaṃ yadi tuṣṭo'si pratiṣṭhāstho niraṃtaram

yāvaccaṃdraśca sūryaśca yāvattiṣṭhaṃti bhūdharāḥ //
tāvanme sthāpitaṃ liṃgamumayā saha tiṣṭhatu

sthāpitaṃ tu tadā tena prārthayitvā maheśvaram //
ātmanāmāṃkitaṃ kṛtvā tato rogairvyamucyata

tataḥ śuddhaśarīro'sau gaganastho virājate

tadāprabhṛti ye kecitkurvaṃti bhuvi mānavāḥ //
te'pi tatpadamāyāṃti vimalāṃgāśca somavat

atha kiṃ bahunoktena vidhānaṃ tasya kīrttaye //
yasminkasmiṃśca māse vā śukle somasya vāsare //

daṃtakāṣṭhaṃ purā brāhme kṛtvā snānaṃ samācaret //
svadharmavihitaṃ karma kṛtvā sthāne manorame

susame bhūtale śuddhe nyasya kumbhaṃ suśobhitam //
cūtapallavavinyaste caṃdanena sucitrite

śvetavastraparīdhāne sarvābharaṇabhūṣite //
ādau pātre tu saṃnyasya ādhārasahitaṃ śivam //

aṣṭamūrtyaṣṭakaṃ dikṣu somanāthaṃ saśaktikam //
umayā sahitaṃ tatra śvetapuṣpaiśca pūjayet

vividhaṃ bhakṣyabhojyaṃ ca phalaṃ vai bījapūra kam //
anenaiva tu maṃtreṇa sarvaṃ tatraiva kārayet

oṃ namaḥ paṃcavaktrāya daśabāhutrinetriṇe //
śvetaṃ vṛṣabhamārūḍha śvetābharaṇabhūṣita

umādehārddhasaṃyukta namaste sarvamūrtaye //
anenaiva tu maṃtreṇa pūjāṃ homaṃ ca kārayet

kṛtvaivaṃ ca dine rātrau paśyaṃścaivaṃ svapennaraḥ //
darbhaśayyā samārūḍho dhyāyansomeśvaraṃ haram

evaṃ kṛte'ṣṭādaśānāṃ kuṣṭhānāṃ nāśanaṃ bhavet //
dvitīye somavāre tu karaṃjaṃ dantadhāvanam

devaṃ saṃpūjayetsūkṣmaṃ jyeṣṭhāśaktisamanvitam //
śatapatraiḥ pūjayitvā madhu prāśya yathāvidhi

nāraṃgaṃ tatra dattvā tu śeṣaṃ pūrvavadācaret //
evaṃ kṛte dvitīye tu golakṣaphalamāpnuyāt

somavāre tṛtīye tu apāmārgasamudbhavam //
daṃtakāṣṭhādikaṃ kṛtvā trinetraṃ ca prapūjayet

phalaṃ ca dāḍimaṃ dadyājjātīpuṣpaiśca pūjayet //
rajanyāmaṃguraṃ prāśya siddhiyuktaṃ tu pūjayet

caturthe somavāre tu kāṣṭhamaudumbaraṃ smṛtam //
pūjayettatra gaurīśaṃ sūkṣmayā sahitaṃ tathā

nārikelaphalaṃ dadyāddamanena prapūjayet //
śarkarāṃ prāśayedrātrau jāgaraṃ caiva kārayet

pañcame somavāre tu pūjayecca gaṇādhipam //
vibhūtyā sahitaṃ devaṃ kundapuṣpaiḥ prapūjayet

āśvatthaṃ dantakāṣṭhaṃ ca arghyaṃ vai drākṣayā tathā //
mocaṃ ca prāśayedrātrāvaśvamedhaphalaṃ labhet

ṣaṣṭhe somasya vāre tu surūpaṃ nāma pūjayet //
karpūraṃ prāśayettatra bhaktyā paramayā yutaḥ

saptame somavāre tu dantakāṣṭhaṃ ca mallikā //
sarvajñaṃ pūjayettatra dīptayā sahitaṃ tathā

jambīraṃ ca phalaṃ dadyājjātīpuṣpaiśca pūjayet //
lavaṅgaṃ prāśayettatra tasyānantaphalaṃ bhavet

aṣṭame somavāre tu amoghāyutamīśvaram //
kadalīphalakenārghyaṃ marubakena pūjayet //
rātrau tu prāśayeddugdhamagniṣṭomaphalaṃ labhet

gaṃgāsnāne kṛte samyakkoṭidhā yatphalaṃ smṛtam //
daśahemasahasrāṇāṃ kurukṣetre ravergrahe

brāhmaṇe vedaviduṣe yaddattvā phala māpnuyāt //
tatpuṇyaṃ koṭiguṇitamasminnācarite vrate

gajānāṃ tu śate datte lakṣe ca rathavājinām//
tatphalaṃ koṭiguṇitaṃ somavāravrate kṛte

guggulordhūpanaṃ kṛtvā koṭiśo yatphalaṃ labhet //
tatpuṇyaṃ tu bhavettasya somavāravrate kṛte

sarvaiśvaryasamāyuktaḥ śivatulyaparākramaḥ //
rudraloke vasettāvadbrahmaṇaḥ pralayāvadhi

saṃprāpte navame vāre kuryādudyāpanaṃ śubham //
yathā bhavati gandharva tathā vakṣyāmi te'dhunā

maṃḍalaṃ maṃḍapaṃ kuṇḍaṃ patākādhvajaśobhitam //
toraṇāni ca catvāri kuṇḍaṃ kṛtvā vidhānataḥ

madhye vediḥ prakarttavyā caturasrā suśobhanā //
niṣpādya maṃḍalaṃ tatra madhye padmaṃ prakalpayet

kalaśānaṣṭadigbhāge sahiraṇyānpṛthakpṛthak //
sthāpayitvā tu śaktistā vāmādyāḥ pūrvataḥ kramāt

karṇikāyāṃ tu padmasya śrīsomeśaṃ mahāprabham//
pratimārūpasaṃpannaṃ hemajaṃ śaktisaṃyutam

rukmaśayyāsamārūḍhaṃ manonmanyā samanvitam //
hemapātrādike pātre madhunā paripūrite

rukmaśayyāsamācchanne tatrasthaṃ pūjayetkramāt //
anaṃtādiśikhaṃḍyaṃtairnāmabhiḥ kramaśo'rcayet

gandhasragdhūpadīpaiśca naivedyaiśca pṛthagvidhaiḥ //
vastrālaṃkāratāṃbūlacchatracāmaradarppaṇam

dīpaghaṃṭāvitānaṃ ca paryaṃkaṃ ca satū likam //
someśvaraṃ samuddiśya deyaṃ paurāṇike gurau

bhūṣayitvā tathā''cāryyaṃ homaṃ tatraiva kārayet //
balikarmāvasāne ca rātrau tatraiva jāgṛyāt

pañcagavyaṃ tataḥ pītvā dhyāyetsomeśvaraṃ hṛdi //
prabhāte tu tataḥ snātvā dhyāyettaṃ ca vidhānataḥ

tato bhaktyā ca gaṃdharva kṣīrakhaṇḍādinirmmitam //
bhakṣyabhojyairanekaiśca bhojayedbrāhmaṇānatha

vastrayugmaṃ tato dattvā gāṃ ca dattvā visarjayet

evaṃ cīrṇavrataḥ samyaglabhate puṇyamakṣayam //
dhanadhānyasamṛddhātmā putradārasamanvitaḥ

na kule jāyate tasya daridro duḥkhito'pivā //
aputro labhate putrānvandhyā putravatī bhavet

kākavaṃdhyā tu yā nārī mṛtavatsā ca durbhagā //
kanyāprasūśca yā kāryamābhiretadviśeṣataḥ

evaṃ kṛte vidhāne tu dehapāte śivaṃ vrajet //
kalpakoṭisahasrāṇi kalpakoṭiśatāni ca //
bhuṃkte'sau vipulānbho gānyāvadābhūtasaṃplavam

iti te kathitaṃ sarvaṃ somavāravrataṃ kramāt //
gaccha śīghraṃ mahābhāga yatra someśvaraḥ sthitaḥ

// īśvara uvāca // //
ityuktaḥ saca gandharvaḥ putryā saha varānane //
sarvopahārasaṃyuktaḥ prabhāsakṣetramāśritaḥ

tatra someśvaraṃ dṛṣṭvā ānandāśrupariplutaḥ //
yātrākrameṇa saṃpūjya cakre somavrataṃ kramāt

putryā saha mahābhāgastasya tuṣṭo maheśvaraḥ//
sarvarogavināśaṃ ca sarvakāmasamṛddhidam//
dadau gandharvarājyaṃ ca bhaktiṃ caivātmanastathā

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetra māhātmye someśvaramāhātmyavarṇane gandharvakanyāvṛttāntavarṇanaṃnāma pañcaviṃśo'dhyāyaḥ