Skanda Purana · Chapter 7.256

// īśvara uvāca // //
tato gacchenmahādevi naṃdādityaṃ samāhitaḥ //
naṃdena sthāpitaṃ pūrvaṃ tatraivāmitabuddhinā

naṃdo rājā purā hyāsītsarvalokasukhapradaḥ //
na durbhikṣaṃ na ca vyādhi nākāle maraṇaṃ nṛṇām

tasmiñchāsati dharmajñe na cāvṛṣṭikṛtaṃ bhayam //
kasyacittvatha kālasya pūrvakarmānusārataḥ

kuṣṭhena mahatā vyāpto vairāgyaparamaṃ gataḥ//
tena rogābhibhūtena devadevo divākaraḥ//
pratiṣṭhito nadītīre sa ca rogādvimocitaḥ

// devyuvāca // //
kimasau rogavānrājā sārvabhaumo mahīpatiḥ //
tasya dharmaratasyāpi kasmādroga samudbhavaḥ

//īśvara uvāca // //
eṣa dharmasadācāro naṃdo rājā pratāpavān //
vyacaratsarvalokānsa vimānavaramāsthitaḥ

vimānaṃ tasya tuṣṭena dattaṃ vai viṣṇunā svayam //
kāmagaṃ varavarṇena barhiṇena vināditam

sa kadācinnṛpaśreṣṭho vicaraṃstatra saṃsthitaḥ //
gatavānmānasaṃ divyaṃ saro devagaṇānvitam

tatrāpaśyadbṛhatpadmaṃ saromadhyagataṃ sitam //
tatra cāṃguṣṭhamātraṃ tu sthitaṃ puruṣasattamam

raktavāsobhirācchannaṃ dvibhujaṃ tigmatejasam //
taṃ dṛṣṭvā sārathiṃ prāha padmametatsamāhara

idaṃ tu śirasā bibhratsarvalokasya sannidhau //
ślāghanīyo bhaviṣyāmi tasmādāhara mā ciram

evamuktastatastena sārathiḥ praviveśa ha //
grahītumupacakrāma tatpadmaṃ varavarṇini//
spṛṣṭamātre tadā padme huṃkāraḥ samapadyata

rājā ca tatkṣaṇāttena śabdena samajāyata //
kuṣṭhī vigatavarṇaśca balavīryavivarjitaḥ

tathāgatamathātmānaṃ dṛṣṭvā sa puruṣarṣabhaḥ //
tasthau tatraiva śokārtaḥ kimetaditi ciṃtayan

tasya ciṃtayato dhīmānājagāma mahātapāḥ //
vasiṣṭho brahmaputrastu sa taṃ papraccha pārthivaḥ

eṣa me bhagavañjāto dehasyāsya viparyayaḥ //
kuṣṭharogābhibhūtātmā nāhaṃ jīvitumutsahe

upāyaṃ brūhi me brahmanvyādhitasya cikitsitam //
utāho vratamanyadvā dānaṃ yajñamathāpi vā

// vasiṣṭha uvāca // //
etadbrahmodbhavaṃ nāma padmaṃ trailokyaviśrutam //
dṛṣṭamātreṇa cānena dṛṣṭāḥ syuḥ sarva devatāḥ

etaddhi dṛśyate dhanyaiḥ padmaṃ kaiḥ kvāpi pārthiva //
etasmindṛṣṭamātre tu yo jalaṃ viśate naraḥ

sarvapāpavinirmuktaḥ padaṃ nirvāṇa māpnuyāt //
eṣa dṛṣṭvā tu te sūto hartuṃ toye praviṣṭavān

tava vākyena rājeṃdra mṛto'sau rogavānbhavet //
brahmaputro'pyahaṃ tena paśyāmi parameśvaram

ahanyahani cāgacchaṃstvaṃ punardṛṣṭavānasi //
vāṃchaṃti devatā nityamamuṃ hṛdi manoratham

mānase brahmapadmaṃ tu dṛṣṭvā snātvā kadā vayam //
prāpsyāmaḥ paramaṃ brahma yadgatvā na punarbhavet

idaṃ ca kāraṇaṃ bhūyo dvitīyaṃ śṛṇu pārthiva //
kuṣṭhasya yattvayā prāptaṃ hartukāmena paṃkajam //

pradyotanastu garbhe'sminsvayameva vyavasthitaḥ //
tavaiṣā buddhirabhavaddṛṣṭvedaṃ varapaṃkajam

dhārayāmi śirasyenaṃ lokamadhye vibhūṣaṇam //
idaṃ cintayataḥ pāpamevaṃ devena darśitam

tataḥ sarvaprayatnena tamārādhaya bhāskaram //
prasādāddevadevasya mokṣyase nātra saṃśayaḥ

prabhāsaṃ gaccha rājeṃdra tīrthaṃ trailokyaviśrutam //
tatra siddhirbhavecchīghramārttānāṃ prāṇināṃ bhuvi

// īśvara uvāca // //
tasya tadvacanaṃ śrutvā vasiṣṭhasya mahātmanaḥ //
prabhāsaṃ kṣetramāsādya māheśvaryāstaṭe śubhe

naṃdādityaṃ pratiṣṭhāpya gaṃdhadhūpānulepanaiḥ //
pūjayāmāsa taṃ devi puṣpairuccāvacaistathā

tasya tuṣṭo divānātho varado'hamathābravīt

// nanda uvāca // //
kuṣṭhena mahatā vyāptaṃ paśya māṃ surasattama //
yathā'yaṃ nāśamāyāti tathā kuru divākara

sānnidhyaṃ kuru deveśa sthāne'sminnityadā vibho

// sūrya uvāca // //
nīrogastvaṃ mahārāja sadya eva bhaviṣyasi //
atra ye māṃ samāgatya drakṣyaṃti ca narā bhuvi

saptamyāṃ sūryavāreṇa yāsyaṃti paramāṃ gatim//
atra me sūryavāreṇa sāṃnidhyaṃ saptamīdine //
bhaviṣyati na saṃdeho gamiṣye tvaṃ sukhī bhava

evamuktvā sahasrāṃśustatraivāṃtaradhīyata

nīrogatvamavā pyāsau kṛtvā rājyamanuttamam //
jagāma paramaṃ sthānaṃ yatra devo divākaraḥ //
tasmiṃstīrthe naraḥ snātvā kṛtvā śrāddhaṃ prayatnataḥ

naṃdādityaṃ punardṛṣṭvā na punarmarttyatāṃ vrajeta//
pradadyātkapilāṃ tatra brāhmaṇe vedapārage

ahorātroṣito bhūtvā ghṛtadhenumathāpi vā //
na tasya guṇituṃ śakyā saṃkhyā puṇyasya kenacit

ityevaṃ devadevasya māhātmyaṃ dīptadīdhiteḥ //
kathitaṃ tava suśroṇi sarvapāpapraṇāśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye nandādityamāhātmyavarṇanaṃnāma ṣaṭpañcāśaduttaradviśatatamo 'dhyāyaḥ