Skanda Purana · Chapter 7.251

// īśvara uvāca // //
tato gacchenmahādevi śaṃkarādityamuttamam //
gaṃgeśvarasya pūrveṇa śaṃkareṇa pratiṣṭhitam

ṣaṣṭhyāṃ caiva tu śuklāyāmenaṃ yaḥ pūjayiṣyati //
gamiṣyati paraṃ sthānaṃ yatra devo divākaraḥ

raktacaṃdanamiśraiśca raktapuṣpaiḥ samāhitaḥ //
tāmrapātre samādhāya yo'rghyaṃ dāsyati mānavaḥ //
sa yāsyati parāṃ siddhiṃ na ca yāti daridratām

tasmātsarvaprayatnena tasminkṣetre varānane //
pūjayecchaṃkarādityaṃ sarvakāmaphalapradam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śaṃkarādityamāhātmyavarṇanaṃnāmaikapañcāśaduttaradviśatatamo'dhyāyaḥ