Skanda Purana · Verses 7.23-2

// mārkaṃḍeya uvāca // //
dvārakāyāśca māhātmyamiṃdradyumna nibodha me //
kalau nivasate yatra kleśahā rukmiṇīpatiḥ

kalau kṛṣṇasya māhātmyaṃ ye śṛṇvaṃti paṭhaṃti ca //
na teṣāṃ jāyate vāso yamaloke yugāṣṭakam

nityaṃ kṛṣṇakathā yasya prāṇādapi garīyasī //
na tasya durllabhaṃ kiṃcidiha loke paraṃ nṛpa

manvaṃtarasahasraistu kāśīvāsena yatphalam //
tatphalaṃ dvārakāvāse vasatāṃ paṃcabhirdinaiḥ

kalau nivasate yastu śvapaco dvārakāṃ yadi //
yatīnāṃ gatimāpnoti prāha hyevaṃ prajāpatiḥ

dvārakāṃ gaṃtukāmaṃ yaḥ pratyahaṃ kurute naraḥ //
phalamāpnoti manujaḥ kurukṣetrasamudbhavam

somagrahe ca yatproktaṃ yatphalaṃ somanāyake //
dṛṣṭvā tatphalamāpnoti dvāravatyāṃ janārddanam

puṣkare kārttikīṃ kṛtvā yatphalaṃ varṣakoṭibhiḥ //
tatphalaṃ dvārakāvāse dinenaikena jāyate

dvārakāyāṃ dinaikena dṛṣṭe devakinaṃdane //
phalaṃ koṭiguṇaṃ jñeyamatra lakṣaśatodbhavam

kalau nivasatāṃ bhūpa dhanyāsteṣāṃ manorathāḥ //
kṛṣṇasya darśane nityaṃ dvārakāgamane matiḥ

ekāmapi dvādaśīṃ tu yaḥ karoti nṛpottama //
kṛṣṇasya sannidhau bhūpa dvārakāyāḥ phalaṃ śṛṇu

dhanyāste kṛtakṛtyāste te janā lokapāvanāḥ //
dṛṣṭaṃ kṛṣṇamukhaṃ yaistu pāpakoṭyayutāpaham

yatphalaṃ vratasaṃyuktairvāsaraiḥ kṛṣṇasaṃyutaiḥ //
yajñairdānairbṛhadbhiśca dvārakāyāṃ tathaikayā

kṣīrasnānaṃ prakurvaṃti ye narāḥ kṛṣṇa mūrdhani //
śatāśvamedhajaṃ puṇyaṃ biṃdunā biṃdunā smṛtam

dadhi kṣīrāddaśaguṇaṃ ghṛtaṃ dadhno daśottaram //
ghṛtāddaśaguṇaṃ kṣaudraṃ kṣaudrāddaśaguṇottaram /// / १५//
puṣpodakaṃ ca ratnodaṃ varddhanaṃ ca daśottaram//
maṃtrodakaṃ ca gaṃdhodaṃ tathaiva nṛpasattama

ikṣo rasena snapanaṃ śatavājimakhaiḥ samam//
tathaiva tīrthanīraṃ sa phalaṃ yacchati bhūmipa

kṛṣṇaṃ snānārdragātraṃ ca vastreṇa parimārjati//
tasya lakṣārjitasyāpi bhavetpāpasya mārjanam

snāpayitvā jagannāthaṃ puṣpamālāvarohaṇam //
kurute pratipuṣpaṃ tu svarṇaniṣkāyutaṃ phalam

snānakāle tu devasya śaṃkhādīnāṃ tu vādanam /
kurute brahmaloke tu vasate brahmavāsaram

snānakāle sa kṛṣṇasya paṭhennāmasahasrakam //
pratyakṣaraṃ labhetpreṣṭaṃ kapilāgośatodbhavam

phalametanmahīpāla gītāyāḥ parikīrtitam //
gajeṃdramokṣaṇenaivaṃ stavarājena kīrttitam

stavairṛṣikṛtairanyaiḥ paṭhitaiśca narādhipa //
toṣamāpnoti deveśaḥ sarvānkāmānprayacchati

kiṃ punarvedapāṭhaṃ tu snānakāle karoti yaḥ //
tasya yallabhate puṇyaṃ na jñātaṃ naranāyaka

snāna kāle ca saṃprāpte kṛṣṇasyāgre tu nartanam //
gītaṃ caiva punastatra stavanaṃ vadanena hi

snānakāle tu kṛṣṇasya jayaśabdaṃ karoti yaḥ //
karatāla samāyuktaṃ gītanṛtyaṃ karoti ca

tatra ceṣṭāṃ prakurvāṇo hasate jalpate'pi vā //
muktaṃ tena paraṃ māturyoniyaṃtrasya nirgamam

nottānaśāyī bhavati māturaṃke nareśvara //
guṇānpaṭhati kṛṣṇasya yaḥ kāle snānakarmaṇaḥ

caṃdanāgurumiśreṇa kaṃkumena sugaṃdhinā //
vilepayati yaḥ kṛṣṇaṃ karpūramṛganābhinā //
kalpaṃ tu bhavane viṣṇorvasate pitṛbhiḥ saha

pratyekaṃ caṃdanādīnāmiṃdradyumna na cānyathā //
nānādeśasamudbhūtaiḥ suvastraiśca sukomalaiḥ

dhūpayitvā sugaṃdhaiśca yo dhūpayati mānavaḥ //
manvaṃtarāṇi vasate tatsaṃkhyāni harergṛhe

svaśaktyā devadeveśaṃ bhūṣaṇairbhūṣayaṃti ca //
hemajairatulaiḥ śubhrairmaṇijaiśca suśobhanaiḥ

teṣāṃ phalaṃ mahārāja rudrāśca vāsavādayaḥ

jānaṃti munayo naiva varjayitvā tu mādhavam //
ye'rcayaṃti jagannāthaṃ kṛṣṇaṃ kalimalāpaham //
ketakītulasīpatraiḥ puṣpairmālatisaṃbhavaiḥ

taddeśasaṃbhavaiścānyairbhūribhiḥ kusumairnṛpa //
ekaikaṃ nṛpa śārdūla rājasūyasamaṃ smṛtam

ye kurvaṃti narāḥ pūjāṃ svaśaktyā rukmiṇīpateḥ //
krīḍaṃti viṣṇuloke te manvataraśataṃ narāḥ

yaḥ punastulasīpatraiḥ komalamaṃjarīyutaiḥ //
pūjayecchraddhayā yastu kṛṣṇaṃ devakinaṃdanam

yā gatiryogayuktānāṃ yā gatiryogaśālinām //
yā gatirdānaśīlānāṃ yā gatistīrthasevinām

yā gatirmātṛbhaktānāṃ dvādaśīṃ vedhavarjitām //
kurvatāṃ jāgaraṃ viṣṇornṛtyatāṃ gāyatāṃ phalam

vaiṣṇavānāṃ tu bhaktānāṃ yatphalaṃ vedavādinām //
paṭhatāṃ vaiṣṇavaṃ śāstraṃ vaiṣṇavānāṃ tu yacchatām

tulasīmālayā kṛṣṇaḥ pūjito rukmiṇī patiḥ //
phalametanmahīpāla yacchate nātra saśayaḥ

yathā lakṣmīḥ priyā viṣṇostulasī ca tato'dhikā //
dvārakāyāṃ samutpannā viśeṣeṇa phalādhikā

yatra tatra sthito viṣṇustulasīdalamālayā //
pūjito dvārakātulyaṃ puṇyaṃ sa yacchate kalau

yo'rcayetketakīpatraiḥ kṛṣṇaṃ kalimalāpaham //
patrepatre'śvamedhasyaphalaṃ yacchati bhūbhuja

yo'rcayenmālatīpuṣpaiḥ kṛṣṇaṃ tribhuvaneśvaram //
tenāptaṃ nāsti saṃdeho yatphalaṃ durlabhaṃ hareḥ

ṛtukālodbhavaiḥ puṣpairyo'rcayedrukmiṇīpatim //
sarvānkāmānavāpnoti durlabhāndevamānuṣaiḥ

kṛṣṇenāguruṇā kṛṣṇaṃ dhūpayaṃti kalau yuge //
sakarpūreṇa rājendra kṛṣṇatulyā bhavaṃti te

sājyena guggulenāpi sugaṃdhena janārddanam //
dhūpayitvā naro yāti padaṃ bhūyaḥ sadā śivam

yo dadāti mahīpāla kṛṣṇasyāgre tu dīpakam //
pātakaṃ tu samutsṛjya jyotīrūpaṃ labhetpadam

dvāre kṛṣṇasya yo nityaṃ dīpamālāṃ karoti hi //
saptadvīpavatīrājyaṃ dvīpedvīpe phalaṃ labhet

naivedyāni manojñāni kṛṣṇāya vinivedayet //
kalpāṃtaṃ tatpitṝṇāṃ hi tṛptirbhavati śāśvatī

phalāni yacchate yo vai suhṛdyāni nareśvara //
jāyaṃte tasya kalpāṃtaṃ saphalāstu manorathāḥ

tāṃbūlaṃ tu sakarpūraṃ sapūgaṃ naranāyaka //
kṛṣṇāya yacchate yo vai padaṃ tasyāgnidaivatam

sanīraṃ karpuropetaṃ kuṃbhaṃ kṛṣṇāgrato nyaset //
kalpāṃte na jalāpekṣāṃ kurvaṃti ca pitāmahāḥ

vyajanenātha vastreṇa subhaktyā mātariśvanā //
devadevasya rājendra kurute dharmavāraṇam

tatkule nāsti pāpiṣṭho na ca loke yamasya ca //
vāyulokānmahīpāla na punarvidyate gatiḥ

kṛṣṇaveśmani yaḥ kuryyātsadhūpaṃ puṣpamaṃḍapam //
sapuṣpakavimānaistu krīḍate koṭibhirddivi

calaccāmaravātena kṛṣṇaṃ yastoṣayennaraḥ //
tasyottamāṃgaṃ deveśaścuṃbate svamukhena hi

yaḥ kuryātkṛṣṇabhavanaṃ kadalīstaṃbhaśobhitam // //
vasatyarkaloke tu yāvadvasati medinī

dhūpaṃ caṃdanamālāṃ tu kurute kṛṣṇasadmani //
devakanyāyutairlakṣaiḥ sevyate suranāyakaiḥ

dhvajamāropayedyastu prāsādopari bhaktitaḥ //
tasya brahmapade vāsaḥ krīḍate brahmaṇā saha

prāṃgaṇaṃ varṇakopetaṃ svastikaiśca samanvitaiḥ //
devadevasya kurute krīḍate bhuvanatraye

yo dadyānmaṇḍape puṣpaprakaraṃ rukmiṇīpateḥ//
devodyāneṣu sarveṣu krīḍate naranāyakaiḥ

prāsāde devadevasya citrakarma karoti yaḥ//
vasate rudraloke tu yāvattiṣṭhaṃti sāgarāḥ

dadyāccandramayaṃ yastu kṛṣṇopari nareśvara//
vasate dvārakāṃ yāvatsomaloke sa tiṣṭhati

chatraṃ bahuśalākaṃ tu kiṃkiṇīvasraguṇṭhitam //
divyaratnaiśca saṃyuktaṃ hemadaṇḍasamanvitam

samarpayati kṛṣṇāya cchatraṃ lakṣārbudairvṛtam //
amaraiḥ sahitaḥ sarvaiḥ krīḍate pitṛbhiḥ saha

dadyānnaravimānaṃ tu kṛṣṇāya naranāyaka //
satkṛto dhanadenaiva vasate brahmavāsaram

kṛtā pūjā dikaṃ bhūpa jvalaṃtaṃ kṛṣṇamūrddhani //
ārārtikaṃ prakurvāṇo modate kṛṣṇasannidhau

dīptimaṃtaṃ sakarpūraṃ karotyārārtikaṃ nṛpa //
kṛṣṇasya vasate loke saptakalpāni mānavaḥ

dhṛtvā śaṃkhodakaṃ yastu bhrāmayetkeśavopari //
saṃnidhau vasate viṣṇoḥ kalpāṃtaṃ kṣīrasāgare

evaṃ kṛtvā tu kṛpṇasya yaḥ karoti pradakṣiṇām //
paṭhannāmasahasraṃ tu stavamanyaṃ paṭhannṛpa //
saptadvīpavatīpuṇyaṃ labhate tu padepade

kuryyāddaṇḍanamaskāramaśvamedhāyutaiḥ samam //
kṛṣṇaṃ saṃtoṣayedyastu sugītairmadhuraiḥ svaraiḥ //
sāmavedaphalaṃ tasya jāyate nātra saṃśayaḥ

yo nṛtyati prahṛṣṭātmā bhāvairbahu subhaktitaḥ //
sa nirddahati pāpāni manvaṃtarakṛtānyapi

yaḥ kṛṣṇāgre mahābhaktyā kuryyātpustakavācanam //
pratyakṣaraṃ labhetpuṇyaṃ kapilāśatadānajam // /७५//
ṛgyajuḥsāmabhirvāgbhiḥ kṛṣṇaṃ saṃtoṣayaṃti ye //
kalpāṃtaṃ brahmaloke tu te vasaṃti dvijottamāḥ

yogaśāstrāṇi vedāṃtā npurāṇaṃ kṛṣṇasannidhau //
paṭhaṃti ravibiṃbaṃ te bhittvā yāṃti harerlayam

gītā nāmasahasraṃ tu stavarājo hyanusmṛtiḥ //
gajendramokṣaṇaṃ caiva kṛṣṇasyātīva vallabham

śrīmadrāgavataṃ yastu paṭhate kṛṣṇasannidhau //
kulakoṭiśatairyuktaḥ krīḍate yogibhiḥ sadā

yaḥ paṭhedrāmacaritaṃ bhārataṃ vyāsabhāṣitam //
purāṇāni mahīpāla prāpto muktiṃ na saṃśayaḥ

dvādaśīvāsare prāpta evaṃ kurvaṃti ye narāḥ //
gītādyaiḥ śatasāhasraṃ puṇyaṃ yacchati keśavaḥ

jāgare koṭiguṇitaṃ puṇyaṃ bhavati bhūbhipa //
vasatāṃ dvārakāvāsātpratyahaṃ labhate phalam

gomatīnīrapūtānāṃ kṛṣṇavaktrāvaloki nām //
darśanātpātakaṃ teṣāṃ yāti varṣaśatārjitam

dhanyāste mānuṣe loke gomatyudadhivāriṇā//
tarpayaṃti pitṝndevāngatvā dvāravatīṃ kalau //

gaṃgādvāre prayāge ca gaṃgāyāṃ kurujāṃgale //
prabhāse śuklatīrthe ca śrīsthale puṣkare'pi ca

snānena piṃḍadānena pitṝṇāṃ tarpaṇe kṛte //
tṛptirbhavati bhūpāla tathā gomatidarśanāt

yojanairbahubhistiṣṭhangomatīti ca yo vadet //
cāṃdrāyaṇasahasrasya phalamāpnoti yatnataḥ

dhanyā dvāravatī loke vahate yatra gomatī //
svayaṃ tu tiṣṭhate yatra nityaṃ rukmiṇivallabhaḥ

na snātā gomatītīre kalau pāpena mohitāḥ //
bhaviṣyati kathaṃ teṣāṃ pāpabaṃdhasya saṃkṣayaḥ

nirmitā svarganiḥśreṇī kalau kṛṣṇena gomatī //
manasaḥ prītijananī jaṃtūnāṃ narasattama

na dṛśyaṃ svargasopānaṃ dṛśyate gomatīsamam//
sukhadaṃ pāpināṃ puṃsāṃ snānamātreṇa mokṣadam

gomatīnīrasaṃyukto yatra garjati sāgaraḥ //
tatra gacchennaravyāghra kṛṣṇastiṣṭhati yatra vai

yatra cakrāṃkitaśilā gomatyudadhiniḥsṛtāḥ //
yacchaṃti pūjitā mokṣaṃ tāṃ purīṃ ko na sevate

yatra cakrāṃkitā mṛtsnā tiṣṭhate nirmalā nṛpa //
kalau pāpavināśārthaṃ tāṃ purīṃ ko na sevate

apradṛśyā purā loke daityadānavarakṣasām //
śaraṇyā devatādīnāṃ purīṃ tāṃ ko na sevate

tyajate yāṃ kalau naiva kṛṣṇo devakinandanaḥ //
karmaṇā manasā vācā tāṃ purīṃ ko na sevate

// mārkaṃḍeya uvāca // //
śṛṇu rājanpravakṣyāmi kathāṃ pāpapraṇāśinīm //
yāṃ śrutvā mucyate nūnaṃ duḥkhasaṃsāra baṃdhanāt

avantīviṣaye pūrvaṃ brāhmaṇo vedapāragaḥ //
caṃdraśarmeti vikhyātaḥ śivabhaktaḥ sadā nṛpa

manasā karmaṇā vācā nānyaṃ dhyāti sadāśivāt //
śaivādvratādvrataṃ nānyatkaroti ca narādhipa

nopavāsaṃ haridine kurute na vrataṃ hareḥ //
vinā caturdaśīṃ rājannānyadevasamudbhavam

yatrayatra śivakṣetraṃ yatra tīrthaṃ tu śāṃkaram //
tatra gacchati rājendra vaiṣṇavaṃ naiva gacchati

prativarṣaṃ tu kurute somanāthasya darśanam //
na jahāti viśeṣeṇa somaparva nareśvara

evaṃ prakurvatastasya varṣāṇi navasaptatiḥ //
gatāni kila rājendra śivabhaktiṃ prakurvataḥ

kadācitsomaparvaṇyāgate somopanāyakam//
nānādeśānmahīpāla hyasaṃkhyātāśca mānavāḥ

gatāḥ kṛṣṇapurīṃ sarve dṛṣṭvā someśvaraṃ prabhum//
āhūtastaiścaṃdraśarmā na gato dvārakāṃ purīm

śivakṣetrātparaṃ tīrthaṃ nāhaṃ manye jaga ttraye //
nānyadevo mayā jñāta īśvarāddevanāyakāt

vinā'nye caṃdraśarmāṇaṃ gatāste dvārakāṃ purīm //
anyasmindivase rājangacchataḥ svagṛhaṃ prati //
cakruste darśanaṃ svapne caṃdraśarmapitāmahāḥ

pretabhūtā mahākāyāḥ kṣutkṣāmāścaiva bhīṣaṇāḥ //
dṛṣṭvā svapnaṃ mahā raudraṃ bhīto'sau ca prakaṃpitaḥ

// candraśarmovāca // //
ke yūyaṃ vikṛtākārā jaṃtūnāṃ ca bhayānakāḥ //
pṛthvīsamudbhavā jīvā na dṛṣṭā na śrutā mayā

// pretā ūcuḥ // //
mā bhayaṃ kuru vipreṃdra tava pūrvapitāmahāḥ //
āgatāstvatsamīpe tu mahāduḥkhena pīḍitāḥ

//
// candraśarmovāca // //
iṣṭaṃ dattaṃ tapastaptaṃ bhavadbhirmatpitāmahaiḥ //
pretatve kāraṇaṃ yatsyādbhavatāṃ vismayo mama

// pretā ūcuḥ // //
śṛṇu putra pravakṣyāmaḥ pretayonestu kāraṇam //
vāsaraṃ vāsudevasya sadā viddhaṃ kṛtaṃ purā

pretatvaṃ tena saṃprāptamasmābhiḥ śṛṇu putraka //
viśeṣeṇa kṛtaṃ rātrau viddhaṃ jāgaraṇaṃ hareḥ

patanaṃ narake ghore bhaviṣyati na saṃśayaḥ //
tvayā saha na saṃdeho yāvadābhūtasaṃplavam

candraśarmovāca // //
haribhaktivihīnānāṃ dvādaśīvratavarjinām//
nāśaṃ na yāti pretatvaṃ pūjitaiḥ śaṃkarādibhiḥ

na vā santoṣito devo bhaktyā tripuranāśanaḥ //
pradāsyati gatiṃ nūnaṃ pretatvaṃ na gamiṣyati

// pretā ūcuḥ // //
prāyaścittaṃ vinā putra dvādaśīvedhasaṃbhavam //
āpanna gacchate nūnaṃ pretatvaṃ naiva gacchati

prāyaścittī sadā putra pūjayāno'pi śaṃkaram //
vinā keśavapūjābhiḥ pāpaṃ bhajati govadham

prathamaṃ keśavaḥ pūjyaḥ paścāddevo maheśvaraḥ //
pūjanīyāśca bhaktyā vai yāścānyāḥ saṃti devatāḥ

mūlācchākhāḥ praśākhāśca bhavaṃti bahuśastataḥ //
vāsudevātsamudbhūtaṃ jagadetaccarācaram

tasmānmūlaṃ parityajya śākhāṃ naivārcayedbudhaḥ //
viśeṣeṇa jagannāthaṃ trailokyādhipatiṃ harim

taddine ye prakurvaṃti samyagvedhena śobhitam //
saśalyaṃ tanna saṃdehaḥ pretatvaṃ yāti tena ca

havyaṃ devā na gṛhṇanti kavyaṃ ca pitarastathā //
pūjāṃ gṛhṇāti no sūryastathā caiva pitāmahāḥ

pretāste ye prakurvaṃti saśalyaṃ vāsaraṃ hareḥ //
paurṇamāsīdvaye prāpte rākā sāgnivivarjitā

viśeṣeṇa tu vaiśākhī śrāddhādīnāṃ praśasyate //
vaiśākhe tu tṛtīyāṃ vai pūrvaviddhāṃ karoti yaḥ

havyaṃ devā na gṛhṇaṃti kavyaṃ caiva pitāmahāḥ//
yatra devā na gṛhṇaṃti kathaṃ tatra pitāmahāḥ //
tasmātkāryyā tṛtīyā ca pūrvaviddhā budhairnaraiḥ

kurvate yadi mohādvā pretatvaṃ śāśvataṃ tataḥ //
nāpayāti kṛtaiḥ puṇyairbahuśastīrthasevanaiḥ

daśamīṃ paurṇamāsīṃ ca pitroḥ sāṃvatsaraṃ dinam //
pūrvaviddhaṃ prakurvāṇo narakaṃ pratipadyate

darśaśca paurṇamāsī ca sāgnikaiḥ pūrvasaṃyutā //
nāgnihīnaistu karttavyā punarāha prajāpatiḥ

kṣayāhe tu punaḥ proktā svakālavyāpinī tithiḥ //
śrāddhaṃ tatra prakartavyaṃ hrāsavṛddhī na kāraṇam

tatroktaṃ manunā putra vedāṃtairbhāṣyakāribhiḥ //
tatpramāṇaṃ prakartavyaṃ pretatvaṃ bhavato'nyathā //

etai. prakāraiḥ pretatvaṃ prāṇināṃ jāyate bhuvi //
nirīkṣya dharmaśāstrāṇi kāryyaṃ vihitamātmanaḥ

praṇamya somanāthaṃ tu yātrāṃ kṛtvā na gacchati //
kṛṣṇasya darśanārthāya tasya kiṃ jāyate phalam

kathyate paramā mūrtirharirīśvarasaṃ saṃsthitā//
vibhedo nātra kartavyo yathā śaṃbhustathā hariḥ

kṛṣṇasya somanāthasya nāṃtaraṃ dṛśyate kvacit//
yātrā śrīsomanāthasya saṃpūrṇā kṛṣṇadarśanāt

tasmādubhayataḥ putra gantavyaṃ nātra saṃśayaḥ//
dṛṣṭvā someśvaraṃ devaṃ gaṃtavyaṃ dvārakāṃ prati

prabhāse somanāthasya liṃgamadhye vyavasthitaḥ //
svayaṃ tiṣṭhati puṇyātmā bhogaṃ gṛhṇāti keśavaḥ

dṛṣṭvā someśvaraṃ devaṃ dvārakāṃ na naro gataḥ //
patanaṃ narake ghore pitṝṇāṃ ca bhaviṣyati

viśeṣeṇa tvayā vatsa na kṛtaṃ dvādaśīvratam //
vrataṃ kṛtaṃ yadasmābhistatkṛtaṃ vedhasaṃyutam //
nirgamaṃ yamalokāddhi tadasmākaṃ na dṛśyate

// candraśarmovāca // //
yadi tāta mayā'jñānānna kṛtaṃ dvādaśīvratam //
kasmātkṛtaṃ saśalyaṃ tu bhavadbhirdvādaśīvratam

// pretā ūcuḥ // //
kuvipraistu kudaivajñaiḥ śukramāyāvimohitaiḥ //
pāruṣyatāhetukaiśca pretayonimimāṃ gatāḥ //

dattaṃ taptaṃ hutaṃ japtamasmākaṃ viphalaṃ gatam //
saṃprāptā pretayonistu saśalyādvādaśīvratāt

saśalyaṃ ye prakurvaṃti vāsaraṃ keśava priyam //
teṣāṃ pitāmahāḥ svargātpretatvaṃ yāṃti putraka

// candraśarmovāca // //
pretatvaṃ nāśamāyāti kathametatpitāmahāḥ //
karmaṇā kena tatsarvaṃ yaccāhaṃ prakaromi tat

// pretā ūcuḥ // //
mā gayāṃ mā prayāgaṃ ca puṣkare kurujāṃgale //
ayodhyāyāmavaṃtyāṃ vā madhurāyāṃ na cārbude

na cānyattīrthalakṣaṃ tu varjayitvā tu gomatīm //
gaṃgā sarasvatī caiva narmadā naiva puṣkaram

yādṛśaṃ gomatītīre kalau pretatvanāśanam //
gomatīnīradānena kṛṣṇavaktravilokanāt

vilayaṃ yāṃti pāpāni janmakoṭikṛtānyapi //
vṛthā saṃnyāsināṃ puṇyaṃ vṛthā ca vanavāsinām

saśalyaṃ vāsaraṃ viṣṇoḥ kurvaṃti yadi putraka //
tasmādgaccha mukhaṃ paśya pūrṇacandrasamaṃ mukham

kṛṣṇasya dvārakāṃ gatvā yathāsmākaṃ gatirbhavet //
viphalaṃ tava saṃjātā na kṛtaṃ yadupārjjitam

tadvyartha sakalaṃ jātaṃ vinā keśava pūjanāt //
vinā keśavapūjāyāḥ śaṃkaro yastvayārccitaḥ //
tatpuṇyaṃ viphalaṃ jātaṃ pretayoniṃ gamiṣyasi

saṃpūrṇaṃ tava puṇyaṃ ca dvārakā kṛṣṇadarśanāt //
bhaviṣyati na sandeho gomatyudadhisannidhau

dṛṣṭvā someśvaraṃ devaṃ kṛṣṇaṃ yadi na paśyati //
yātrāphalaṃ na cāpnoti vadatyevaṃ svayaṃ śivaḥ

dṛṣṭo'haṃ tairna sandeho yaiḥ kṛtaṃ kṛṣṇadarśanam //
ekā mūrtirna sandeho mama kṛṣṇasya nāṃtaram

dṛṣṭvā māṃ dvārakāṃ gatvā karttavyaṃ kṛṣṇadarśanam //
dṛṣṭvā kṛṣṇaṃ tu māṃ paśyedyāsyatyeva mahāphalam

kṛṣṇadarśanapūtātmā yo māṃ paśyati mānavaḥ //
na tasya punarāvṛttirmama lokācca vaiṣṇavāt

ityāha devadeveśaḥ svayaṃ somapatiḥ purā //
viprāṇāṃ śrutamasmābhirvadatāṃ puṣkare satām

tasmādgaccha prayāṇārtha kuru kṛṣṇasya darśanam //
anyathā yāsyase yoniṃ paiśācīṃ pāpadāyinīm

kṛtāparādho'pi yadā kurute kṛṣṇadarśanam //
mucyate nā'tra saṃdehaḥ pāpājjanmakṛtādapi

pūjite devadeveśe kṛṣṇe devakinandane //
pūjitā devatāḥ sarvā brahmarudrabhagādikāḥ

vinā kṛṣṇasya pūjāṃ ca rudrādyāstridivaukasaḥ //
pūjitā naiva kurvaṃti tuṣṭiṃ putra pitāmahāḥ

tasmāddvāravatīṃ gatvā kṛṣṇasya darśanaṃ kuru //
pretayonervinirmuktā yāsyāmaḥ paramāṃ gatim

gomatīnīradhautāni yasyāṃgāni kalau yuge //
munibhiryonigamanaṃ tasya dṛṣṭaṃ na putraka

tāḍitāḥ pādayugmena gomatīnīravīcayaḥ //
agatīnāṃ prakurvati gatiṃ vai brahmavādinām

yaḥ punaḥ kurute śrāddhaṃ gomatyudadhisaṃgame //
pitṝṇāṃ jāyate tṛptiryāvadābhūtasaṃplavam

sasāgaradharāyāṃ ca sarvatīrtheṣu yatphalam //
dinenaikena tatpuṇyaṃ dvārakākṛṣṇasannidhau

yatphalaṃ tridaśairdṛṣṭaṃ sarvatīrthasamudbhavam //
tatphalaṃ labhate sarvaṃ dvārakāyāṃ dinedine

tīrthakoṭisahasraistu kṛtaiḥ śrāddhaiśca yatphalam //
pitṝṇāṃ tatphalaṃ proktaṃ gomatītilatarpaṇāt

yatīnāṃ bhojanaṃ yastu yacchate kṛṣṇamandire //
sikthesikthe bhavettṛptiḥ pitṝṇāṃ yugasaṃkhyayā

kaupīnācchādanaṃ chatraṃ pāduke ca kamaṇḍalum //
dattvā saṃnyāsināṃ yāti sapta kalpāni tatphalam

dhanyāste mānavāḥ putra vasanti śvapacādayaḥ //
dvārakāyāṃ gatiṃ yāṃti vasatāṃ tatra yoginām //

trikālaṃ ye prapaśyaṃti vadanaṃ pratyahaṃ hareḥ //
na teṣāṃ punarāvṛttiḥ kalpakoṭiśatairapi

yā nārī vidhavā bhūtvā kurute dvārakāśrayam //
kulāyutasahasraṃ tu nayate paramaṃ padam

putreṇāpīha kiṃ kāryyaṃ na gato dvārakāṃ yadi //
nārī putraśatācchreṣṭhā gatvā kṛṣṇapurīṃ vaset //

kṛṣṇaṃ kṛṣṇapurīṃ gatvā yo'rccayettulasīdalaiḥ //
prāptaṃ janmaphalaṃ tena tāritāḥ prapitāmahāḥ

tulasīdalamālāṃ tu kṛṣṇottīrṇāṃ tu yo vahet //
patrepatre'śvamedhānāṃ daśānāṃ labhate phalam

tulasīkāṣṭhasaṃbhūtāṃ yo mālāṃ vahate naraḥ //
phalaṃ yacchati daityāriḥ pratyahaṃ dvārakodbhavam

nivedya viṣṇave mālāṃ tulasīkāṣṭhasaṃbhavām //
vahate yo naro bhaktyā tasya naivāsti pātakam //
sadā prītamanāstasya kṛṣṇo devakinaṃdanaḥ

tulasīkāṣṭhasaṃbhūtaṃ śirobāhvādibhūṣaṇam //
jāyate yasya martyasya tasya dehe sadā hariḥ

tulasīmālayā yastu bhūṣitaḥ karma cā''caret //
pitṝṇāṃ devatānāṃ ca kṛtaṃ koṭiguṇaṃ kalau

tulasīkāṣṭhamālāṃ tu pretarājasya dūtakāḥ //
dṛṣṭvā dūreṇa naśyaṃti vātoddhūtā yathā'layaḥ

jāyate tadgrahe naiva pāpasaṃkramaṇaṃ kutaḥ //
śrutaṃ purāṇamasmābhiḥ kathitaṃ brahmavādibhiḥ

tasmānmālā tvayā dhāryyā tulasīkāṣṭhasaṃbhavā //
harate nātra saṃdeha aihikāmuṣmikaṃ tvagham

tulasīmālayā yastu bhūṣito bhramate yadi //
duḥsvapnaṃ durnimittaṃ ca na bhayaṃ śātravaṃ kvacit

kṛtvā vai tīrthasaṃnyāsaṃ yatayo vidhavāḥ striyaḥ //
jīvanmuktāḥ kalau jñeyāḥ kulakoṭisamanvitāḥ //

dhārayaṃti na ye mālāṃ haitukāḥ pāpamohitāḥ //
narakānna nivartaṃte dagdhāḥ kopāgninā hareḥ

unmīlinī vaṃjulinī trispṛśā pakṣavarddhinī //
tvayā putra prakarttavyā jayaṃtī vijayā jayā

pāpaghnī cāṣṭamī proktā kṛṣṇasyātīva vallabhā //
kṛtā kalau yuge putra dvārakā mokṣadāyinī

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye dvārakāgamanamāhātmya tulasīdhāraṇamāhātmyavarṇanaṃnāma trayoviṃśatitamo'dhyāyaḥ