Skanda Purana · Chapter 7.23

// pulastya uvāca // //
tato gacchennṛpaśreṣṭha śuklatīrthamanuttamam //
yatkhyātimagamatpūrvaṃ sakāśāddāśavargataḥ

purā''sīdrajako nāmnā śamilākṣo mahīpate //
nīlīmadhye tu vastrāṇi prakṣiptāni mahīpate

athāsau bhayamāpanno jñātvā vastraviḍaṃbanam//
deśāṃtaraṃ prasthito'sau svakuṭumbasamāvṛtaḥ

atha tasya sutā rājandāśakanyāsakhī śubhā //
duḥkhena mahatāviṣṭā dāśyaṃtikamupādravat

tasyai nivedayāmāsa bhayaṃ vastrasamudbhavam //
videśacalanaṃ caiva bāṣpagadgadayā girā

dāśakanyāpi duḥkhena tasyā duḥkhasamanvitā //
abravīdvāṣsaṃklinnāṃ niśvasaṃtī muhurmuhuḥ

// dāśakanyovāca // //
astyupāyo mahānatra vidito mama śobhane //
dhruvaṃ tena kṛtenaiva nirbhayaṃ te ca te pituḥ

atrāsti nirjharaṃ subhrūrarbude varavarṇini //
tatra me bhrātaraścaiva tathānye matsyajīvinaḥ

yaccānyadapi tatraiva kṣipyate salile śubhe //
tatsarvaṃ śuklatāmeti paśya me vapurīdṛśam

sarveṣāmeva dāśānāṃ tasya toyasya majjanāt //
tāni vastrāṇi tatraiva tātastava sumadhyame //
jale prakṣālayetkṣipraṃ prayāsyaṃti suśuklatām

tvayā'tra na bhayaṃ kāryaṃ gatvā tātaṃ nivāraya //
prasthitaṃ paradeśāya nātra kāryā vicāraṇā

// pulastya uvāca // //
sā tasyā vacanaṃ śrutvā gatvā sarvaṃ nyavedayat //
janakāya sutā tūrṇaṃ tato'sau tuṣṭimāptavān

prātarutthāya tūrṇaṃ sa nirjharaṃ tamupādravat//
kṣiptamātrāṇi rājendra tāni vastrāṇi tena vai //

tasmiṃstoyetiśuklatvaṃ gatāni bahulāṃ tataḥ //
kāṃtimāpuśca paramāṃ tathā dṛṣṭvāṃbarāṇi ca

athāsau vismayāviṣṭastāni cādāya satvaraḥ //
rājñe nivedayāmāsa vṛttāṃtaṃ ca tadudbhavam

tato vismayamāpannaḥ sa rājā tatra nirjhare //
anyāni nīlīraktāni vastrāṇi cākṣipajjale

sarvāṇi śuklatāṃ yāṃti viśiṣṭāni bhavaṃti ca //
jñātvā tataḥ paraṃ tīrthaṃ snānaṃ cakre yathāvidhi

tyaktvā rājyaṃ sa tatraiva tapastepe mahīpatiḥ //
tataḥ siddhiṃ parāṃ prāptastīrthasyāsya prabhāvataḥ

ekādaśyāṃ narastatra yaḥ śrāddhaṃ kurute nṛpa //
sa kulāni samuddhṛtya daśa yāti divaṃ tataḥ //
snānenava vipāpatvaṃ tatkṣaṇādeva jāyate

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe śuklatīrthamāhātmyavarṇanaṃnāma trayoviṃśo'dhyāyaḥ