સ્કંદ પુરાણ · અધ્યાય 7.23

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ શુક્લતીર્થમનુત્તમમ્ ॥
યત્ખ્યાતિમગમત્પૂર્વં સકાશાદ્દાશવર્ગતઃ

પુરાઽઽસીદ્રજકો નામ્ના શમિલાક્ષો મહીપતે ॥
નીલીમધ્યે તુ વસ્ત્રાણિ પ્રક્ષિપ્તાનિ મહીપતે

અથાસૌ ભયમાપન્નો જ્ઞાત્વા વસ્ત્રવિડંબનમ્॥
દેશાંતરં પ્રસ્થિતોઽસૌ સ્વકુટુમ્બસમાવૃતઃ

અથ તસ્ય સુતા રાજન્દાશકન્યાસખી શુભા ॥
દુઃખેન મહતાવિષ્ટા દાશ્યંતિકમુપાદ્રવત્

તસ્યૈ નિવેદયામાસ ભયં વસ્ત્રસમુદ્ભવમ્ ॥
વિદેશચલનં ચૈવ બાષ્પગદ્ગદયા ગિરા

દાશકન્યાપિ દુઃખેન તસ્યા દુઃખસમન્વિતા ॥
અબ્રવીદ્વાષ્સંક્લિન્નાં નિશ્વસંતી મુહુર્મુહુઃ

॥ દાશકન્યોવાચ ॥ ॥
અસ્ત્યુપાયો મહાનત્ર વિદિતો મમ શોભને ॥
ધ્રુવં તેન કૃતેનૈવ નિર્ભયં તે ચ તે પિતુઃ

અત્રાસ્તિ નિર્ઝરં સુભ્રૂરર્બુદે વરવર્ણિનિ ॥
તત્ર મે ભ્રાતરશ્ચૈવ તથાન્યે મત્સ્યજીવિનઃ

યચ્ચાન્યદપિ તત્રૈવ ક્ષિપ્યતે સલિલે શુભે ॥
તત્સર્વં શુક્લતામેતિ પશ્ય મે વપુરીદૃશમ્

સર્વેષામેવ દાશાનાં તસ્ય તોયસ્ય મજ્જનાત્ ॥
તાનિ વસ્ત્રાણિ તત્રૈવ તાતસ્તવ સુમધ્યમે ॥
જલે પ્રક્ષાલયેત્ક્ષિપ્રં પ્રયાસ્યંતિ સુશુક્લતામ્

ત્વયાઽત્ર ન ભયં કાર્યં ગત્વા તાતં નિવારય ॥
પ્રસ્થિતં પરદેશાય નાત્ર કાર્યા વિચારણા

॥ પુલસ્ત્ય ઉવાચ ॥ ॥
સા તસ્યા વચનં શ્રુત્વા ગત્વા સર્વં ન્યવેદયત્ ॥
જનકાય સુતા તૂર્ણં તતોઽસૌ તુષ્ટિમાપ્તવાન્

પ્રાતરુત્થાય તૂર્ણં સ નિર્ઝરં તમુપાદ્રવત્॥
ક્ષિપ્તમાત્રાણિ રાજેન્દ્ર તાનિ વસ્ત્રાણિ તેન વૈ ॥

તસ્મિંસ્તોયેતિશુક્લત્વં ગતાનિ બહુલાં તતઃ ॥
કાંતિમાપુશ્ચ પરમાં તથા દૃષ્ટ્વાંબરાણિ ચ

અથાસૌ વિસ્મયાવિષ્ટસ્તાનિ ચાદાય સત્વરઃ ॥
રાજ્ઞે નિવેદયામાસ વૃત્તાંતં ચ તદુદ્ભવમ્

તતો વિસ્મયમાપન્નઃ સ રાજા તત્ર નિર્ઝરે ॥
અન્યાનિ નીલીરક્તાનિ વસ્ત્રાણિ ચાક્ષિપજ્જલે

સર્વાણિ શુક્લતાં યાંતિ વિશિષ્ટાનિ ભવંતિ ચ ॥
જ્ઞાત્વા તતઃ પરં તીર્થં સ્નાનં ચક્રે યથાવિધિ

ત્યક્ત્વા રાજ્યં સ તત્રૈવ તપસ્તેપે મહીપતિઃ ॥
તતઃ સિદ્ધિં પરાં પ્રાપ્તસ્તીર્થસ્યાસ્ય પ્રભાવતઃ

એકાદશ્યાં નરસ્તત્ર યઃ શ્રાદ્ધં કુરુતે નૃપ ॥
સ કુલાનિ સમુદ્ધૃત્ય દશ યાતિ દિવં તતઃ ॥
સ્નાનેનવ વિપાપત્વં તત્ક્ષણાદેવ જાયતે

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખંડે શુક્લતીર્થમાહાત્મ્યવર્ણનંનામ ત્રયોવિંશોઽધ્યાયઃ