Skanda Purana · Chapter 7.224

// īśvara uvāca // //
tato gacchenmahādevi liṃgamiṃdrapratiṣṭhitam //
pāpamocananāmāḍhyaṃ dakṣiṇe puruṣottamāt

vṛtraṃ hatvā purā śakro brahmahatyāsamanvitaḥ //
abravītsa ṛṣīndivyānkathameṣā gamiṣyati

brahmahatyā hi duṣprekṣyā vivarṇajananī mama //
durgaṃdhacāriṇī caiva sarvatejovināśinī

athocustaṃ suragaṇā nāradādyā maharṣayaḥ //
prabhāsaṃ gaccha deveśa kṣetraṃ pāpaharaṃ hi tat

tatrārādhya mahādevaṃ mokṣyase brahmahatyayā //
sa tatheti pratijñāya gatastatra varānane

liṃgaṃ saṃsthāpayāmāsa devadevasya śūlinaḥ //
tasya pūjārato nityaṃ dhūpagaṃdhānulepanaiḥ

tato'sya gātradaurgaṃdhyaṃ nāśamāśvabhyagacchata //
vivarṇatvaṃ gataṃ sarvaṃ vapuścābhūttathottamam

atha hṛṣṭamanā bhūtvā vākyametaduvāca ha //
tatrāgatya naro bhaktyā yaścainaṃ pūjayiṣyati

brahmahatyādikaṃ pāpaṃ nāśaṃ tasya prayāsyati //
evamuktvā sahasrākṣaḥ prahṛṣṭastridivaṃ yayau

brahmahatyāvinirmuktaḥ pūjyamāno divaukasaiḥ //
godānaṃ tatra dātavyaṃ brāhmaṇe vedapārage //
brahmahatyāpanodārthaṃ tatra śrāddhaṃ samācaret

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya indreśvaramāhātmyavarṇanaṃnāma caturviṃśatyuttaradviśatatamo'dhyāyaḥ