સ્કંદ પુરાણ · અધ્યાય 7.224

॥ ઈશ્વર ઉવાચ ॥ ॥
તતો ગચ્છેન્મહાદેવિ લિંગમિંદ્રપ્રતિષ્ઠિતમ્ ॥
પાપમોચનનામાઢ્યં દક્ષિણે પુરુષોત્તમાત્

વૃત્રં હત્વા પુરા શક્રો બ્રહ્મહત્યાસમન્વિતઃ ॥
અબ્રવીત્સ ઋષીન્દિવ્યાન્કથમેષા ગમિષ્યતિ

બ્રહ્મહત્યા હિ દુષ્પ્રેક્ષ્યા વિવર્ણજનની મમ ॥
દુર્ગંધચારિણી ચૈવ સર્વતેજોવિનાશિની

અથોચુસ્તં સુરગણા નારદાદ્યા મહર્ષયઃ ॥
પ્રભાસં ગચ્છ દેવેશ ક્ષેત્રં પાપહરં હિ તત્

તત્રારાધ્ય મહાદેવં મોક્ષ્યસે બ્રહ્મહત્યયા ॥
સ તથેતિ પ્રતિજ્ઞાય ગતસ્તત્ર વરાનને

લિંગં સંસ્થાપયામાસ દેવદેવસ્ય શૂલિનઃ ॥
તસ્ય પૂજારતો નિત્યં ધૂપગંધાનુલેપનૈઃ

તતોઽસ્ય ગાત્રદૌર્ગંધ્યં નાશમાશ્વભ્યગચ્છત ॥
વિવર્ણત્વં ગતં સર્વં વપુશ્ચાભૂત્તથોત્તમમ્

અથ હૃષ્ટમના ભૂત્વા વાક્યમેતદુવાચ હ ॥
તત્રાગત્ય નરો ભક્ત્યા યશ્ચૈનં પૂજયિષ્યતિ

બ્રહ્મહત્યાદિકં પાપં નાશં તસ્ય પ્રયાસ્યતિ ॥
એવમુક્ત્વા સહસ્રાક્ષઃ પ્રહૃષ્ટસ્ત્રિદિવં યયૌ

બ્રહ્મહત્યાવિનિર્મુક્તઃ પૂજ્યમાનો દિવૌકસૈઃ ॥
ગોદાનં તત્ર દાતવ્યં બ્રાહ્મણે વેદપારગે ॥
બ્રહ્મહત્યાપનોદાર્થં તત્ર શ્રાદ્ધં સમાચરેત્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્ય ઇન્દ્રેશ્વરમાહાત્મ્યવર્ણનંનામ ચતુર્વિંશત્યુત્તરદ્વિશતતમોઽધ્યાયઃ