Skanda Purana · Chapter 7.220

// īśvara uvāca // //
tato gacchenmahādevi devaṃ trailokyapūjitam //
vṛṣadhvajeśvaraṃ nāma sthitaṃ dakṣiṇatastathā

yattadakṣaramavyaktaṃ paraṃ yasmānna vidyate //
yogagamyamanādyaṃtaṃ vṛṣabhadhvaja saṃmitam

sarvāścaryamayaṃ devi buddhigrāhyaṃ nirāmayam//
viśvataḥ pāṇipādaṃ ca viśvato'kṣiśiromukham

taṃ ca devaṃ ciraṃ sthāṇuṃ vṛṣabhadhvajasaṃjñitam //
pṛthurmarucca bharataḥ śaśabindurgayaḥ śibiḥ

rāmoṃ'barīṣo māṃdhātā dilīpo'tha bhagīrathaḥ //
suhotro raṃtidevaśca yayātiḥ sagarastathā

ṣoḍaśaite nṛpā dhanyāḥ prabhāsaṃ kṣetramāśritāḥ //
vṛṣadhvajeśamārādhya yajñairiṣṭvā divaṃ gatāḥ

satyaṃ vacmi hitaṃ vacmi sāraṃ vacmi punaḥpunaḥ //
asāre dagdhasaṃsāre sāraṃ tatra śivārcanam

punarjanma punarmṛtyuḥ punaḥ kleśaḥ punarjarā //
aharaharghaṭīnyāyo na kadācidapīdṛśaḥ //

tadā śvetasya saṃsāragrantheratyantadurbhidaḥ //
paraṃ nirmūlavicchedi kriyatāṃ tadbhavārcanam

tasya cintāmaṇirgehe tasya kalpadrumaḥ kule //
kuberaḥ kiṃkarastasya bhaktiryasya śive sthitā

seyaṃ lakṣmīḥ purā puṃsāṃ seyaṃ bhaktiḥ samīhitā //
seyaṃ śreyaskarī mūrtirbhaktiryā vṛṣabhadhvaje

puṣpaiḥ paṃcabhirapyatra pūjayitvā maheśvaram //
daśānāmaśvamedhānāṃ phalaṃ prāpnoti mānavaḥ

vṛṣabhastatra dātavyo vṛṣabhadhvaja saṃnidhau //
sarvapātakanāśārthaṃ samyagyātrāphalepsubhiḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye vṛṣabhadhvajeśvaramāhātmyavarṇanaṃnāma viṃśatyuttaradviśatatamo'dhyāyaḥ