Skanda Purana · Chapter 7.221

// īśvara uvāca // //
tato gacchenmahādevi devaṃ ca ṛṇamocanam //
tasmindṛṣṭe ṛṇaṃ na syānmātāpitṛsamudbhavam

pitarastu purā sarve divyakṣetraṃ samāgatāḥ //
prabhāse tapasā yuktāḥ sthitā varṣagaṇānbahūn

agniṣvāttā barhiṣadaḥ somapā ājyapāstathā //
liṃgaṃ saṃsthāpayāmāsuḥ sarve bhaktiparāyaṇāḥ

tataḥ kālena mahatā tuṣṭasteṣāṃ maheśvaraḥ //
tataḥ pratyakṣatāṃ gatvā vākyametaduvāca ha

parituṣṭo'smi bhadraṃ vo brūta yanmanasepsitam

// pitara ūcuḥ // //
asmākaṃ dīyatāṃ vṛttirjagatyasminsvayaṃ kṛte //
devānāṃ ca ṛṣīṇāṃ ca mānuṣāṇāṃ mahītale

bhavāneva paro loke sarveṣāṃ padmasaṃbhava//
āgatya varṇāścatvāra iha ye śraddhayānvitāḥ

paitṛkāttu ṛṇānmuktā bhavaṃtu gatakalmaṣāḥ //
vyantaratvaṃ suraśreṣṭha yeṣāṃ vai pitaro gatāḥ

sarppe vahni viṣairvā ye nāśaṃ nītāḥ pitāmahāḥ //
aputrā vā saputrā vā sapiṇḍīkaraṇaṃ vinā

na kṛtāni purā yeṣāmekoddiṣṭāni ṣoḍaśa //
tathā naiva vṛṣotsargo gohatāścātha cāntyajaiḥ

athāpare ye ca mṛtāḥ śaucena tu vinā kṛtāḥ //
te cātra tarpitāḥ sarve prayāntu paramāṃ gatim

//
// śrībhagavānuvāca // //
snātvā tu salile puṇye pitṛṇāṃ caiva tarpaṇam //
ye kariṣyaṃti manujāḥ pitṛbhaktiparāyaṇāḥ

ahaṃ varapradasteṣāṃ tārayiṣyāmi tatkṣaṇāt //
pitṛnsarvānna saṃdeho yadi pāpaśatairvṛtāḥ

asmiṃstīrthe naraḥ snātvā yo liṃgaṃ pūjayiṣyati //
yuṣmābhiḥ sthāpitaṃ liṃgaṃ sa muktaḥ paitṛkādṛṇāt

yasmādṛṇātpramucyeta asya liṃgasya darśanāt //
tasmānmayā kṛtaṃ nāma hyetasya ṛṇamocanam // / १५ //
// īśvara uvāca // //
hiraṇyaṃ mastake dattvā yaḥ snāti ṛṇamocane //
ātmā vai tāritastena dattaṃ bhavati gośatam

evamuktvā sa bhagavāṃstatraivāntaradhīyata //
tasmātsarvaprayatnena tatra śrāddhaṃ samācaret //
pūjayettanmahādevi pitṛliṃgaṃ surapriyam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya ṛṇamocanamāhātmyavarṇanaṃnāmaikaviṃśatyuttaradviśatatamo 'dhyāyaḥ