Skanda Purana · Chapter 7.219

// īśvara uvāca // //
tasmādāgneyakoṇe tu mārkaṃḍeyasamīpagam //
guhāliṃgaṃ mahādevi nīlakaṇṭheti viśrutam

viṣṇunā pūjitaṃ pūrvaṃ sarva pātakanāśanam

tatra yaḥ pūjayedbhaktyā talliṃgaṃ pāpamocanam//
sa putrapaśumāndhīmānmodate pṛthivītale

evaṃ tatra mahādevi mārkaṇḍeyeśa sannidhau //
ṛṣīṇāmāśramā ye'tra dṛśyante'dyāpi bhāmini

aṣṭāśītisahasrāṇi ṛṣīṇāmūrdhvaretasām //
tatra sthitāni deveśi mārkaṇḍeyāśramāṃtike

ṛṣīṇāṃ ca guhāstatra sarvā liṃgasamanvitāḥ //
dṛśyante puṇyatapasāṃ tadāśramanivāsinām

tatra yaḥ sthāpayelliṃgaṃ mārkaṃḍeśasamīpagam//
kulānāṃ śatamuddhṛtya modate divi devavat

sarve śivamayā lokāḥ śive sarvaṃ pratiṣṭhitam //
tasmācchivaṃ yajedvidvānya icchecchriyamātmanaḥ

śivabhakto na yo rājā bhakto'nyeṣu sureṣu ca //
svapatiṃ yuvatī tyaktvā ramate'nyeṣu vai yathā

brahmādayaḥ surāḥ sarve rājānaśca maharddhikāḥ //
mānavā munayaścaiva sarve liṃgaṃ yajaṃti ca

svanāmakṛtacihnāni liṃgānīṃdrādibhiḥ kramāt //
sthāpitāni yathā sthāne mānavairapi bhūriśaḥ

sthāpanādbrahmahatyāṃ ca bhrūṇahatyāṃ tathaiva ca //
mahāpāpāni cānyāni nistīrṇāḥ śivatejasā

vṛtraṃ hatvā purā śakro māhendraṃ sthāpya śaṃkaram //
liṃgaṃ ca muktapāpaughastato'sau tridivaṃ gataḥ

sthāpayitvā śivaṃ sūryo gaṃgāsāgarasaṃgame //
nirāmayo'bhūtsomaśca prabhāse paścimodadheḥ

kāśyāṃ caiva tathādityaḥ sahye garuḍakāśyapau //
pratiṣṭhāṃ paramāṃ prāptau pratiṣṭhāpya jagatpatim

khyātadoṣā hyahilyā'pi bhartṛśaptā'bhavattadā //
sthāpyeśānaṃ punaḥ strītvaṃ lebhe putrāṃstathottamān

paśyaṃtyadyāpi yāḥ snātvā tatrāhilyeśvaraṃ striyaḥ //
puruṣāścāpi taddoṣairmucyante nātra saṃśayaḥ

sthāpayitveśvaraṃ śvetaśaile balivirocanau //
ubhāvapi hi saṃjātāvamarau balināṃ varau //

rāmeṇa rāvaṇaṃ hatvā sasainyaṃ tridaśeśvaram //
sthāpito vidhivadbhaktyā tīre nadanadīpateḥ

svāyaṃbhuvarṣidaivādiliṃgahīnā na bhūḥ kvacita // vyā
pārānsakalāṃstyaktvā pūjayadhvaṃ śivaṃ sadā //
nikaṭā iva dṛśyaṃte kṛtāṃtanagaropagāḥ

devi kiṃ bahunoktena varṇitena punaḥ punaḥ //
prabhāsakṣetrasāraṃ tu mārkaṇḍeyāśramaṃ prati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsa kṣetramāhātmye mārkaṇḍeyeśvaramāhātmyavarṇanaṃnāmaikonaviṃśatyuttaradviśatatamo'dhyāyaḥ