Skanda Purana · Verses 7.21-2

// śrīprahlāda uvāca // //
śivaligamalaṃghyaṃ hi buddhipūrvaṃ hato hyaham //
uvāca kṛṣṇaṃ danujaśchalito'haṃ tvayā'nagha

// śrīviṣṇu ruvāca // //
parituṣṭosmi te daitya śauryeṇa śivasaṃśrayāt //
varaṃ varaya bhadraṃ te yadicchasi mahāmate

// kuśa uvāca // //
yathā pūjyo mahādevo mama tvaṃ ca tathā hare //
eka eva dvidhāmūrtistasmāttvāṃ varayāmyaham

śivaliṃgaṃ tvayā nātha sthāpitaṃ yanmamopari //
mama nāmnā bhavatu ca kuśeśvara iti smṛtam

anugrāhyo yadyahaṃ te mama kīrtirbhavatviyam //
evaṃ bhaviṣyatītyuktastatraivāvasthito'suraḥ

tato'nyadānavānsarvānpreṣayāmāsa mādhavaḥ //
rasātalagatā kecitkecidviṣṇuṃ samāgatāḥ

anaṃtaḥ saṃsthitastatra viṣṇuśca tadanaṃtaram //
jñātvā vimuktidaṃ tīrthaṃ durvāsā munipuṃgavaḥ

gomatyāṃ cakratīrthe ca bhagavāṃśca trivikramaḥ //
tena tanmuktidaṃ matvā durvāsāstatra saṃsthitaḥ

evaṃ trivikramaḥ svāmī tadāprabhṛti saṃsthitaḥ //
kalau punaḥ kalānyāsātkṛṣṇatvamagamatprabhuḥ

// prahlāda uvāca // //
pūjāvidhiṃ harerviprāḥ śṛṇudhvaṃ susamāhitāḥ //
viśeṣātphaladaḥ proktaḥ pūjito madhumādhave

madhusūdanīṃ naro yastu dvāravatyāṃ karoti ca //
pūjayetkṛṣṇadevaṃ ca snāpayitvā vilipya ca

gandhaiśca vāsasā''cchādya dhūpairdīpairanekadhā //
naivedyairbhūṣaṇaiścaiva tāṃbūlena phalena ca

ārārtikena saṃpūjya daṇḍavatpraṇipatya ca //
ghṛtena dīpakaṃ dattvā rātrau jāgaraṇaṃ tathā //
kuryyācca gītavāditraistathā pustakavācakaiḥ

kṛtvā caivaṃ vidhiṃ bhaktyā sarvānkāmānavāpnu yāt

tathā nabhasi sampūjya pavitrāropaṇena ca //
pitṝṇāṃ cākṣayā tṛptiḥ saphalāḥ syurmanorathāḥ

prabodhavāsare prāpte kārtike dvija sattamāḥ //
saṃpūjya kṛṣṇaṃ deveśaṃ parāṃ gatimavāpnuyāt

tathā nabhasye saṃpūjya pavitrāropaṇena ca //
sarvānkāmānavāpnoti viṣṇulokaṃ ca gacchati

yugādiṣu ca saṃpūjya hyayane dakṣiṇottare //
āṣāḍhajyeṣṭhamāgheṣu pauṣādidvādaśīṣu ca

kalau kṛṣṇaṃ pūjayitvā gomatyudadhisaṃgame //
vimalaṃ lokamāpnoti yatra gatvā na śocati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe caturthe dvārakāmāhātmye gomatītīrastha kṣetrastha bhagavatpūjāmāhātmyavarṇanaṃnāmaikaviṃśatitamo'dhyāyaḥ